‘Tosambisha lokumu l’ɔlɔlɔ dimɛna dimɛna’
1. Naa nkumu y’ɛlɔlɔ yahombaso mbewoya anto?
1 Lo andja ɔnɛ wahaleke mbokɛ nkumu y’ɛlɔlɔ, tekɔ la diɛsɛ dia ‘sambisha lokumu l’ɔlɔlɔ la ngandji ka mamba ka Nzambi dimɛna dimɛna.’ (Etsha 20:24) Lokumu l’ɔlɔlɔ lɔsɔ mendanaka ndo la mbewoya anto dia kema edja “nshi y’ekumelu” yayanga tshikɛ andja w’oyoyo wosembwe waki Jehowa dihole, lɛnɛ ele “akambu wa ntundu [wayoshila].” (2 Tim. 3:1-5; Eny. 21:4) L’etena kɛsɔ ndoko onto layonga la hemɔ nto. (Is. 33:24) Wakiso wa ngandji wakavu wele lo waombo wa eohwelo wayotomba ndo wayoyonga nto kâmɛ la nkumbo yawɔ ndo la angɛnyi awɔ. (Joa. 5:28, 29) Nkɛtɛ k’otondo kayokadimɔ paradiso ka dimɛna efula. (Is. 65:21-23) Ɔsɔ ekɔ bɛnyɛlɔ dingana to dia nkumu y’ɛlɔlɔ yahombaso mbewoya anto!
2. Lande na kele nshi ya Eohwelo toshaka waaso w’amɛna efula wa sho sambisha lokumu l’ɔlɔlɔ?
2 Ngɔndɔ ka sato, ka nɛi ndo ka tanu ayotosha waaso w’amɛna efula wa sambisha nkumu y’ɛlɔlɔ shɔ. Lo ngɔndɔ shɔ hiɛlɛlɛ mongaka dimɛna ndo lo ahole efula wa l’andja, yanyi ndekaka otsho otale. Dui sɔ kimanyiyaka anto efula dia vɔ ndeka sambisha. Ndo nto Eohwelo, dikambo dioleki ohomba dia l’ɔnɔnyi diayosalema l’andja w’otondo Lushi la samalo, Ngɔndɔ ka sato 22 l’ɔkɔngɔ wa ɛɔtwɛlɔ ka wonya. Ɔnɛ mbele etena kahombaso tatɛ ndjalɔngɔsɔla dia ndeka sambisha.
3. Kakɔna kayokimanyiya ase nkumbo dia vɔ pamia olimu awɔ w’esambishelo?
3 Olimu w’ombatshi mboka wa tshanda: Onde wɛ hakoke nɔngɔsɔla ekongelo kayɛ dia wɛ kamba oko ombatshi mboka wa tshanda ngɔndɔ ɔtɔi, hiende kana yakɔ shato? Onde wɛ hakoke mbɔsa yema ya etena lo wekelo anyu wa nkumbo wa mbala kayaye dia sɛdingola dikambo sɔ? Naka nyu kamba kâmɛ, kete onto ɔtɔi kana anto efula wa lo nkumbo kanyu kokaka kamba olimu w’ombatshi mboka wa tshanda. (Tuk. 15:22) Dja dikambo diakɔ lo dɔmbɛlɔ kele kɛnyi woho wayɔtshɔkɔla Jehowa welo wadjayɛ. (Tuk. 16:3) Kânga naka ndoko onto la lo nkumbo kanyu lakoka kamba oko ombatshi mboka wa tshanda, ase nkumbo tshɛ kokaka ndjadjɛ eyango wa shikaa wa pamia olimu awɔ w’esambishelo ko l’etena kakɔ kâmɛ kambaka la wanɛ wele la akoka wa kamba olimu w’ombatshi mboka.
