Ɔtɛkɛta wa Nzambi Wekɔ Mɛtɛ

1. Akambo akɔna w’ohomba wele lo Bible?

¹ Omembi w’esambo akafunde ate: ‘Ɔtɛkɛta ayɛ wekɔ mɛtɛ.’ (Osam. 119:160) L’Ɔtɛkɛta ande wakasambiyama, Jehowa mbishaka ekadimwelo w’amɛna lo wembola w’ohomba efula wa lo lɔsɛnɔ. Nde keketshaka ndo mbishaka wanɛ wasowa elongamelo. Ndo nde tɛnyaka woho wakokaso sukana la nde. Womoto ɔmɔtshi laki la lowando akate ate: “Mbeka akambo wa mɛtɛ wele lo Bible ekɔ oko onto lambomɔ oma lo dihole dia wodjima wa tshududu ko ambɔtɔ lo luudu lele l’osase ngamû, ndo l’ɔngɛnɔngɛnɔ.” Onde wɛ salaka la wolo dia mbewoya anto akina akambo wa mɛtɛ w’oma l’Ɔtɛkɛta wa Nzambi lo diaaso tshɛ dia tanema?

2. Ngande walɔngɔsɔla Bible nsɛnɔ y’anto?

² Wolo Wele la Bible wa Kadimola Anto ndo Dikoka Diatɔ dia Kutola Anto wa l’Andja w’Otondo: Akambo wa mɛtɛ wele lo Bible wekɔ la wolo wa minanda etema w’anto ndo tshikitanya nsɛnɔ yawɔ. (Heb. 4:12) Osekaseka ɔmɔtshi wakawelɛka Rosa akayashaka l’akambo wa monanyi, l’ɔnwɛlɔ wa wanu ndo wa nɔnɔ dia wolo. Nde akate ate: “Lushi lɔmɔtshi, etena kakimi handjeya kɛnɛ kasala mbut’ate ewo ambokomɛ, atshukanyi amɔtshi w’Ɛmɛnyi wa Jehowa wakambutɛ woho wakoka Bible tokimanyiya dia kandola ekakatanu wele laso. Dimi lakatatɛ mbeka Ɔtɛkɛta wa Nzambi, ndo lak’ɔngɛnangɛna efula. L’ɔkɔngɔ wa ngɔndɔ ɔtɔi dimi lakakondja wolo wa tshikitanya lɔsɛnɔ lami, ndo ndɔta lonto l’oyoyo. Ɛlɔ kɛnɛ kayami l’oyango lo lɔsɛnɔ, dimi handjoyanga ekimanyielo oma lo wanu kana oma lo nɔnɔ dia wolo. Ndo oko wakamalange efula monga ɔngɛnyi waki Jehowa, dimi lakayashikikɛ dia sɛna lo yoho yɔtɔnɛ l’ɛlɛmbɛ ande. Otondonga dimi kokondja lomba l’oshika l’oma l’Ɔtɛkɛta wa Nzambi, tshike mɛtɛ lamboshilaka ndjadiaka.”​—⁠Osam. 119:⁠92.

3. Landena kahatahombe tshika dia mbewoya anto akina losango l’oma lo Bible?

³ Otshikitanyi l’abuku efula ɛlɔ kɛnɛ, Bible mendanaka l’anto wa lo “wedja tshe, ndu uma lu wauhu tshe ndu uma lu wehu w’antu tshe, ndu w’eteketa tshe.” (Eny. 7:⁠9) Lolango la Nzambi ele dia “antu tshe nshimbamela ndu nkuma lu ewu ka mete.” (1 Tim. 2:⁠4) Ɔnkɔnɛ, hatohombe pondjo fɔnya di’onto ayotona lokumu l’ɔlɔlɔ l’ɔtɛ wa dioho diande kana wa dihole diakandôle. Koko tewoyake anto tshɛ losango la Diolelo, lo kamba la Bible mbala kakɔ ɔtɔi naka kokaka.

4. Ngande wakokaso kamba la Bible etena kasambishaso?

⁴ Toke Epole Ɔsɛkɛ l’Afundelo: Tekɔ la waaso efula wa kamba la Bible l’olimu w’esambishelo. Etena kashaso onto periodikɛ, towadiyake divɛsa diele l’alako wa woho wa mbisha anto periodikɛ washama ngɔndɔ tshɛ. Etena kashawɔ anto ekanda walɔmbama dia kahɛ anto lo ngɔndɔ la ngɔndɔ, apandjudi amɔtshi mɛnaka dimɛna mbɔtshiya sawo lo mbadia divɛsa dimɔtshi diakawalɔngɔsɔdi dimɛna. Etena kakalolaso tembola onto, sho pombaka mbowadiyaka divɛsa ɔtɔi kana ahende lushi tshɛ dia mbokimanyiya dia nde tâkondjaka yema yema ewo ka mɛtɛ. Etena kalɔmbɔlaso wekelo wa Bible, sho pombaka mbidja dikako vɔlɛ l’avɛsa w’oleki ohomba. Oyadi kânga hatotombi l’olimu w’esambishelo, sho pombaka mongaka la Bible wonya tshɛ dia sho sambisha lo tshakitudi lo waaso tshɛ wakondjaso.​—⁠2 Tim. 2:⁠15.

5. Landena kahombaso sala la wolo dia kambaka la Bible l’olimu aso w’esambishelo?

⁵ Nyɛsɔ tokimanyiya anto akina dia vɔ kondja wahɔ oma lo wolo wa keketsha w’akambo wa mɛtɛ wa l’Ɔtɛkɛta wa Nzambi lo kambaka la Bible lo diaaso tshɛ l’olimu w’esambishelo.​—⁠1 Tes. 2:⁠13.