Totetemale kɛnɛmɔla dionga dielɛwɔ ɔlɔlɔ
“Ne dia elua [w’osase] weli tshe ololo la uluwanyi la mete.”—EFESO 5:9.
1. Ngande wɛnya miliyɔ y’anto ɛlɔ kɛnɛ dia vɔ mbetawɔka ɛtɛkɛta wele l’Osambu 31:19?
DIKAMBO dioleki tshɛ dimɛna diakoka onto tshɛ sala ele tombola Jehowa. Ɛlɔ kɛnɛ, miliyɔ y’anto wekɔ lo sala dikambo sɔ lo tombolaka Nzambi dikambo dia ɔlɔlɔ ande. Oko weso Ɛmɛnyi wa Jehowa wele la kɔlamelo, sho mbetawɔka l’otema ɔtɔi ɛtɛkɛta ɛnɛ w’omembi w’esambo lakembe ate: “Ndi ololo aye wuki li! Wakayalamela wane watukukaka woma.”—Osambu 31:19.
2, 3. Kakɔna kakoka tomba naka hatongi la lɔkɛwɔ la dimɛna l’olimu aso w’esambishelo?
2 Wɔma wɔsɔhanyi la dilɛmiɛlɔ wokaso Jehowa totshutshuyaka dia mbɔtɛmɔla l’ɔtɛ w’ɔlɔlɔ ande. Vɔ totomaka nto dia ‘tombola Jehowa, mbɔkɔkwɛ, ndo mbewoya lotombo la lowandji lande.’ (Osambu 145:10-13) Diakɔ diayashaso l’ohetoheto l’olimu wa sambisha ndo wa mbetɛ anto ambeki. (Mateu 24:14; 28:19, 20) Eelo mɛtɛ, olimu aso w’esambishelo pombaka ndjelana la lɔkɛwɔ la dimɛna. Naka hongi ngasɔ, kete sho koka mbisha lokombo la Jehowa l’ekila sɔnyi.
3 Efula k’anto funaka dia vɔ tɛmɔlaka Nzambi, koko lɔkɛwɔ lawɔ hɔtɔnɛ l’ɛlɛmbɛ wele l’Ɔtɛkɛta ande wakasambiyama. Lo kɛnɛ kendana l’anto amɔtshi waki kɔsɛnaka lo ndjela kɛnɛ kakawafunaka ɔnɛ vɔ salaka ɔlɔlɔ ɔpɔstɔlɔ Paulo akafunde ate: “We atetshaka akina, okoko wana wahayayaetsha weme? We latetshaka untu wati: Tuvaki, ku weme m[buv]aka? We latutelaka akina wati: Tanyunanaki, ku weme munanaka? . . . Lukumbu la [Nzambi] lambonywama l’atei w’asi wedja dikambu dianyu, uku akafundama.”—Romo 2:21, 22, 24.
4. Lɔkɛwɔ laso l’ɔlɔlɔ lekɔ la shɛngiya yakɔna?
4 Lo dihole dia mbisha lokombo la Jehowa sɔnyi, sho salaka la wolo dia litombola oma lo lɔkɛwɔ laso la dimɛna. Dikambo sɔ mongaka la shɛngiya ya dimɛna le anto wele kema l’atei w’etshumanelo k’Akristo. Lo yoho mɔtshi, lɔkɛwɔ laso la dimɛna dihaka atunyi aso enyɔ. (1 Petero 2:15) Koko, kɛnɛ koleki tshɛ ele, lɔkɛwɔ laso la dimɛna kotolaka anto oya l’ɔlɔngɔswamelo wa Jehowa, mbut’ate lɔ ndjihwɛka anto mboka woho wa vɔ mbôtombola ndo dia vɔ kondja lɔsɛnɔ la pondjo.—Etsha 13:48.
5. Wembola akɔna wahombaso sɛdingola kakianɛ?
5 Lam’ele sho kema kokele, ngande wakokaso mbewɔ dionga diakoka mbisha Jehowa sɔnyi ndo kɔsha wanɛ wayanga akambo wa mɛtɛ? Ndo woho akɔna wakokaso sala ɔlɔlɔ na?