4. Naka tekɔ la olimu watɔsɛ wenya efula, ngande wakokaso kongɛ akambo aso dia kamba oko ombatshi mboka wa tshanda?
4 Naka wɛ ekɔ la olimu wakɔsɛ wenya efula, kete monga la ekongelo ka dimɛna mbeyaka kokimanyiya dia wɛ kamba oko ombatshi mboka wa tshanda. Ondo wɛ kokaka sambisha lo wenya wa diomuyelo. Kana wɛ kokaka kondja ɛtshi ka nkɛtɛ kele suke la ngelo kayɛ kana suke la dihole diakambayɛ olimu dia wɛ sambishaka wonya ɔtɔi la ntondo kana l’ɔkɔngɔ w’olimu. Wɛ kokaka kondja wenya ekina oma l’ekongelo kayɛ lo kongɛ dia ndjosala awui wele bu ohomba efula lo ngɔndɔ kekina ndo lo sambishaka lushi l’otondo lo waa wikɛndɛ. Anto amɔtshi wakɔshi kɔnje lushi ɔtɔi kana nshi hiende dia mbetsha l’olimu w’esambishelo.
5. Ngande wakokaso kimanyiya esombe kana wanɛ wele la dikɔmɔ dia vɔ kamba olimu w’ombatshi mboka wa tshanda?
5 Naka wɛ aya osombe, kana ekɔ la ɛkɔmɔ, kana bu la wolo efula, kete wɛ kokaka kamba oko ombatshi mboka wa tshanda lo mbetshaka wenya yema tshitshɛ lushi tshɛ l’esambishelo. Lɔmba Jehowa dia nde kosha ‘wolo woleki wɔnɛ wokongaka l’onto.’ (2 Kor. 4:7) Kadiyɛso kɛmɔtshi kaki l’ɛnɔnyi 106 akakambe olimu w’ombatshi mboka wa tshanda! La ekimanyielo ka ewotɔ ande wa Akristo la anto akina wa l’etshumanelo, nde akasambishaka lo luudu la luudu, akasalaka waendelo w’eyoyo, akatshɔka le ambeki wa Bible, ndo akasambishaka lo weho ekina. Nde akasha lonya dia tatɛ mbeka la anto dikumi Bible. Nde mbutaka ate: “Etena kakanyiyami diɛsɛ dia diambo diaki la mi dia kambɛ Jehowa oko ombatshi mboka wa tshanda, otema ami ndolaka tɔɔ la ngandji ndo la lowando le Jehowa, le Ɔnande, ndo le okongamelo Ande wa ngandji. Dimi nangaka mɛtɛ mbuta nte: ‘Jehowa losaka!’”
6. Ngande wakoka ɛlɔngɔlɔngɔ l’esekaseka wambobatizama wakɔtɔ kalasa monga ambatshi mboka wa tshanda?
6 Naka wɛ ekɔ ɔlɔngɔlɔngɔ kana osekaseka wambobatizama wakɔtɔ kalasa, kete wɛ lawɔ kokaka monga ombatshi mboka wa tshanda. L’ɛnyɛlɔ ka wanɛ wakamba elimu wawaɔsɛ wenya efula, wɛ kokaka mbidja ntondo waa wikɛndɛ l’ekongelo kayɛ ka sambisha. Ondo wɛ kokaka nto tombaka nshi mɔtshi wonya ɔtɔi la ntondo kana l’ɔkɔngɔ wa kalasa. Onde nyekɔ la lushi lɔmɔtshi la fɛtɛ la kalasa lakoka kamba layɛ dia sambisha? Naka wɛ nangaka kamba olimu w’ombatshi mboka wa tshanda, kete sawola la ambutshi ayɛ dikambo diakɔ.
7. Kakɔna kakoka dikumanyi sala dia fudia wasaso w’anto dikambo di’olimu w’esambishelo lo nshi ya Eohwelo?
7 Nyofudia wasaso: Dikumanyi kokaka fudia wasaso w’etshumanelo oma lo ɛnyɛlɔ kawɔ. (1 Pet. 5:2, 3) Vɔ mbeyaka mɛna ɔlɔlɔ kongɛ nsanganya nkina y’otsha l’olimu w’esambishelo dikambo dia wanɛ walanga sambisha la pindju ka pɛ, l’ɔkɔngɔ wa kalasa, kana l’ɔkɔngɔ w’olimu. Omendji w’olimu pombaka ndjashikikɛ dia apandjudi wakoka wambɔsɔnama dia nɔmbɔla nsanganya y’otsha l’olimu w’esambishelo shɔ ndo ɛtshi ka nkɛtɛ kekɔ ndo periodikɛ la ekanda ekina wekɔ dikambo dia ngɔndɔ shɔ yayokambema olimu lo yoho ya lânde.
