Olimu Wosukame oma le Nzambi
1 Ɛlɔ kɛnɛ, l’atei w’ekambi waki Nzambi, anto yema tshitshɛ tsho mbakeke mukanda efula, mbele la lomombo la l’emunyi, kana lokumu lo dikongɛ di’akambo nɛ. Ɔnkɔnɛ, anto amɔtshi mɔnyɔlaka olimu aso lo mbɔsa dia vɔ bu ohomba efula. (Is. 53:3) Koko, olimu wa wetshelo wa Bible wakambaso wambela miliyɔ y’anto wa l’andja w’otondo esambelo ndo elongamelo. Ngande wambokodja anto k’anto etombelo wa dimɛna ɛsɔ na? Ekɔ paka oma l’osukɔ waki Nzambi. (Mat. 28:19, 20; Etsha 1:8) Ɔpɔstɔlɔ Paulo akalembetshiya ate: “[Nzambi] akasonola akanga a dinginya, wa la kete dia ndi mbutsha akanga a yimba sonyi.”—1 Kor. 1:26-29.
2 Apɔstɔlɔ ndo Akristo akina wa lo ntambe ka ntondo waki anto “waheyi mukanda, antu k’antu.” (Etsha 4:13) Koko, la dihonga tshɛ vɔ wakatetemala l’olimu awɔ wa sambisha lokumu l’ɔlɔlɔ, ndo Jehowa akatshɔkɔla welo awɔ. Kânga l’atei wa wekamu ndo w’ɔlɔshamelo, ‘dui dia Jehowa diakatetemala nfula ndo mbidja otshumba lo yoho ya diambo.’ Ndoko dui diakakoke memadja olimu ɔsɔ nɛ dia vɔ wakasukamɛ oma le Nzambi. (Etsha 5:38, 39; 19:20) Ɔsuku mbediɔ ndo lo nshi yaso nyɛ. Kânga ɔlɔshamelo w’oma l’ewandji wa wolo kokoka shimba dia lokumu l’ɔlɔlɔ mbidja otshumba ndo pama.—Is. 54:17.
3 Nzambi Mbahombaso Mbisha Lotombo Tshɛ: Onde diɛsɛ diele laso dia monga ekambi waki Nzambi toshaka ɔkɔkɔ wa sho ndjafuna? Ndooko. Lam’akandatɛkɛtaka di’olimu w’Akristo, Paulo akafunde ate: “Shu teko la diango ne dia mumba lu dikitshelu dia kete, ne dia wuki a wulu utamanya ayali uma le [Nzambi] aha uma le su shame.” (2 Kor. 4:7) Paulo akeyaka dia nde akakoke kotsha olimu ande paka la wolo w’oma le Nzambi.—Ef. 6:19, 20; Fil. 4:13.
4 Sho lawɔ mbeyaka dia paka lo woho ‘wakondjaso ekimanyielo oma le Nzambi’ mbakotshaso olimu w’esambishelo. (Etsha 26:22) Oma l’esambishelo kɛsɔ ka l’andja w’otondo, Jehowa ekɔ lo kamba laso lo yoho ya diambo dia didinya wedja ndo ɔsɔ ekɔ djembetelo y’elombwelo kaya suke la ndja. (Hang. 2:7) Ande diɛsɛ diele laso dia monga “ekambi kame la [Nzambi]” lo dinela dia woke dia lo nyuma!—1 Kor. 3:6-9.