Ekadimwelo lo ambola anyu

◼ Onde ambutshi akɔ ahende kokaka kimɔ alapɔlɔ wa wenya wetshawɔ lo wekelo wa lo nkumbo wasalawɔ mbala la mbala?

Kânga mbele ambutshi wa apami mbele la ɔkɛndɛ wa ntondo wa mbodia anawɔ ‘lo ɛlɛmbɛ ndo lo wetshelo wa Jehowa,’ ambutshi akɔ ahende kambaka kâmɛ dia mbodia anawɔ. (Ef. 6:4) Bible keketshaka ana ɔnɛ: “On’ami, ulungi wetshelu wa sho, tutunaki alaku wa nyo.” (Tuk. 1:8) Yoho mɔtshi y’ohomba efula ya wetshelo washa ambutshi anawɔ ele wekelo wa lo nkumbo.

Lo nshi yakete, paka ombutshi wakalɔmbɔlaka wekelo wa lo nkumbo la anande wahatabatizama mbakakokaka kimɔ alapɔlɔ wa wenya oyadi kânga ambutshi akɔ ahende mbakalɔmbɔlaka wekelo wa lo nkumbo. Koko, dikambo sɔ diambotshikitanyema. Naka wonya wasalema wekelo wa lo nkumbo ambutshi akɔ ahende mbetsha ana, kete vɔ akɔ ahende kokaka mbadia wonya ɔtɔi lo lomingu lo alapɔlɔ awɔ w’esambishelo. Ekɔ mɛtɛ dia ambutshi mbetshaka wenya efula lo lomingu dia mbetsha anawɔ. Ambutshi akɔ ahende pombaka mbidja welo efula dia mbetsha anawɔ lo yoho ya dimɛna. (Euh. 6:6-9) Koko, wenya wakimɔso lo alapɔlɔ ekɔ wenya wakatetsha paka lo esambishelo. Diakɔ diele, paka wonya a tango ɔtɔi oto mbahombawɔ mbadiaka lo lomingu oyadi kânga wekelo wakasalema lo edja kolekanyi wonya a tango ɔtɔi, wekɔ lo nɔmbwama mbala efula lo lomingu kana wekɔ lo mbeka l’ɔna l’ɔna lo ndamɛ. Paka ombutshi ɔtɔi oto mbahomba mbɔsaka ombeki wa Bible etena kalɔmbɔlawɔ wekelo wa lo nkumbo ndo wendelo w’oyoyo ɔtɔi lomingu tshɛ lasalema wekelo akɔ.