8. Wetshelo akɔna wakondjaso oma lo kɛnɛ kakasale etshumanelo kɛmɔtshi?
8 Lo etshumanelo kɛmɔtshi, dikumanyi wakatatɛ keketsha anto dia vɔ kamba oko ambatshi mboka wa tshanda ngɔndɔ efula la ntondo. Lomingu tshɛ wakewoyaka etshumanelo lofulo la apandjudi lambetawɔma dia kamba oko ambatshi mboka wa tshanda. Dui sɔ diakashikikɛka wanɛ wakalangaka pamia esambishelo kawɔ dia vɔ mbeya dia wekɔ la anto efula wakoka sambisha la wɔ. Vɔ wakalɔngɔsɔla dia salaka nsanganya nkina y’otsha l’olimu w’esambishelo la pindju ka pɛ ndo la dikɔlɔ. Etombelo waki la dui sɔ ele, apandjudi 53 wakakambe oko ambatshi mboka wa tshanda lo Ngɔndɔ ka nɛi, mbuta ate suke la kahende ɔtɔi ka etshumanelo!
9. Lande na kele nshi ya Eohwelo ekɔ etena ka dimɛna efula dia wanɛ wambokotsha kɛnɛ kalɔmbama tatɛ sambisha lokumu l’ɔlɔlɔ?
9 Tokimanyiya anto akina dia vɔ sambisha: Etena kakotsha eyoyo ndo akɛnda kɛnɛ kalɔmbama dia monga apandjudi, vɔ mbeyaka nɔmbama dia sambisha kâmɛ la apandjudi wambohokɔ akambo. Vɔ kokaka kondja diaaso dia ngasɔ lo nshi ya Eohwelo, etena kayohamia anto efula wa l’etshumanelo olimu awɔ w’esambishelo. Onde wɛ ekɔ la ombeki wa Bible ɔmɔtshi watahame wambɔtɔnganyiya lɔsɛnɔ lande la atɔndɔ waki Jehowa wosembwe? Onde wɛ ekɔ la ana wele la lɔkɛwɔ l’ɔlɔlɔ ndo watahame dimɛna koko watakome apandjudi? Naka vɔ wambota dia vɔ nangaka koma apandjudi wahatabatizama ndo wɛ ambɛna dia vɔ kotshaka kɛnɛ kalɔmbama, kete ewoya dikumanyi. Omendji walɔmbɔla ayosala woho wa dikumanyi pende sawola dikambo sɔ vɔ la yɛ ndo la ɔnayɛ kana la ombeki ayɛ.
10. Kakɔna kakoka dikumanyi sala dia kimanyiya wanɛ wahayosambisha?
10 Ngɔndɔ yayaye ayonga nto etena ka dimɛna efula le wanɛ wahayosambisha dia vɔ tatɛ sambisha nto kâmɛ la etshumanelo. Emendji wa Wekelo wa dibuku wa l’etshumanelo ndo dikumanyi dikina pombaka mbidja welo w’efula dia membola anto asɔ ndo mbaelɛ la wangasanu tshɛ dia vɔ mbatshindɛ l’esambishelo. Naka aya edja efula kahawayosambisha, kete dikumanyi pende pombaka sawola la wɔ ntondo dia shikikɛ kana vɔ kotshaka kɛnɛ kalɔmbama dia tatɛ sambisha nto.—km 11/00 lɛkɛ 3.
