Mbo ya Ndɛ ya lo Nyuma lo Tena Diayɔ
1. Ngande wakotshama Ezekiyele 36:29 ɛlɔ kɛnɛ?
1 “Dimi layela wehu, layuwefudia, keli halutuma ndjala ka kasha l’atei anyu ntu,” mbata Nkum’Olongo Jehowa. (Ezek. 36:29) Ɛtɛkɛta wa prɔfɛsiya ɛsɔ mendanaka l’ekambi waki Nzambi ɛlɔ kɛnɛ. Lo yoho ya didjidji, Jehowa ekɔ lo ngɔnya ekambi ande la weho kana tɔngɔ yasukɛ lɔsɛnɔ. Mbo ya ndɛ ya lo nyuma yalongolaso lo nsanganya yaso ya distrikɛ lo tena diayɔ mɛnyaka dikambo sɔ.
2. Ngande wakamba Jehowa la nsanganya ya distrikɛ dia tosha mbo ya ndɛ ya lo nyuma l’etena kahombama?
2 Lo losanganya la woke lakasalema lo Columbus, Ohio (l’États-Unis), l’ɔnɔnyi 1931, Jehowa akasale di’ekambi ande mbɔsa lokombo l’oyoyo, l’Ɛmɛnyi wa Jehowa. (Is. 43:10-12) L’ɔnɔnyi 1935, olui a woke watɛkɛtawɔ l’Enyelo 7:9-17 wakeyama dimɛna. L’ɔnɔnyi 1942, Ɔnangɛso Knorr akasha sawo diaki l’ɔtɛ a dui ɔnɛ: “Onde Wɔladi Wayoviya?” Sawo sɔ diakatshutshuya anto dia ndjasha l’olimu w’esambishelo wakambema l’andja w’otondo ndo diakayokonya dia Kalasa ka Ngiliyadɛ ka Société Watchtower mbatema. Kânga mbele nsanganya mɔtshi ndekaka mbohɔma, losanganya tshɛ toshaka mbo ya ndɛ ya lo nyuma lo tena diayɔ.—Osam. 23:5; Mat. 24:45.
3. Ahombaso sala dia kondja wahɔ oma lo dambo dia lo nyuma dia lo losanganya laso la distrikɛ?
3 Onde Wɛ Ndɛka Dimɛna? Sho kokaka monga la mbo ya ndɛ efula koko hatoyalesha dimɛna naka hatodjisha welo dia ndjilɛ. (Tuk. 26:15) Dui sɔ diekɔ mɛtɛ lo yoho ya lo nyuma. Lo nsanganya mɔtshi, akɛnama di’anto efula waketetaka weteteta ndo wakasawolaka l’anto akina wonya wa losanganya. Kânga mbele bu kɔlɔ sawola l’anto akina, la ntondo kana l’ɔkɔngɔ w’etenyi tshɛ ka losanganya mbahombaso sala dikambo sɔ. (Und. 3:1, 7) Naka hatodjashi lo dihole diaso ko ndjelaka losanganya la yambalo tshɛ, kete sho koka pandja dui dimɔtshi di’ohomba. Emendji w’adepartɛma wa lo losanganya ndo anangɛso akina wele l’ɛkɛndɛ koka mɛna ohomba tena dimɔtshi dia kɛtshanya awui amɔtshi wendana la losanganya wonya wasalemalɔ. Ko naka ndoko dui diahombawɔ kɛtshanya diendana la losanganya, kete vɔ la dia mbisha ɛnyɛlɔ lo ndjelaka losanganya la yambalo tshɛ. Ndoko onto l’atei aso lahomba pandja mbo ya ndɛ mɔtshi ya lo nyuma yashama.—1 Kor. 10:12; Fil. 2:12.
4. Ngande wakokaso mɛnya lowando laso lo mbo ya ndɛ ya lo nyuma y’efula yatosha Jehowa?
4 Sho ngɛnangɛnaka mbo ya ndɛ y’efula ya lo nyuma yatosha Jehowa, otshikitanyi la wetshelo wa kashi wa lo Lokristokristo watshika anto la ndjala! (Is. 65:13, 14) Yoho mɔtshi yakokaso ‘mɛnya lowando laso’ ele lo mbɔsa losanganya la woke oko diaaso dia mbetshama oma le Jehowa. (Kol. 3:15) Ɔsa losango lashama oko oma le ‘Ombetsha aso a Woke’ mboyelɔ, tɛnake paka ɔnangɛso lasha sawo diakɔ. (Is. 30:20, 21; 54:13) Dja yambalo y’efula. Ɔsa nɔtɛ ya tomondo y’awui amɔtshi w’ohomba efula. Vusolaka awui w’ohomba efula dikɔlɔ tshɛ. Kamba l’awui wekayɛ.
5. Ɛkɔkɔ akɔna w’ɔngɛnɔngɛnɔ watosha nsanganya ya distrikɛ?
5 Losanganya tshɛ lasalema la ntondo k’Aramangɛdɔna, oyadi lo pango k’ase dawo, lo wodja wɛna pâ l’ata, kana lo dihole dia woke dimɔtshi dia wɔladi, ekɔ otshumba ɔmɔtshi wadjaso Satana! Oko weso nkumbo ka kâmɛ k’anto l’ɔnango, sho ngɛnangɛnaka waaso wakondjaso wa sangana kâmɛ lo nsanganya ya distrikɛ. (Ezek. 36:38) Tekɔ l’eshikikelo dia la ngandji tshɛ, Jehowa ayonyomotosha “mbu ya nde lu tena diayo.”—Luka 12:42.
[Kiombo ya lo lɛkɛ 4]
Tɛnya Lowando lo Mbo Yalɛso lo Mɛsa wa Jehowa
◼ Dja yambalo efula
◼ Ɔsaka nɔtɛ y’awui w’ohomba efula
◼ Vusolaka awui w’ohomba efula wa l’ekongelo dikɔlɔ tshɛ
◼ Kambaka la kɛnɛ kekayɛ