Tôkoya Woho wa Yimba ya Yeso
1. Yimba yakɔna yakakɛnɛmɔla Yeso?
1 Kânga mbele tatɛnaka Yeso, Ɔnaki Nzambi, sho towôka mɛtɛ ngandji, diɛsɛ oma l’ɔkɔndɔ wakafundama wendana la lɔsɛnɔ ndo l’olimu ande. (1 Pet. 1:8) Lo kitanyiya lolango la She, nde akatshike dihole diande dia lâdiko dia l’olongo ko akaye la nkɛtɛ. Lam’akinde oko onto, nde akakambɛ akina olimu ndo akakimɔ lɔsɛnɔ lande lo wahɔ w’anto tshɛ. (Mat. 20:28) Ɔtɛkɛta wa Nzambi tokeketshaka ɔnɛ: “Nyuyali la yimba nye l’atei anyu yaki ndu le Kristu Jesu.” