Jehowa kele ɛnyɛlɔ koleki tshɛ lo kɛnɛ kendana l’ɔlɔlɔ
‘Totombole Jehowa kanga lolembelembe, nɛ dia Jehowa ekɔ ɔlɔlɔ!’—JEREMIYA 33:11.
1. Bonde katshutshuyamaso dia tombola Nzambi l’ɔtɛ w’ɔlɔlɔ ande?
JEHOWA NZAMBI ekɔ ɔlɔlɔ lo yoho ya kokele. Omvutshi Zɛkariya akate ate: “Ndi wuki weli ololo andi li!” (Zekariya 9:17) Lo mɛtɛ, ɔlɔlɔ waki Nzambi mɛnamaka oma lo diangɔ tshɛ diakandatonge la nkɛtɛ dia ɔngɛnɔngɛnɔ aso. (Etatelu 1:31) Sho hatokokaki pondjo monga l’akoka wa mbeya ɛlɛmbɛ tshɛ w’ohokosanu wakakambe la Nzambi lam’akandatonge andja. (Undaki 3:11; 8:17) Koko yema tshitshɛ yeyaso totshutshuyaka dia tombola Nzambi l’ɔtɛ w’ɔlɔlɔ ande.
2. Ngande wakokayɛ nembetshiya ɔlɔlɔ?
2 Ɔlɔlɔ kɛdikɛdi na? Ɔlɔlɔ kɛdikɛdi lɔkɛwɔ la dimɛna efula, kana dionga dia salaka kɛnɛ kele kawɔ. Eelo, ɔlɔlɔ halembetshiya tsho tshika dia sala kɛnɛ tshɛ kele kɔlɔ. Oko wewɔ olowa ɔmɔtshi wa nyuma, ɔlɔlɔ ekɔ dionga diatoma onto dia salaka kɛnɛ kele kawɔ ndo kele la wahɔ. (Ngalatiya 5:22, 23) Sho kɛnɛmɔlaka dionga sɔ lam’asalɛso anto akina akambo w’amɛna ndo wele la wahɔ. L’andja ɔnɛ, kɛnɛ kɔsama oko ɔlɔlɔ le anto amɔtshi mbeyaka mɛnama oko kɔlɔ le anto akina. Koko, dia sho monga la ki ndo l’ɔngɛnɔngɛnɔ, ɔlɛmbɛ ɔmɔtshi wendana l’akambo w’ɔlɔlɔ pombaka monga. Ele la lotshungɔ la mbidja ɔlɛmbɛ ɔsɔ na?
3. Kakɔna kata Etatelu 2:16, 17 dikambo di’ɔlɛmbɛ wendana la ɔlɔlɔ?
3 Nzambi mbakadje ɔlɛmbɛ wendana la ɔlɔlɔ. L’etatelo k’ɔkɔndɔ w’anto, Jehowa akadjangɛ pami ka ntondo ate: “Olekaki elua w’etamba tshe wa l’ekambo uku alangaye. Keli, tolekaki elua w’uma l’utamba wa ewu k’akambu w’ololo ndu k’akambu wa kolo, ne dia lushi layuyole, we ayuvo.” (Etatelu 2:16, 17) Eelo, anto pombaka nyanga ɛlɔmbwɛlɔ oma le Otungi awɔ dia mbeya kɛnɛ kele ɔlɔlɔ la kɔlɔ.
Yoho ya mamba ya mɛnya ɔlɔlɔ
4. Kakɔna kakasalɛ Nzambi anto kânga mbakasale Adama pɛkato?
4 Elongamelo k’anto ka monga la lɔsɛnɔ la kokele ndo l’ɔngɛnɔngɛnɔ pondjo pondjo kakɔtɔ lo wâle lam’akasale Adama pɛkato ndo wakandatone dia mbetawɔ lotshungɔ lele la Nzambi la shikikɛ ɛlɛmbɛ wendana la ɔlɔlɔ. (Etatelu 3:1-6) Koko, la ntondo k’ana w’Adama ndjôtɔ oko anto wakashile kita pɛkato la nyɔi, Nzambi akatɛkɛta dikambo di’oyelo wa Lɔtɔngɔ la kokele. Diakɔ diele, lam’akandatɛkɛtaka l’‘olui w’edjedja,’ Satana Diabolo, Jehowa akate ate: ‘Layodja lohetsho lam’asayɛ la womoto ndo lam’asa lɔtɔngɔ layɛ la lɔtɔngɔ lande. Nde ayokominola l’ɔtɛ ndo wɛ ayowolumata lo tshindji.’ (Enyelo 12:9; Etatelu 3:15) Lolango laki Jehowa aki dia tshungola anto wa kɔlɔ. Lo mɛnya ɔlɔlɔ ande lo yoho ya mamba, Jehowa akɔshi yɛdikɔ dia wanɛ tshɛ wayetawɔ olambo wa tshungo w’Ɔnande la ngandji kondja panda.—Mateu 20:28; Romo 5:8, 12.