Olowa w’osase
6. Shila “akambu wa udjima wahato elua,” ndo naa elowa wahomba mɛnamaka l’atei w’Akristo?
6 Oko weso Akristo wamboyakimɔka, sho ngɛnangɛnaka dikambo diatokimanyiya dia mbewɔ “akambu wa udjima wahato elua.” Kɛsɔ mendanaka l’akambo wɔnyɔla Nzambi wele oko, kashi, wovi, ɛtɛkɛta wa kɔlɔ, asawo wa sɔnyi wendana la tenyi dia demba dia diwotshi, lɔkɛwɔ la kɔlɔ, tɔkɛnyɔ tahasungana, ndo edjwelo ka wanu. (Efeso 4:25, 28, 31; 5:3, 4, 11, 12, 18) Lo dihole dia sho ndjasha l’akambo asɔ, sho la dia ‘kɛndakɛnda oko ana w’osase.’ Ɔpɔstɔlɔ Paulo akate dia “elua [w’osase] weli tshe ololo la uluwanyi la mete.” (Efeso 5:8, 9) Lâsɔ, paka lo kɛndakɛnda l’osase mbakokaso tetemala kɛnɛmɔla dionga nɛ dielɛwɔ ɔlɔlɔ. Ko osase wa woho akɔna ɔsɔ na?
7. Ahombaso sala naka sho nangaka tetemala la monga la dionga dielɛwɔ ɔlɔlɔ?
7 Kânga mbeso kema kokele, sho koka monga la dionga dielɛwɔ ɔlɔlɔ naka sho kɛndakɛnda l’osase wa lo nyuma. Omembi w’esambo akembe ate: “Diui diaye dieko tala l’ekulu ami, ndu usasi lu mbuka kami.” (Osambu 119:105) Naka sho nangaka tetemala la ntɔ ‘elowa w’osase’ lo ‘akambo tshɛ w’ɔlɔlɔ,’ kete sho pombaka kondjaka wahɔ mbala la mbala l’osase wa lo nyuma wele l’Ɔtɛkɛta wa Nzambi walembetshiyama dimɛna dimɛna l’ekanda w’Akristo, ndo walakanyema mbala la mbala lo nsanganya yaso yatɛmɔlaso Nzambi. (Luka 12:42; Romo 15:4; Heberu 10:24, 25) Sho pomaka nto mbidja yambalo y’efula l’ɛnyɛlɔ ndo lo wetshelo waki Yeso Kristo, ɔnɛ lele “[osase] wa la kete” ndo “ngaingai ka lutumbu la [Jehowa].”—Joani 8:12; Heberu 1:1-3.
Olowa wa nyuma
8. Lande na kakokaso monga la dionga dielɛwɔ ɔlɔlɔ?
8 Aha la tâmu, osase wa lo nyuma tokimanyiyaka dia monga la dionga dielɛwɔ ɔlɔlɔ. Ndo nto, sho mongaka l’akoka wa mɛnya waonga asɔ nɛ dia tekɔ lo nɔmbwama la nyuma k’ekila, kana wolo waki Nzambi wakamba olimu. Ɔlɔlɔ ekɔ ‘olowa ɔmɔtshi wa nyuma.’ (Ngalatiya 5:22, 23) Naka sho nɔmbwama oma le nyuma k’ekila kaki Jehowa, kete tɔ kayɔtɔsha elowa atɔ wa diambo wa ɔlɔlɔ leso.
