Ɔnɛ mbele etena ka sambisha!
1. Lande na kele ɔnɛ mbele etena ka sambisha?
1 “Nyuki [Nzambi] woma, nyûtumbuli.” Lo ɛlɔmbwɛlɔ ka andjelo, losango lɔsɔ lekɔ lo mbewoyama le “wedja tshe ndu wauhu tshe ndu eteketa tshe, ndu antu tshe.” Lande na? “Ne dia unya [wa Nzambi] w’elumbwelu ambukuka.” Ɛlɔ kɛnɛ, tekɔ lo nsɛna lo ‘wonya ɔsɔ wa elombwelo,’ wayokoma lo kondoko yawɔ lo elanyelo ka dikongɛ nɛ di’akambo. Ekɔ ohomba efula dia anto ‘tɛmɔla Ɔnɛ lakatonge olongo la nkɛtɛ la ashi a wake la tɛkɔ di’ashi.’ Ndoko olimu okina wakambema ɛlɔ kɛnɛ wele ohomba efula kana wahomba kambema la shamanya oko wa esambishelo ka “lukumu l’ololo la pundju.” Eelo, ɔnɛ mbele etena ka sambisha!—Eny. 14:6, 7, sho mbɛnganyisha alɛta ango.
2. Ngande wɛnya ekambi wa Jehowa dia vɔ mbeyaka etena keso lo nsɛna?
2 Lo ɛnɔnyi dikumi wetshi, ekambi wa Jehowa waketsha suke la miliyara 12 ya wenya lo olimu w’esambishelo ka Diolelo ndo wa mbetɛ anto ambeki. Efula wakasale etshikitanu lo nsɛnɔ yawɔ dia vɔ nyomoleka ndjasha lo dinela sɔ dia lo nyuma. (Mat. 9:37, 38) Ɛnyɛlɔ, ɔnɔnyi wetshi, yɛdikɔ ya l’atei atei ya apandjudi ndekana 850000 wakakambe oko ambatshi mboka ngɔndɔ tshɛ. Le ambatshi mboka wa pondjo, kɛsɔ nɔmbaka mbetshaka wenya 70 ngɔndɔ tshɛ lo olimu w’esambishelo, ndo le ambatshi mboka wa tshanda wenya 50.
3. Mbala efula, etshikitanu akɔna wahomba apandjudi sala dia kamba oko ambatshi mboka?
3 Woho wa kamba oko ombatshi mboka: Lam’ele vɔ mbeyaka dia ‘etena kambotshikala kekɔ yema tshitshɛ,’ ambatshi mboka ndjaketembolaka dia monga la lɔsɛnɔ la ɔsɛlɛngɛ. (1 Kor. 7:29, 31) Vɔ nyangaka toho ta kitshakitsha adepasɛ diaha vɔ mbetshaka wenya efula lo elimu wa lo emunyi. Ɛnyɛlɔ, amɔtshi wakonɔ lo mvudu ya totshitshɛ. Akina wakayanyɛ diangɔ dia lo emunyi diele kema ohomba. (Mat. 6:19-21) Mbala efula vɔ pombaka kitshakitsha lofulo la eyango awɔ hita. Vɔ salaka akambo asɔ tshɛ la oyango wa mbetshaka wenya efula lo olimu w’esambishelo ndo wa mbidja yambalo lɔkɔ. (Ef. 5:15, 16) Apandjudi efula wakonge la akoka wa kongɛ ekongelo ka dimɛna kawakimanyiya dia kamba oko ambatshi mboka lo monga la eshikikelo, la yimba ya ndjahombia ndo lo ndjaɛkɛ tshɛ le Jehowa lo dɔmbɛlɔ.