5. Kanga mbakatakite otema wɛngami otsha lo tokanyi ta kɔlɔ, lande na kakokaso sala ɔlɔlɔ lo yɛdikɔ mɔtshi?
5 Lo mɛtɛ, oma lo pɛkato k’Adama, sho tshɛ takakite otema wɛngami otsha lo tokanyi ta kɔlɔ. (Etatelo 8:21) Koko, diɛsɛ ko, Jehowa tokimanyiyaka dia sala ɔlɔlɔ lo yɛdikɔ mɔtshi. Tetemala lo akambo wakateke oma l’efundelo ande w’ekila w’oshinga wolo, ‘hatokonya tsho akanga wa tomba wahomba kondja panda’ kana ‘tolowanya tsho dia tshaka akambo tshɛ w’ɔlɔlɔ’ koko vɔ tokimanyiyaka nto dia sala kɛnɛ kele ɔlɔlɔ lo washo wa Nzambi. (2 Timote 3:14-17) Ɔnkɔnɛ, dia sho kondja wahɔ oma lo wetshelo w’oma l’Afundelo ndo dia salaka ɔlɔlɔ, sho pombaka monga la yimba yele oko nyɛ yaki l’omembi w’esambo lakembe ate: “We keli ololo ndu katushaka ololo; umbetsha elembe aye.”—Osambu 119:68.
Ɔlɔlɔ wa Jehowa wekɔ lo tambwama
6. L’ɔkɔngɔ wa Nkumekanga Davidi mbela ɔshɛtɛ wa sheke la Jerusalɛma, ase Lɛwi wakembe osambo waki l’ɛtɛkɛta akɔna?
6 Davidi, nkumekanga k’Isariyɛlɛ w’edjedja akeye ɔlɔlɔ waki Nzambi ndo akayange ɛlɔmbwɛlɔ Kande. Nde akate ate: “[Jehowa] eko ololo ndu uluwanyi, diako mbatundenyaka antu wa kolo mbuka.” (Osambu 25:8) Wetshelo wakasha Nzambi ase Isariyɛlɛ kamɛ ndo ɛlɛmbɛ dikumi w’ohomba, mbut’ate Ɛlɛmbɛ Dikumi wakafundama lo pase di’ave dihende ndo wakakitshamaka lo shɛtɛshɛtɛ y’ekila yakawelɛka ɔshɛtɛ wa sheke. L’ɔkɔngɔ wa Davidi mbela Ɔshɛtɛ ɔsɔ la Jɛrusalɛma, kapitalɛ k’Isariyɛlɛ, ase Lɛwi wakembe osambo waki l’ɛtɛkɛta ɛnɛ: “Nyuki [Jehowa] lusaka, ne dia ndi eli ololo, ne dia ngandji kandi ka mamba katuyalaka pundju.” (1 Ekondo 16:34, 37-41) Aki mɛtɛ ɔlɔ efula dia mboka ɛtɛkɛta ɛsɔ oma l’ɛlɔmɔ w’amembi w’ase Lɛwi!
7. Kakɔna kakatombe l’ɔkɔngɔ wa Ɔshɛtɛ wa Sheke kitshama lo Dihole Dioleki Ekila ndo l’ɔkɔngɔ wa Sɔlɔmɔna shidiya dɔmbɛlɔ diande di’osapwelo na?