9. Ngande wakokaso sala akambo lo ndjela ɛtɛkɛta waki Yeso wele lo Luka 11:9-13?
9 Nsaki k’efula kele laso ka ngɛnyangɛnya Jehowa lo ntɔ olowa wa lo nyuma welɛwɔ ɔlɔlɔ, pombaka totshutshuya dia sala akambo lo yoho yɔtɔnɛ l’ɛtɛkɛta ɛnɛ waki Yeso: “Nyolombe ku wayunyusha; nyuyangi, ku nyayena, nyokokole, ku wayunyudihula. Ne dia untu tshe latolombaka, atulungulaka; latuyangaka, atenaka; latokokolaka, wayûdihula. Untu akona l’atei anyu leli umbutshi a pami, lam’ayolomba on’andi la pami lusi, ku ndi mbusha ului lu dihuli dia lusi? Kana ndi ayôlomba ukeli, ku ndi mbusha kutu? Okone, naka nyu, anto wa kolo, mbeyaka mbisha an’anyu eshasha w’ololo, Shenyu le l’ulungu huleka mbisha wane wôlomba [n]yuma [k’ekila]!” (Luka 11:9-13) Nyɛsɔ toyele dako diaki Yeso sɔ lo nɔmbaka Jehowa nyuma kande woho wa sho tetemala la ntɔ olowa atɔ welɛwɔ ɔlɔlɔ.
“Utshaki ololo”
10. Toho takɔna tɛnama ɔlɔlɔ wa Jehowa toshilami lo Etumbelu 34:6, 7?
10 Oma l’ekimanyielo k’osase wa lo nyuma w’oma l’Ɔtɛkɛta wa Nzambi, ndo ka nyuma k’ekila kaki Nzambi, sho koka ‘tetemala la tshaka ɔlɔlɔ.’ (Romo 13:3) Oma lo wekelo wa Bible wa mbala la mbala, sho mbekaka akambo efula wendana la woho wakokaso mbokoya ɔlɔlɔ waki Jehowa. Sawo di’etshi diakatɛnya toho totshikitanyi t’ɔlɔlɔ wa Nzambi tatanema l’ɛtɛkɛta wakandatɛ Mɔsɛ watanaso lo Etumbelu 34:6, 7, lɛnɛ adiaso ɔnkɔnɛ: [“Jehowa, Jehowa, Nzambi ka,” NW] ketshi ndu ngandji ka mamba, lahuki kele esadi, luludi too la ngandji ka mamba la [“mɛtɛ, longa l’ɔlɔlɔ w’efula otsha le,” NW], antu nunu la nunu, latudimanyiaka [“munga,” NW], uhedia, la [“pɛkato,” NW]. Keli ndi huyindja kanga unungu nduku yema.” Naka sho kana yimba lo toho tɔsɔ takɛnya Jehowa ɔlɔlɔ ande, kete dui sɔ ayotokimanyiya dia sho ‘tetemala la tshaka ɔlɔlɔ.’
11. Mbeya dia Jehowa ekɔ la kɛtshi ndo la ngandji ka mamba, ekɔ la shɛngiya yakɔna le so?
11 Ɛtɛkɛta wa Nzambi ɛsɔ tɛnyaka ohomba wa monga la kɛtshi ndo la ngandji ka mamba. Yeso akate ate: “Wane wukana ketshi, weko la otshoko, ne dia vo wayuwauka ketshi.” (Mateu 5:7; Luka 6:36) Mbeya di’ɔnɛ Jehowa ekɔ la ngandji ka mamba, totshutshuyaka dia monga la dionga dia kɛtshi ndo di’ɔlɔlɔ otsha le anto akina, mbidja ndo wanɛ wasambishaso. Kɛsɔ mbɔtɔnɛka la dako diaki Paulo diata ɔnɛ: “Nyutaki paka aui wa ngandji ka mamba tena tshe, wosohanyimi la leho dia nyu mbeya wuhu wa nkaluya untu tshe diui.”—Kolosai 4:6.
12. (a) Lam’ele Nzambi hoke nkɛlɛ esadi, ngande wakokaso nsɛna l’anto akina na? (b) Kakɔna katotshutshuya ngandji ka mamba ka Jehowa dia sho sala?
12 Lam’ele Nzambi hoke nkɛlɛ esadi, saki kaso ka ‘tetemala la tshaka ɔlɔlɔ’ la dia totshutshuya dia minya washo lo munga ya totshitshɛ yasala asekaso ambetawudi, ndo dia ndeka mbidja yimba lo waonga awɔ w’amɛna. (Mateu 7:5; Jakoba 1:19) Ngandji ka mamba kele la Jehowa totomaka dia monga la ngandji ka kɔlamelo, oyadi kânga lo tena di’ekakatanu wa wolo. Ɔsɔ ekɔ mɛtɛ dikambo dia dimɛna efula.—Tukedi 19:22.
