Tokoya Ɔlɔlɔ wa Jehowa
1 L’ɔkɔngɔ wa sho menda asango w’amɛna watongaka l’olongo wonya w’ɛɔtwɛlɔ ka wonya kana l’ɔkɔngɔ wa ndɛ diangɔ di’ɔlɔlɔ, onde hatotshutshuyama dia mbisha Jehowa losaka, nde lele Kiɔkɔ ya diangɔ tshɛ di’ɔlɔlɔ? Ɔlɔlɔ ande totshutshuyaka dia nanga mbôkoya. (Osam. 119:66, 68; Ef. 5:1) Ngande wakokaso kɛnɛmɔla dionga sɔ na?
2 Otsha le Wanɛ Wele Bu Ambetawudi: Yoho mɔtshi yakokaso mbokoya ɔlɔlɔ wa Jehowa ele lo ndjakiyanya l’otema ɔtɔi dikambo dia wanɛ wele bu la so mbetawɔ ɔtɔi. (Ngal. 6:10) Mɛnya ɔlɔlɔ lo toho ta shikaa koka monga l’etombelo w’ɔlɔlɔ lo woho wɔsawɔ Ɛmɛnyi wa Jehowa ndo losango lasambishawɔ.
3 Oko ɛnyɛlɔ, lam’akawadjasɛ lo dihole diatokongɛka ase hemɔ dɔkɔtɛlɛ lo lupitadi lɔmɔtshi, ombatshi mboka ɔmɔtshi w’ɔlɔngɔlɔngɔ akadjasɛ suke l’osombe ɔmɔtshi wa womoto wakɛnamaka dia nde aki la hemɔ wolo ndeka anto akina efula wakakongɛka dɔkɔtɛlɛ. Lam’akakoke etena kande ka tɛnana la dɔkɔtɛlɛ, nde akalɔmbɛ womoto ɔsɔ dia mbɔtɔ lo dihole dia nde. L’ɔkɔngɔ diko, ombatshi mboka akatohomanaka la womoto ɔsɔ nto lo lobingu, ndo womoto akɔ aki l’ɔngɛnɔngɛnɔ efula dia mbɛna. Kânga mbele ntondo nde kombetawɔka lokumu l’ɔlɔlɔ la Diolelo, nde akate dia kakianɛ nde ambeya di’Ɛmɛnyi wa Jehowa nangaka mɛtɛ anyawɔ anto. Ɔnangɛso ɔsɔ akamɛ mbeka Bible mbala la mbala la womoto ɔsɔ.
4 Otsha le Anangɛso l’Akadiyɛso: Sho mbokoyaka nto ɔlɔlɔ wa Jehowa lam’asalaso la wolo dia kimanyiya anyaso ambetawudi. Lam’atomba mpokoso kɛmɔtshi, sho mongaka l’atei w’anto wa ntondo waya dia ndjâkimanyiya. Sho mɛnyaka dionga diakɔ diâmɛ lam’akimanyiyaso wanɛ wele l’ohomba w’ekimanyielo dia ntshɔ otsha lo nsanganya, lam’embolaso wanɛ wele la dikɔmɔ, ndo lam’ɛnyaso ngandji kaso otsha le as’etshumanelo wele hatowaeye dimɛna.—2 Kor. 6:11-13; Heb. 13:16.
5 Yoho kina yɛnya Jehowa ɔlɔlɔ ande ele lo ‘monga suke dia dimanyiya.’ (Osam. 86:5) Lo mbôkoya, sho koka mɛnya woho walangaso dionga sɔ di’ɔlɔlɔ lo dimanyiya anto akina. (Ef. 4:32) Dui sɔ tokimanyiyaka dia mbetɛ diɔtɔnganelo dia lam’asaso l’asekaso ambetawudi diɔtɔnganelo ‘di’ɔlɔlɔ ndo di’ɔngɛnɔngɛnɔ.’—Osam. 133:1-3.
6 Ɔlɔlɔ w’efula waki Jehowa watotshutshuya dia mbôtombola l’ɔngɛnɔngɛnɔ. Ndo watotshutshuya dia sho mbokoya dionga diande sɔ lo kɛnɛ tshɛ kasalaso.—Osam. 145:7; Jer. 31:12.