7 Ɛtɛkɛta akɔ wamɛ wa lotombo mbakaleke membama lam’akawasapola tɛmpɛlɔ ka Jehowa kakakisha Sɔlɔmɔna k’ɔnaki Davidi. L’ɔkɔngɔ w’ɔshɛtɛ wa sheke kitshama lo Dihole Dioleki Ekila dia lo tɛmpɛlɔ k’oyoyo kakawake, ase Lɛwi wakatatɛ tombola Jehowa wata vate: “Ndi eli ololo ne dia ngandji kande ka mamba katotshikalaka pundju.” Lo diaaso sɔ, lo dihindo, tɛmpɛlɔ kakalole la dinge diaki djembetelo ya eongelo ka lotombo la Jehowa. (2 Ekondo 5:13, 14) Lam’akashidiya Sɔlɔmɔna sala dɔmbɛlɔ di’osapwelo, “dja yakahulo uma l’ulungu, yakatshumbi ulambu wa lutshumba la elambu.” Lamakawɛnyi dikambo sɔ, “asi Isariyele tshe. . . wakakolama, wakatemola [Jehowa]. Vo wakawuki lusaka vate: ndi eli ololo ne dia ngandji kandi ka mamba katutshikalaka pundju.” (2 Ekondo 7:1-3) L’ɔkɔngɔ wa nshi 14 ya difɛstɔ, ase Isariyɛlɛ wakakalola lawakawɔ “wuludi too l’ongenongeno, ne dia ololo wakatshelaka [Jehowa] Davidi, Solomona la wudja andi Isariyele.”—2 Ekondo 7:10.
8, 9. (a) Kânga mbakatombolaka ase Isariyɛlɛ Jehowa lo menda ɔlɔlɔ ande, kakɔna kakawayokomɛka la sala? (b) Omvutshi Jeremiya akandatatshi lo dikambo dia Jerusalɛma ndo ngande wakayokotshama dikambo sɔ?
8 Lonyangu ko, ase Isariyɛlɛ kotetemala la nsɛna lo yoho yɔtɔnɛ l’esambo wa lotombo wakawembɛ Nzambi. L’edja ka wonya, ase Juda wakayokomaka dia ‘tombola Jehowa paka l’ɛlɔmɔ.’ (Isaya 29:13) Lo dihole dia vɔ kitanyiya ɛlɛmbɛ waki Nzambi wendana l’ɔlɔlɔ, vɔ wakatatɛ sala kɛnɛ kele kɔlɔ. Ko kɔlɔ yakɔna yakawasale na? Vɔ wakayasha l’ɔtɛmwɛlɔ wa dikishi, l’awui wa mindo wa dieyanelo, wakɛngiya ase wola, ndo wakasale pɛkato kina ya weke! Etombelo wa dikambo sɔ ko, l’ɔnɔnyi wa 607 N.T.D., Jerusalɛma akalanyema ndo ase Juda wakatɔlama lo lɔhɔmbɔ la Babilɔna.
9 Ɔsɔku mbakasha Nzambi ekambi ande dilanya. Koko lo tshimbo y’omvutshi Jeremiya, Nzambi akate dia la Jerusalɛma ayokɛma nto dui diata ate: “Nyuki [Jehowa] kanga lulimbilimbi lusaka, ne dia ndi eko ololo, ne dia ngandji kandi ka shikaa ntshikalaka pundju!” (Jeremiya 33:10, 11) Ndo dikambo sɔ diakasalema ngasɔ. L’ɔkɔngɔ w’ɛnɔnyi 70 waki wodja tɔngɔ to, atshikadi w’ase Juda wakakalola la Jerusalɛma l’ɔnɔnyi wa 537 N.T.D. (Jeremiya 25:11; Danyele 9:1, 2) Vɔ wakayohika nto elambwelo l’Okongo wa Mɔriya lanɛ waki tɛmpɛlɔ ntondo ndo wakatatɛ nambola elambo lawɔ. Ekelo ka tɛmpɛlɔ kakatatɛ ɛnɔnyi ehende l’ɔkɔngɔ w’okalwelo awɔ. Ɔsɔ mɛtɛ aki etena k’ɔngɛnɔngɛnɔ wa mamba! Ɛzɛra mbutaka ate “Lam’akahikaka ambiki etshina ka luudu la [Jehowa], vo wakakitsha elombedi wolotshi eloto [awɔ w’ɛlɔmbɛdi] kame la amama, la asi Lewi, asika Asafu kame la ekokoloko dia [tombo]laka [Jehowa] uku akadjanga Davidi, khum’ekanga k’Isariyele. Vo waketshanyaka lu esambu dia mandula la mbuka [Jehowa] lusaka, vati: Ndi eli ololo la ngandji kandi ka mamba katuyalaka pundju le Isariyele!”—Ezera 3:1-11.