13. Ngande wahombaso mɛnya ɔnɛ Jehowa ‘ndola tɔɔ la mɛtɛ’?
13 Lam’ele Shɛso lele l’olongo ‘ndola tɔɔ la mɛtɛ,’ sho ndjaɛnyaka oko ekambi ande lo mbuta awui wa mɛtɛ.’ (2 Koreto 6:3-7) “Lulimi la kashi” la “omenyi a kashi” ekɔ l’atei w’akambo esambele wahetsha Jehowa. (Tukedi 6:16-19) Lâsɔ saki kaso ka ngɛnyangɛnya Nzambi akatotshutshuya dia ‘minya kashi ndo dia mbutanela akambo wa mɛtɛ.’ (Efeso 4:25) Tatohekɔke pondjo dia monga la dionga dielɛwɔ ɔlɔlɔ lo yoho ya dimɛna shɔ.
14. Lande na kahombaso nyimanyiyana kɔlɔ?
14 Ɛtɛkɛta wa Nzambi le Mɔsɛ totshutshuyaka nto dia nyimanyiyana kɔlɔ nɛ dia Jehowa ekɔ suke dia nyimanyiya kɔlɔ. (Mateu 6:14, 15) Ekɔ mɛtɛ dia Jehowa hohandoya atshi wa pɛkato wahayatshumoya oma lo dilanya. Lâsɔ, sho pombaka ndjela ɛlɛmbɛ ande w’ɔlɔlɔ wendana la nama etshumanelo pudipudi lo nyuma.—Akambo w’Ase Lewi 5:1; 1 Koreto 5:11, 12; 1 Timote 5:22.
“Nyewo ololo”
15, 16. Ngande wakoka dako dia Paulo diele lo Ɛfɛsɔ 5:15-19 tokimanyiya dia sho tetemala la salaka ɔlɔlɔ?
15 Dia sho tetemala la salaka ɔlɔlɔ kânga mbodingamiso l’akambo wa kɔlɔ, sho pombaka ndodjama la nyuma ka Nzambi ndo menda dimɛna woho wakɛndakɛndaso. Lo dikambo sɔ Paulo akatshutshuya Akristo wa l’Ɛfɛsɔ ate: “Nyewo ololo uku akendakendanyu, aha uku dinginya, keli uku akanga a yimba. Nyuyatshungweli etena, ne dia nshi nye yeko kolo. Okone tanyuyalaki uku dinginya, keli nyushihudia lulangu la Khumadiondjo. Tanyudjoki wanu weli la somboki loko, keli nyuludiami la nyuma. Nyutaneli kimbu la esambu w’ololo la wa nyuma. Nyimbeli Khumadiondjo esambu wa mbandula l’etema anyu.” (Efeso 5:15-19) Dako sɔ diekɔ mɛtɛ ohomba leso lo nshi nyɛ y’ekomelo ya pâ.—2 Timote 3:1.
16 Dia sho tetemala la salaka ɔlɔlɔ, sho pombaka menda dimɛna dia kana tekɔ lo kɛndakɛnda lo yoho yɔtɔnɛ la lomba laki Nzambi. (Jakoba 3:17) Sho pombaka mbewɔ pɛkato ya weke ndo ndodjama la nyuma k’ekila ndo mbetawɔ dia tɔ tɔlɔmbɔla. (Ngalatiya 5:19-25) Lo kamba la wetshelo wa lo nyuma walongolaso lo nsanganya y’Akristo, lo nsanganya ya totshitshɛ ndo ya weke, sho koka tetemala la tshaka kɛnɛ kele ɔlɔlɔ. Ɛtɛkɛta wa Paulo ɛsɔ le ase Ɛfɛsɔ mbeyaka nto tohola dia lo nsanganya yaso suke la tshɛ, sho kondjaka wahɔ lo membaka l’otema ɔtɔi “esambo wa lo nyuma,” wele efula kawɔ mendanaka la waonga wa lo nyuma, wele oko ɔlɔlɔ.