11. Ele djembetelo yoleki woke ya “ngandji ka mamba ka [Nzambi]?”
11 Toyalɔngɔsɔlɛ dikambo dia Eohwelo: Tshungo ekɔ djembetelo yoleki woke ya “ngandji ka mamba ka [Nzambi].” (Etsha 20:24) Miliyɔ y’anto wa l’andja w’otondo wele la lowando lo dui sɔ wayosangana Lushi la samalo, Ngɔndɔ ka sato 22 l’ɔkɔngɔ wa ɛɔtwɛlɔ ka wonya dia sala Eohwelo ka nyɔi ka Kristo. Sho nangaka mbelɛ ndo kimanyiya anto tshɛ wele l’etema w’ɛlɔlɔ dia vɔ ndjɔtɔ lo losanganya l’ohomba lɔsɔ lɛnya ngandji ka mamba kaki Jehowa otsha le anto.
12. Waa na wahombaso mbelɛ lo Eohwelo?
12 Sala listɛ la anto wayoyelɛ. Aha la tâmu, lo listɛ lɔsɔ wɛ ayodja nkombo ya ewotɔ ayɛ, asukanyi ayɛ, asekayɛ wa l’olimu kana wa la kalasa, wanɛ wakekaka la yɛ Bible ntondo kana wanɛ weka layɛ Bible kakianɛ, ndo wanɛ tshɛ watoyembolaka tena la tena. Naka onto ɔmɔtshi lamboyelɛ ekɔ la ambola wendana la Eohwelo, kete awui wele l’okotsha wendana la Dambo dia dikɔlɔ dia Nkumadiɔndjɔ wele lo dibuku Bible etshatɔ lɛkɛ 206-208 mbeyaka kokimanyiya lo dikambo sɔ. Dui sɔ mbeyaka kokimanyiya dia wɛ tatɛ mbeka l’onto Bible lam’ele diɔ diayokosha diaaso dia mbɔtshiya okanda watotekaka la anto Bible.
13. Ngande wakatshɔkɔla Jehowa welo wakadje apandjudi ahende wakayashikikɛ dia mbelɛ anto akina oya lo Eohwelo?
13 Kadiyɛso kɛmɔtshi akasale listɛ la nkumbo 48 yakandahombe mbelɛ. Etena kakandawaelɛka, nde akadimolaka nkombo ya nkumbo yambondelɛ ndo akafundaka datɛ diambondowaelɛ. Ande ɔngɛnɔngɛnɔ waki lande etena kakandɛnyi anto 26 l’atei wa wanɛ wakandelɛ wamboya lo Eohwelo lee! Ɔnangɛso ɔmɔtshi laki la makashinyi ɔmɔtshi akelɛ ose olimu ande ɔmɔtshi laki ntondo osasɛrdɔsɛ. Pami kakɔ akɔtɔ lo losanganya lakɔ ndo l’ɔkɔngɔ diko nde akate la diambo tshɛ ate: “Lakeke akambo efula wa lo Bible lo wonya ɔtɔi wa tango oleki kɛnɛ kakameke lo ɛnɔnyi 30 wakimi laka Mupɛ.” Yema tshitshɛ l’ɔkɔngɔ wa Eohwelo, nde aketawɔ mbeka lo dibuku Bible etshatɔ.
14. Esambishelo ka lânde kakɔna kayosalema l’andja w’otondo tatɛ lo Ngɔndɔ ka sato 1?
14 Esambishelo ka lânde: Tatɛ oma lo Lushi la samalo, Ngɔndɔ sato 1 polo Ngɔndɔ ka sato 22, tayokahanya akatshi wa leeta la lânde lendana la Eohwelo l’andja w’otondo. Apandjudi tshɛ wayokombola mbisha lonya lo yɛdikɔ y’efula lo esambishelo ka lânde k’ohomba kɛsɔ. Ndeka dimɛna mbisha ompokami dikatshi diande dia leeta l’anya lo dihole dia ditshika la soko. Koko, naka nyekɔ la ɛtshi ka nkɛtɛ ka woke, kete dikumanyi kokaka shikikɛ dia kana kokaka tshika akatshi wa leeta la yewo tshɛ lo mvudu yele anto bu lawɔ. Lo waa wikɛndɛ, tayoshaka anto ndo periodikɛ yeke ka tomba.