10. Osambu 118 tatɛka ndo komɛka l’ɛtɛkɛta akɔna w’ohomba?
10 Ɛtɛkɛta wa woho akɔ wamɛ washa Jehowa lotombo tanemaka l’esambo efula. L’atei w’esambo akɔ mbele nd’Osambu 118 wakembe ana w’ase Isriyɛlɛ dia komiya difɛstɔ dia Pasaka. Osambo ɔsɔ tatɛka ndo komɛka l’ɛtɛkɛta ɛnɛ: “Nyukaki [Jehowa] lusaka ne dia ndi eko ololo, ne dia ngandji kandi ka shikaa katutshikalaka pundju.” (Osambu 118:1, 29) Ondo ɔsɔ mbaki ɛtɛkɛta w’ekomelo wa lotombo wakembe Yeso Kristo nde l’apɔstɔlɔ ande wa kɔlamelo l’otsho wa la ntondo ka nde mvɔ l’ɔnɔnyi wa 33 T.D.—Mateu 26:30.
“Omenya lutumbu laye”
11, 12. Lam’akɛnyi Mɔsɛ yema tshitshɛ tsho ya lotombo laki Nzambi, ɛtɛkɛta akɔna wakandoke?
11 Diɔtɔnganelo diele lam’asa ɔlɔlɔ wa Jehowa ndo ngandji kande ka shikaa diakashile mɛnyama edja efula la ntondo ka nshi y’Ɛzɛra. Yema tshitshɛ l’ɔkɔngɔ w’ase Isariyɛlɛ tɛmɔla y’ana ya ngɔmbɛ l’oswe ndo wa wanɛ wakatshe kɔlɔ ndjakema, Mɔsɛ akalɔmbɛ Jehowa ate: “Omenya lutumbu laye.” Oko wakandeyaka dia Mɔsɛ takandakoke mɛna elongi Kande ko nde tshikala la lɔsɛnɔ, Jehowa akate ate: “Dimi layetsha ololo ami tshe la ntundu kaye.”—Etumbelu 33:13-20.
12 La wedi a pindju Mɔsɛ akɛnyi ɔlɔlɔ wa Jehowa l’Okongo wa Sinai. L’etena kɛsɔ Mɔsɛ akɛnyi lotombo laki Nzambi yema tshitshɛ tsho ndo akoke ɛtɛkɛta ɛnɛ: “[“Jehowa, Jehowa, Nzambi ka,” NW] ketshi ndu ngandji ka mamba, lahuki kele esadi, luludi too la ngandji ka mamba la [“mɛtɛ, longa l’ɔlɔlɔ w’efula otsha le,” NW], antu nunu la nunu, latudimanyiaka [“munga,” NW] uhedia, la [“pɛkato” NW]. Keli ndi huyindja kanga unungu nduku yema, ndi atosomboyaka wengiya a washi le an’awo, ndu le ekana awo, edja ndu lolonga la satu kana lolonga la nei.” (Etumbelu 34:6, 7) Ɛtɛkɛta ɛsɔ mɛnyaka dia ɔlɔlɔ wa Jehowa kakatana la ngandji kande ka shikaa ndo la toho tokina ta lonto lakinde. Naka sho sɛdingola akambo asɔ, kete sho lawɔ tayonga la dionga sɔ dielɛwɔ ɔlɔlɔ. Nyɛsɔ tɔsɛdingole ntondo dionga diofundami mbala hiende y’etondo l’ɛtɛkɛta wa diambo wendana la ɔlɔlɔ wa Nzambi.
“[Nzambi] . . . kuludi too la ngandji ka mamba”
13. Lo ɛtɛkɛta wendana la ɔlɔlɔ wa Nzambi, dionga diakɔna diɔtɛkɛtami mbala hiende y’etondo ndo lande na kele dikambo sɔ sunganaka?