17. Naka pâ kele lawɔ hawasha lotshungɔ la mbɔtɔka lo nsanganya mbala la mbala, eshikikelo kakɔna kakoka Akristo wele la hemɔ ka wolo monga la tɔ na?
17 Kayotota dikambo di’asekaso ambetawodi wele kema l’akoka wa mbɔtɔka mbala la mbala lo nsanganya y’Akristo l’ɔtɛ wa hemɔ ka wolo na? Vɔ mbeyaka ndjakiyanya efula nɛ dia hawoyokoka sangana l’anangɛwɔ ndo l’akadiyɛwɔ wa lo nyuma dia tɛmɔla Jehowa. Koko, vɔ koka monga l’eshikikelo dia Jehowa mbaokaka lo kɛnɛ kendana la pâ kele lawɔ, nde ayotetemala la mbakimanyiya dia vɔ tshikala l’osase wa mɛtɛ, ayowasha nyuma kande k’ekila, ndo ayowakimanyiya dia vɔ tetemala la salaka kɛnɛ kele ɔlɔlɔ.—Isaya 57:15.
18. Kakɔna kayotokimanyiya dia tetemala sala ɔlɔlɔ?
18 Tetemala la salaka ɔlɔlɔ nɔmbaka dia sho nama diɔtɔnganelo diele lam’asaso l’ambetawodi ndo mimɔ suke la “atunyi w’akambu w’ololo.” (2 Timote 3:2-5; 1 Koreto 15:33) Kamba olimu l’alako asɔ, tokimanyiyaka diaha sho ‘nyangiya nyuma k’ekila kaki Nzambi’ lo sala akambo yoho yahɔtɔnɛ la ɛlɔmbwɛlɔ katɔ. (Efeso 4:30) Lâdiko dia lâsɔ, sho kimanyiyamaka dia sala kɛnɛ kele ɔlɔlɔ, lo monga kamɛ l’anto wele, nsɛnɔ yawɔ mɛnyaka dia vɔ wekɔ anangi w’akambo w’ɔlɔlɔ ndo wetawɔ nɔmbwama oma le nyuma k’ekila kaki Jehowa.—Amose 5:15; Romo 8:14; Ngalatiya 5:18.
Ɔlɔlɔ mbelaka etombelo w’amɛna
19-21. Kɔndɔla awui amɔtshi wɛnya etombelo waya lo monga la dionga dielɛwɔ ɔlɔlɔ.
19 Kɛndakɛnda l’osase wa lo nyuma, ndjela ɛlɔmbwɛlɔ ka nyuma kaki Nzambi, ndo menda ɔlɔlɔ woho wakɛndakɛndaso ayotokimanyiya dia mbewɔ kɛnɛ kele kɔlɔ ko ‘tetemala la tshaka ɔlɔlɔ.’ Ndo kɛsɔ koka tondja etombelo w’amɛna. Tɔsɛdingole kɛnɛ kakakomɛ Zongezile, Ɔmɛnyi wa Jehowa ɔmɔtshi wa l’Afrique du Sud. Lushi lɔmɔtshi la pindju, lam’akandatatshɔka la kalasa, nde akɔtɔ lo bankɛ dia menda yema yande ya falanga yakandombaka. Mashinyi wakambawɔ lawɔ lo bankɛ wɛnya kɛnɛ kele lo eombelo k’onto l’onto akɛnya dia nde aki la falanga R42 000 mbut’ate dɔlara 6000 di’ase Amɛrikɛ lâdiko dia yema yande ya falanga. Pami kɛmɔtshi kasala djamu lo bankɛ ndo anto akina wakawotɛ dia nde mbɔsa akuta asɔ ko ntowaomba lo bankɛ kekina. Paka atshukanyi w’Ɛmɛnyi wa Jehowa wakadjasɛka lande mbakawotɛ di’aha nde mbɔsa akuta asɔ.
