Ekadimwelo Lo Wembola Anyu

◼ Onde pombaka kimɔ alapɔlɔ wa wekelo wa Bible wa lo nkumbo le etshumanelo?

Naka ombutshi w’Okristo nɔmbɔlaka wekelo wa Bible wa lo nkumbo wele ndo l’ana wahatabatizama, kete ombutshi akɔ mbeyaka kimɔ alapɔlɔ wa wonya ɔtɔi lo lomingu, wendelo ɔtɔi lo lomingu, ndo ombeki wa Bible ɔtɔi lo ngɔndɔ. Dikambo sɔ pombaka monga ngasɔ oyadi kânga wekelo salemaka l’edja kolekanyi wonya ɔtɔi, olekanyi mbala ɔtɔi lo lomingu, kana wekɔ lo nɔmbwama l’ɔna l’ɔna ndamɛ.​—⁠Enda lo dibuku Notre ministère, lɛkɛ 105.

Naka anto tshɛ wa lo nkumbo wekɔ Ɛmɛnyi wa Jehowa wambobatizama, kete ndoko alapɔlɔ wa wonya kana wa wekelo ɔtɔi wayoshama oko alapɔlɔ w’olimu (onyake naka ɔna ɔmɔtshi âkatetemala la mbeka dibuku dia hende l’ɔkɔngɔ wa batismu). Ekɔ ngasɔ nɛ dia alapɔlɔ wa l’etshumanelo mɛnyaka ntondotondo kɛnɛ kakasalema l’olimu w’esambishelo ka lokumu l’ɔlɔlɔ ndo wa mbetsha akambo wa mɛtɛ wa lo Bible le wanɛ wahatakome ekambi wa Jehowa wamboyakimɔ ndo wambolongola batismu. (Mat. 24:14; 28:​19, 20) Koko, kɛsɔ hakitshakitsha ohomba wa nɔmbɔlaka wekelo wa ngasɔ mbala la mbala.

Ambutshi w’Akristo wekɔ l’ɔkɛndɛ wa mbeka l’anawɔ. Wanɛ wele l’ohomba w’ekimanyielo dia tatɛ kana ndowanya wekelo awɔ wa lo nkumbo mbeyaka nɔmba dikumanyi ekimanyielo. Naka kokaka di’opandjudi okina nɔmbɔla wekelo wa Bible le ɔna ɔmɔtshi lahatabatizama lo nkumbo kɛmɔtshi k’Akristo ka l’etshumanelo, kete pombaka mbewoya omendji walɔmbɔla kana omendji w’olimu. Naka wekelo wa ngasɔ wambetawɔma, kete ɔnɛ lalɔmbɔla koka kimɔ alapɔlɔ oko watondokimɔka w’ambeki akina wa Bible.

Mbetsha ana mboka ya Jehowa nɔmbaka wenya ndo weolo efula oleki wɛnɛ wakimɔso oko alapɔlɔ w’olimu w’esambishelo. (Euh. 6:​6-9; Tuk. 22:⁠6) Ambutshi w’Akristo pombaka mandɔma lo woho wakotshawɔ ɔkɛndɛ awɔ wa woke wa mbodia ana “lu elembe la lu wetshelu wa [Jehowa].”​—⁠Ef. 6:⁠4.