13 “[Jehowa ekɔ] Nzambi . . . kuludi too la ngandji ka mamba . . . , [“longa l’ɔlɔlɔ w’efula otsha le,” NW] antu nunu la nunu.” Tshɛkɛta ya lo Hɛbɛru yakadimwama ɔnɛ “ngandji ka mamba” nembetshiyaka nto “ngandji ka kɔlamelo.” Paka dionga sɔ to mbɔtɛkɛtami mbala hiende y’etondo l’ɛtɛkɛta waki Nzambi otsha le Mɔsɛ. Sunganaka mɛtɛ monga ngasɔ nɛ dia dionga diaki Jehowa dioleki woke ko ngandji! (1 Joani 4:8) Ɛtɛkɛta weyama efula wa tombola Jehowa wata ɔnɛ “ne dia ndi eli ololo, ne dia ngandji kandi ka mamba katutshikalaka pundju” mbikaka epole ɔsɛkɛ lo dionga sɔ.
14. Wâna waleka ngɛnangɛna la ɔlɔlɔ wa Nzambi ndo la ngandji kande ka shikaa?
14 Yoho mɔtshi yɛnama ɔlɔlɔ wa Nzambi ele nɛ dia nde “ndula too la ngandji ka mamba.” Kɛsɔ ndekaka mɛnama lo woho wakokɛnde ekambi ande wa kɔlamelo la ngandji tshɛ. (1 Petero 5:6, 7) Oko wakoka Ɛmɛnyi wa Jehowa mɛnya dikambo sɔ, nde mɛnyaka “ngandji ka shikaa” le wanɛ wolanga ndo wokambɛ. (Etumbelu 20:6) Ase Isariyɛlɛ wa l’emunyi kotetemala mbokama ngandji ka shikaa kana ngandji ka kɔlamelo oma le Nzambi nɛ dia vɔ kombetawɔ Ɔnande. Koko ɔlɔlɔ wa Nzambi ndo ngandji kande ka kɔlamelo otsha le Akristo wa kɔlamelo wa lo wedja tshɛ ayotshikalaka pondjo.—Joani 3:36.
Jehowa ekɔ Nzambi ka nkɛtshi ndo ka ngandji ka mamba
15. (a) Awui wakoke Mɔsɛ l’Okongo wa Sinai tatɛka l’ɛtɛkɛta akɔna? (b) Mboka anto kɛtshi kɛdikɛdi na?
15 Awui wakoke Mɔsɛ l’Okongo wa Sinai tatɛka l’ɛtɛkɛta ɛnɛ: “[Jehowa, Jehowa, Nzambi ka] ketshi ndu ngandji ka mamba.” Tshɛkɛta ya lo Hɛbɛru yokadimwami ɔnɛ “ketshi” mbeyaka mendana l’“ɛsɔhi” ndo yɔ kakatana la tshɛkɛta “dioto dia womoto.” Lâsɔ kɛtshi mendanaka la kandji k’efula koka onto oma k’ɛse otema. Koko kɛtshi halembetshiya tsho tɛtɛ solo. Tɔ pombaka totshutshuya dia sala dikambo dimɔtshi dia shidiya pâ yele l’anto akina. Oko ɛnyɛlɔ, dikumanyi di’Akristo diele la ngandji mongaka anto wele la kɛtshi otsha le asekawɔ ambetawodi, ‘lo mɛnya kɛtshi l’ɔngɛnɔngɛnɔ’ l’etena kasungana akambo asɔ.—Romo 12:8; Jakoba 2:13; Jude 22, 23.
16. Lande na kakokaso mbuta dia Jehowa ekɔ la ngandji ka mamba?
16 Ɔlɔlɔ wa Nzambi mɛnamaka nto oma lo ngandji kande ka mamba. Onto lele la ngandji “ndjakiyanyaka dikambo dia nsaki y’anto akina” ndo salaka la wolo dia mɛnya ‘ngandji ka mɛtɛ djekoleko otsha le anto wele l’ɛse kande.’ Jehowa mbele ɛnyɛlɔ koleki tshɛ ka ngandji ka mamba lo woho wongande l’ekambi ande wa kɔlamelo. Ɛnyɛlɔ, oma lo tshimbo ya andjelo, Nzambi akakeketsha omvutshi w’osombe Danyɛlɛ la ngandji tshɛ ndo akewoya ɔna womoto l’emuma Mariya diɛsɛ diaki lande dia mbota Yeso. (Danyele 10:19; Luka 1:26-38) Oko weso ekambi wa Jehowa, sho ngɛnangɛnaka woho watɛkɛtande laso lo tshimbo ya Bible. Sho mbotombolaka lo yoho shɔ yatɛnyande ɔlɔlɔ ande ndo sho nyangaka dia monga la ngandji ndo ɔlɔlɔ otsha le anto akina. Etena kangola wanɛ wele l’akoka wa lo nyuma osekawɔ ombetawudi, “l’otema wa memakana,” vɔ nyangaka dia monga anto wele la memakana ndo la ngandji ka mamba.—Ngalatiya 6:1.
