Ngande wonga kâmɛ ka mɛtɛ k’Akristo?
1 Kakɔna kakoka kakatanya anto ndekana miliyɔ shamalo w’oma lo wedja 234 ndo w’elui w’ɛtɛkɛta 380? Ekɔ paka ɔtɛmwɛlɔ wa Jehowa Nzambi. (Mika 2:12; 4:1-3) Ɛmɛnyi wa Jehowa mbeyaka dimɛna dia kâmɛ ka mɛtɛ k’Akristo ekɔ dikambo dia mɛtɛ elɔ kɛnɛ. Oko weso “ului otoi” l’ɛlɔmbwɛlɔ k’“ulami otoi,” tamboyashikikɛ dia shika tanga la ntondo k’andja wele la yimba ya diatɔnelo.—Joa. 10:16; Ef. 2:2.
2 Sangwelo dia Nzambi diahakokaki kita tatala ekɔ dia ditongami tshɛ diele la yimba mbut’ate andjelo ndo anto sangana kâmɛ l’ɔtɛmwɛlɔ wa mɛtɛ. (Eny. 5:13) Lam’ele nde akeyaka ohomba wa dikambo sɔ, Yeso akalɔmbaka efula dikambo dia kâmɛ k’ambeki ande. (Joa. 17:20, 21) Ngande wakoka ɔmɔmɔ la l’atei aso sala dia kâmɛ monga l’etshumanelo k’Akristo?
3 Woho Wonga Kâmɛ: Aha l’ekimanyielo k’Ɔtɛkɛta wa Nzambi ndo ka nyuma kande, kâmɛ k’Akristo hakoke monga. Woho wakambaso l’awui wadiaso lo Bible kimanyiyaka dia nyuma ka Nzambi kamba dimɛna lo nsɛnɔ yaso. Kɛsɔ tokimanyiyaka dia ‘nama kâmɛ ka lo nyuma ndo dimama dia ki.’ (Ef. 4:3) Tɔ totshutshuyaka dia mbikikanɛ kɔlɔ la ngandji. (Kol. 3:13, 14; 1 Pet. 4:8) Onde wɛ pamiaka kâmɛ lo kanaka yimba l’Ɔtɛkɛta wa Nzambi lushi tshɛ?
4 Ɔkɛndɛ aso wa sambisha ndo wa mbetɛ anto ambeki nto tokakatanyaka. Lam’akambaso l’anto akina ‘dihɛka lo dihɛka dia mbetawɔ ka lokumu l’ɔlɔlɔ,’ l’olimu w’Okristo, sho komaka “ekambi kame la wo lu akambu wa mete.” (File. 1:27; 3 Joa. 8) Lam’asalaso akambo asɔ, dimama dia ngandji dia l’etshumanelo keketshamaka. Lande na kahayalɔmbɛ onto ɔmɔtshi lamboyetsha edja sambisha lande dia nde kotshindɛ l’olimu w’esambishelo lomingu lɔnɛ?
5 Tekɔ mɛtɛ la diɛsɛ dia monga l’atei wa nkumbo ka mɛtɛ ɔtɔi k’onto l’ɔnango ka l’andja w’otondo! (1 Pet. 5:9) Atete edja, nunu di’anto wakɛnyi la washo awɔ woho wonga kâmɛ kɛsɔ lo losanganya la lo wedja efula laki l’ɔtɛ a dui ɔnɛ: “Tosha Nzambi Lotombo.” Nyɛsɔ sho tshɛ onto l’onto asale dia kâmɛ ka dimɛna kɛsɔ monga lo mbadiaka Ɔtɛkɛta wa Nzambi lushi tshɛ, lo kandolaka etshikitanu la ngandji, ndo lo sambishaka lokumu l’ɔlɔlɔ ‘l’onyɔ ɔtɔi.’—Romo 15:6.