20 La wedi a pindju, Zongezile akatshu dia tɛnya ase bankɛ munga kɛsɔ. Wakatosholaka dia numɛlɔ kande ka kɔntɛ akafɔnaka yema la kɛnɛ k’ose okanda ɔmɔtshi laki l’ɔngɔnyi efula ko pami kɛsɔ akayodjaka falanga lo kɔntɛ kaki Zongezile lo dihole dia nde mbidja lo kɔntɛ kande. L’ɔkɔngɔ wa nde mamba heyama woho wele Zongezile kominanda kânga sɛngi l’akuta asɔ, ose okanda ɔsɔ akawombola ate: “L’ɔtɛmwɛlɔ akɔna weyɛ?” Zongezile akawotɛ dia nde ekɔ ɔtɔi ɔmɔtshi w’Ɛmɛnyi wa Jehowa. Nde akandɔma efula oma le ewandji wa bankɛ, ndo vɔ wakate vate: “Sho kombolaka dia anto tshɛ monga la losembwe lele oko Ɛmɛnyi wa Jehowa.” Mɛtɛ, etsha wa losembwe ndo w’ɔlɔlɔ mbeyaka tshutshuya anto akina dia vɔ tombola Jehowa.—Heberu 13:18.
21 Kânga tokambokambo ta totshitshɛ t’ɔlɔlɔ mongaka l’etombelo w’amɛna efula. Tɔshi ɛnyɛlɔ: Dikɛnda dimɔtshi di’Ɔmɛnyi wa Jehowa lakamba olimu w’esambishelo wa lo tena tshɛ lo disɛnga dimɔtshi dia la Samoa akatshu lo lopitadi la lo ngelo kɛsɔ. Anto wakakongaka dia mɛnana la dɔkɔtɛlɛ, Ɔmɛnyi wa Jehowa ɔsɔ akɛnyi dia osombe ɔmɔtshi wa womoto waki suke lande aki la hemɔ efula. Nde akasale dia womoto ɔsɔ mbɔtɔ lo dihole diande le dɔkɔtɛlɛ kele akondja esakelo esadi. Lushi lokina lɔkɔngɔ wa lâsɔ, Ɔmɛnyi wa Jehowa ɔsɔ akatohomanaka la mama k’osombe kɛsɔ lo lobingu. Womoto ɔsɔ akaweye ndo akohɔ ɔlɔlɔ wakandosalɛ lo lopitadi. Nde akate ate: “Kakianɛ dimi lambeya mɛtɛ di’Ɛmɛnyi wa Jehowa wekɔ la ngandji otsha le onyawɔ onto.” Kânga mbakinde ntondo la wendjodi lo lokumu l’ɔlɔlɔ la Diolelo, ɔlɔlɔ wakosalɛ Ɔmɛnyi wa Jehowa ɔsɔ wakonge la shɛngiya ya dimɛna efula le nde. Nde aketawɔ dia mbeka Bible, ndo akatatɛ kondja ewo k’Ɔtɛkɛta wa Nzambi.
22. Naa yoho yoleki dimɛna ya ‘tetemala la tshaka ɔlɔlɔ’?
22 Ondo wɛ koka shila awui akina wɛnya ohomba wa salɛ anto ɔlɔlɔ. Yoho mɔtshi ya lânde yoleki dimɛna ya ‘tetemala la tshaka ɔlɔlɔ’ ele ndjashaka l’olimu wa sambisha lokumu l’ɔlɔlɔ la Diolelo diaki Nzambi mbala la mbala. (Mateu 24:14) Totetemale la kamba olimu w’ohomba ɔsɔ l’ohetoheto, teya shate ɔsɔ kele yoho mɔtshi ya sala ɔlɔlɔ, djekoleko le wanɛ wetawɔ lokumu lasambishaso. Kɛnɛ koleki ohomba ele, olimu aso ndo lɔkɛwɔ laso la dimɛna tombolaka Jehowa ɔnɛ lele kiɔkɔ yoleki tshɛ y’ɔlɔlɔ.—Mateu 19:16, 17.