Nzambi kahoke nkɛlɛ esadi
17. Lande na keso l’ɔngɛnɔngɛnɔ lo woho wele Jehowa “huki kele esadi”?
17 “[Nzambi] . . . [k]ahuki kele esadi.” Ɛtɛkɛta ɛsɔ mɛnyaka yoho kina yɛnama ɔlɔlɔ waki Jehowa. La solo dia lotutsha, Jehowa mbikikɛka munga yaso ndo totshikɛka etena ka sho nɛndja wɛɔdu wa weke wele laso ndo ka sho pama lo nyuma. (Heberu 5:12–6:3; Jakoba 5:14, 15) Solo dia lotutsha diaki Nzambi diekɔ nto la wahɔ le wanɛ wele watakome atɛmɔdi ande. Vɔ wekekɔ l’etena ka mbetawɔ losango la Diolelo ndo ndjatshumoya. (Romo 2:4) Kânga mbele Jehowa la solo dia lotutsha, tena dimɔtshi ɔlɔlɔ ande mbotshutshuyaka dia nde mɛnya nkɛlɛ kande, oko wakandasale lam’akatɛmɔla ase Isariyɛlɛ yana ya ngɔmbɛ ya paonyi l’Okongo wa Sinai. Ndoko edja, Nzambi ayanga mɛnya nkɛlɛ kande lo yoho yoleki tshɛ etena kayangande la komiya dikongɛ di’akambo dia kɔlɔ diaki Satana.—Ezekiyele 38:19, 21-23.
18. Lo kɛnɛ kendana la mɛtɛ, otshikitanu akɔna wele lam’asa Jehowa l’ewandji w’ana w’anto?
18 ‘Jehowa [ekɔ] Nzambi . . . koludi tɔɔ la . . . mɛtɛ.’ Jehowa tshikitana efula mɛtɛ l’ewandji w’ana w’anto walaka alaka wa weke efula koko hawakotsha! Lo yoho yotshikitanyi, atɛmɔdi wa Jehowa ndjaɛkɛka l’akambo tshɛ wotami l’Ɔtɛkɛta ande wakasambiyama. Lam’ele Jehowa ndola la mɛtɛ, sho koka ndjaɛkɛka nshi tshɛ l’alaka ande. Oma l’ɔlɔlɔ ande, Shɛso lele l’olongo tokadimolaka tena tshɛ l’alɔmbɛlɔ wɔlɔmbaso dia nde toshaka akambo wa mɛtɛ wa lo nyuma tshavutshavu.—Osambu 43:3; 65:2.
19. Na yoho ya dimɛna yɛnya Jehowa ɔlɔlɔ ande le atshi wa pɛkato wayatshumoya?
19 “Jehowa [ekɔ] Nzambi . . . katodimanyiyaka munga, ohedia, la [“pɛkato,” NW].” Oma l’ɔlɔlɔ ande, Jehowa ekɔ suke dia nimanyiya atshi wa pɛkato wayatshumoya. Tekɔ mɛtɛ la lowando efula le Shɛso ka ngandji lele l’olongo l’ɔtɛ wakandalɔngɔsɔla woho w’anto kondjaka edimanyielo ka pɛkato diɛsɛ oma l’olambo wa tshungo waki Yeso. (1 Joani 2:1, 2) Lo mɛtɛ tekɔ l’ɔngɛnɔngɛnɔ lo woho ɔnɛ wele wanɛ tshɛ wele la mbetawɔ l’olambo wa tshungo, wayokoka monga la diɔtɔnganelo dia dimɛna la Jehowa, ndo l’elongamelo ka lɔsɛnɔ la pondjo l’andja w’oyoyo wakandalake. Ɔsɔ mɛtɛ ekɔ ɛkɔkɔ w’eshika wa tombola Jehowa lo woho wɛnyande ɔlɔlɔ ande le anto!—2 Petero 3:13.