15. Kakɔna kakokaso mbuta etena kashaso onto ɔmɔtshi dikatshi dia leeta lendana la Eohwelo?
15 Lam’ele sho bu la nshi efula ya kahanya akatshi wa leeta asɔ, ayoleka dimɛna salaka mbɔtwɛlɔ ka lo tshena pe. Sawola la onto la lɔngɛnyi tshɛ ndo la wangasanu. Wɛ kokaka mbuta nganɛ: “Sho nangaka shikikɛ dia wɛ, ase nkumbo kayɛ ndo angɛnyi ayɛ nyambelamɛ lo dikambo di’ohomba diayosalema Ngɔndɔ ka sato 22. Dikatshi diayɛ dia leeta diɔ nɛ. Awui wayosalema lɛkɔ fundama lo dikatshi dia leeta nɛ.” Ompokami mbeyaka mboka ambola, kana nde mbeyaka nongola dikatshi dia leeta ndo mbuta dia nde ayoya. Funda lokombo l’onto lɛnyisha nsaki ndo yalɔngɔsɔla dia kalola dia towenda.
16. Dui diakɔna diakasalema diɛnya ohomba wa esambishelo ka mbelɛ anto wa l’ɛtshi kaso ka nkɛtɛ oya lo Eohwelo?
16 Ɔnɔnyi wetshi, ɔsɔlayi ɔmɔtshi akatane dikatshi dia leeta lendana la Eohwelo la soko diande. Nde akɔshi yɛdikɔ ya mbɔtɔ lo losanganya lɔsɔ koko nde akahombe nɔmba dikimɔ oma le owandji ande. Etena kakandɛnya owandji ande dikatshi dia leeta, owandji ande ɔsɔ akɔlama ki ko oma lâsɔ nde akate dia ambutshi ande wekɔ Ɛmɛnyi wa Jehowa ndo nde akatshɔka lo nsanganya kâmɛ lawɔ. Owandji ande kokomɛ tsho lo mbosha lotshungɔ, koko nde akatshu ndo la nde lo Eohwelo!
17. Ngande wɛnyaso dia hatɔshi ngandji ka mamba kaki Nzambi oko ɛngɔ ka anyanya?
17 Tɛnya lowando: Oko wayasukana nshi ya Eohwelo ka lo 2008, onto l’onto akane yimba lo ngandji ka mamba kakatoke Jehowa. Ɔpɔstɔlɔ Paulo akafunde ate: “Tambunyosengasenga shati: Tanyulungulaki ngandji ka mamba ka [Nzambi] anyanya.” (2 Kor. 6:1) Ngande wɛnyaso dia hatɔshi ngandji ka mamba kaki Nzambi oko ɛngɔ ka anyanya? Paulo akafunde ate: “Keli lu akambu tshe, shu tatuyaenyaka uku ekambi wa [Nzambi].” (2 Kor. 6:4) Ɔnkɔnɛ, sho mɛnyaka lowando laso lo woshasha wakatosha Jehowa lo monga la lɔkɛwɔ l’ɔlɔlɔ ndo lo sambishaka lokumu l’ɔlɔlɔ l’ohetoheto. Lo nshi ya Eohwelo tayonga la diaaso dia dimɛna efula dia pamia olimu aso w’esambishelo lo sambisha lokumu l’ɔlɔlɔ dimɛna dimɛna.
[Kiombo ya lo lɛkɛ 3]
Waa na wakoka kamba oko ambatshi mboka wa tshanda?
◼ Ase nkumbo
◼ Wanɛ wakamba elimu wawaɔsɛ wenya efula
◼ Esombe ndo wanɛ wele la dikɔmɔ
◼ Wanɛ wakɔtɔ kalasa
[Kiombo ya lo lɛkɛ 4]
Etena kakahanyayɛ akatshi wa leeta lendana la Eohwelo:
◼ Tɛkɛta lo tshena pe ndo onga la wangasanu
◼ Funda nkombo ya wanɛ wɛnya nsaki ndo kalola dia towaenda
◼ Shaka anto ndo periodikɛ lo wikɛndɛ