4. Wanya akɔna w’ohomba wakokayɛ takola dia ndjadjɛ oyango wa kamba oko ombatshi mboka?
4 Onde wɛ kokaka kamba oko ombatshi mboka? Lande na kahayambola ambatshi mboka wa tomanamana kɛnɛ kakimanyiya dia vɔ sala dikambo sɔ? Tombaka la wɔ lo esambishelo dia wɛ monga la ɔngɛnɔngɛnɔ oko vɔ. Sɛdingola asawo watɛkɛta dia olimu w’ombatshi mboka wambotombaka lo ekanda aso. Yadjɛ eyango w’eshika wakoka mbɔsama oko wanya w’ohomba wahombayɛ takola dia wɛ kamba oko ombatshi mboka. Naka kakianɛ wɛ ekɔ la wekamu ɛmɔtshi wakoshimba dia kamba oko ombatshi mboka, ewoyawɔ Jehowa lo dɔmbɛlɔ, ndo lɔmbande dia nde kokimanyiya dia wɛ mbaekola.—Tuk. 16:3.
5. Ngande watokimanyiya olimu w’ombatshi mboka dia ndowanya akoka aso lo olimu w’esambishelo?
5 Ɛtshɔkɔ ndo ɛngɛnɔngɛnɔ: Olimu w’ombatshi mboka ndowanyaka akoka aso wa kamba la Ɔtɛkɛta wa Nzambi, wayotelaka ɔngɛnɔngɛnɔ wa mamba. Kadiyɛso kɛmɔtshi k’osekaseka ka ombatshi mboka akate ate: “Monga la akoka wa nembetshiya Ɔtɛkɛta wa Nzambi wa akambo wa mɛtɛ dimɛna ekɔ tshondo ya diɛsɛ. Etena kakambayɛ oko ombatshi mboka wɛ kambaka la Bible mbala efula. Ɔnkɔnɛ, etena kasambishami lo luudu la luudu, dimi kokaka kanyiya avɛsa wɔtɔnɛ la onto tshɛ lasawola la mi.”—2 Tim. 2:15.
6. Wetshelo akɔna washa olimu w’ombatshi mboka?
6 Olimu w’ombatshi mboka tokimanyiyaka nto dia monga la akoka w’ohomba wakoka ndowanya lɔsɛnɔ. Vɔ kokaka kimanyiya ɛlɔngɔlɔngɔ la esekaseka dia vɔ kongɛ wenya awɔ la lomba, woho wa kamba la falanga ndo wa sɛna dimɛna la anto akina. Efula nyomoyolekaka mɛna akambo lo yoho ya lo nyuma lo nsɛnɔ yawɔ oko etombelo w’oma lo olimu w’ombatshi mboka. (Ef. 4:13) Lâdiko dia lâsɔ, ambatshi mboka mongaka mbala efula la diɛsɛ dia mɛna woho wakamba lonya la Jehowa dia ɔlɔlɔ awɔ.—Etsha 11:21; Fil. 4:11-13.
7. Ngande watokimanyiya olimu w’ombatshi mboka dia ndjasukanya la Jehowa?
7 Ondo ɔtshɔkɔ ɔmɔtshi woleki woke waya lo kamba oko ombatshi mboka ele olimu ɔsɔ tokimanyiyaka dia ndjasukanya la Jehowa. Dikambo sɔ kokaka tosukɛ koyanga l’atei w’ehemba. Kadiyɛso kɛmɔtshi kakakikɛ ekakatanu wa wolo efula lo etena kɛmɔtshi akate ate: “Diɔtɔnganelo dia ma ma diakamonge ladiɔ la Jehowa lo kamba oko ombatshi mboka diakakimanyiya dia dimi mbikikɛ ekakatanu ami tshɛ.” Nde akakotsha ate: “Lekɔ la ɔngɛnɔngɛnɔ efula lo woho wakametsha nshi yami ya opalanga dia kambɛ Jehowa lo tena tshɛ. Olimu ɔsɔ wakakimanyiya dia dimi ndjakimɔ tshɛ lo toho takimi kokoka fɔnya pondjo.” (Etsha 20:35) Nyɛsɔ sho lawɔ tokondja ɛtshɔkɔ efula wa ngasɔ lo sala kɛnɛ tshɛ kokokiso sala lo olimu woleki ohomba wa esambishelo.—Tuk. 10:22.