20. Djembetelo yakɔna yele laso yɛnya ɔnɛ Nzambi hadihe washo l’akambo wa kɔlɔ?
20 “Keli [Jehowa] huyindja kanga unungu nduku yema.” Ɔsɔ ekɔ mɛtɛ ɔkɔkɔ okina wahombaso tombola Jehowa l’ɔtɛ w’ɔlɔlɔ ande. Lande na? Nɛ dia yoho ya dimɛna ya mɛnya ɔlɔlɔ ele aha diha washo lo weho w’akambo wa kɔlɔ tshɛ. Ndo nto, “lu enelo ka Khumadiondjo Jesu uma l’ulungu la andjelo andi a wulu lu lumbi la dja,” elanyelo kayoya le “wane waheyi [Nzambi], la wahakitanyia lukumu l’ololo.” Vɔ “wayunyema pundju.” (2 Tesalonika 1:6-9) Ekambi waki Jehowa wayɔngɛnangɛna lɔsɛnɔ lo yoho ya dimɛna efula hawotonga nto l’ofukutanu w’oma le anto wa kɔlɔ, wele “atunyi w’akambu w’ololo.”—2 Timote 3:1-3.
Tokoya ɔlɔlɔ wa Jehowa
21. Lande na kahombaso sala ɔlɔlɔ?
21 Aha la tâmu, tekɔ l’ɛkɔkɔ efula wa tombola ndo mboka Jehowa losaka l’ɔtɛ w’ɔlɔlɔ ande. Oko weso ekambi ande, onde hatohombe sala la wolo aso tshɛ dia sho lawɔ mɛnya dionga sɔ? Eelo, lo dikambo sɔ ɔpɔstɔlɔ Paulo akakeketsha asekande Akristo ate: “Nyukuya [Nzambi] uku an’andi wa ngandji.” (Efeso 5:1) Shɛso lele l’olongo ekɔ lo tetemala la sala ɔlɔlɔ, ɔnkɔnɛ sho lawɔ pombaka sala ɔsɔku.
22. Kakɔna kayotɔsɛdingola lo sawo diayela?
22 Naka tamboyakimɔka l’otema ɔtɔi le Jehowa, kete aha la tâmu, sho kombolaka dia mbokoya ɔlɔlɔ ande. Lam’ele tekɔ tokanula ta kanga pɛkato Adama, sala kɛnɛ kele ɔlɔlɔ bu dikambo dia wɔdu le so. Lo sawo diayela, tayɛna lande na kele sho koka sala ɔlɔlɔ. Tayɔsɛdingola nto toho totshikitanyi takokaso ndo tahombaso mbokoya Jehowa ɔnɛ lele ɛnyɛlɔ koleki tshɛ lo kɛnɛ kendana la ɔlɔlɔ.
Ngande wayoyokadimola?
• Ɔlɔlɔ kɛdikɛdi na?
• Ɛtɛkɛta akɔna wa l’Afundelo waka epole ɔsɛkɛ lo ɔlɔlɔ wa Nzambi?
• Na toho tɔmɔtshi tɛnama ɔlɔlɔ wa Jehowa?
• Lande na kahombaso mbokoya ɛnyɛlɔ ka Jehowa kendana la ɔlɔlɔ?
[Osato wa lo lɛkɛ 10]
Jehowa akasha anto ande w’edjedja dilanya nɛ dia vɔ kɔsɛna lo yoho yɔtɔnɛ l’ɛtɛkɛta awɔ wa lotombo
[Osato wa lo lɛkɛ 10]
Atshikadi wa kɔlamelo w’ase Juda wakakalola otsha la Jerusalɛma
[Osato wa lo lɛkɛ 11]
Mɔsɛ akoke ɛtɛkɛta wa diambo wendana la ɔlɔlɔ wa Nzambi
[Osato wa lo lɛkɛ 13]
Ɔlɔlɔ wa Jehowa mɛnamaka lo woho watɛkɛtande laso lo tshimbo ya Bible