Totetemale la ‘sala kɛnɛ kele ɔlɔlɔ’
23. Lande na kele olimu w’Okristo ekɔ olimu wa dimɛna?
23 Aha la tâmu, olimu aso wekɔ olimu w’ɔlɔlɔ. Vɔ koka monga panda le so ndo le wanɛ wahokamɛ losango lele lo Bible ndo wɔtɔ lo mboka katɔla otsha lo lɔsɛnɔ la pondjo. (Mateu 7:13, 14; 1 Timote 4:16) Ɔnkɔnɛ, etena kɔsaso tɛdikɔ tɔmɔtshi, saki ka sala kɛnɛ kele ɔlɔlɔ koka totshutshuya dia ndjambola ɔnɛ: ‘Yɛdikɔ yayangami mbɔsa nyɛ yayonga la shɛngiya yakɔna l’olimu ami w’esambishelo ka lokumu l’ɔlɔlɔ la Diolelo na? Onde yɛdikɔ yayangami mbɔsa yekɔ mɛtɛ ɔlɔlɔ? Onde yɔ yayokimanyiya dia kimanyiya anto akina dia vɔ mbetawɔ “lukumu l’ololo la pundju” ndo monga la diɔtɔnganelo dia dimɛna la Jehowa Nzambi?’ (Enyelo 14:6) Ɔngɛnɔngɛnɔ wa mamba wayotomba oma lo yɛdikɔ yɔsama dia tɔla wahɔ wa Diolelo otsha la ntondo.—Mateu 6:33; Etsha 20:35.
24, 25. Naa toho tɔmɔtshi takokaso sala ɔlɔlɔ l’etshumanelo, ndo eshikikelo kakɔna kakokaso monga latɔ naka sho tetemala la sala ɔlɔlɔ?
24 Tatɔnyɔlake pondjo etombelo w’ɔlɔlɔ wakoka tomba oma lo sala ɔlɔlɔ. Sho koka la tetemala la mɛnya dionga dia dimɛna sɔ lo sukɛ etshumanelo k’Akristo ndo lo sala kɛnɛ tshɛ kakokaso sala dia nkokɛ wahɔ ndo ɔlɔlɔ atɔ. Mɛtɛ sho salaka ɔlɔlɔ lam’ɔtɔso mbala la mbala ndo washaso kɔmatɛrɛ lo nsanganya y’Akristo. Wɔtwɛlɔ aso wa mbala la mbala lo nsanganya keketshaka anto akina ndo, kɔmatɛrɛ yaso yakalɔngɔswami dimɛna mbakeketshaka lo nyuma. Sho salaka nto ɔlɔlɔ etena kakambaso l’ekundji aso dia nɔngɔsɔla Mbalasa ka Diolelo ndo kashaso lonya dia kikokɛka. (2 Nkumi ya Dikanga 22:3-7; 2 Koreto 9:6, 7) Ɔnkɔnɛ, “lam’ekisu la etena k’ololo, tutshelaki antu tshe ololo, ndjekaleka le embetawudi.”—Ngalatiya 6:10.
25 Sho hatokoke mbeya la ntondo etombelo wakoka tomba oma lo dikambo tshɛ dialɔmba dia sho sala ɔlɔlɔ. Ɔnkɔnɛ, lam’ahomanaso l’ekakatanu w’eyoyo, toyangake osase w’oma l’Afundelo, tɔlɔmbake Jehowa dia tosha nyuma kande k’ekila, ndo tosalake tshɛ kakokaso sala dia tsha ɔlɔlɔ ndo lolango lande la kokele. (Romo 2:9, 10; 12:2) Sho koka la monga l’eshikikelo dia Jehowa ayotɔtshɔkɔla efula naka sho tetemala la salaka ɔlɔlɔ.
Ngande wayoyokadimola?
• Ngande wakokaso sala ɔlɔlɔ lo yoho yoleki tshɛ?
• Lande na kelamɛ ɔlɔlɔ ‘olowa w’osase’?
• Lande na kelamɛ ɔlɔlɔ ‘olowa wa nyuma’?
• Lɔkɛwɔ laso l’ɔlɔlɔ lekɔ la shɛngiya yakɔna?
[Osato wa lo lɛkɛ 15]
Ɔtɛkɛta wa Nzambi ndo nyuma kande k’ekila tokimanyiyaka dia monga la dionga dielɛwɔ ɔlɔlɔ
[Esato wa lo lɛkɛ 16]
Monga la dionga dielɛwɔ ɔlɔlɔ tondjaka etombelo w’amɛna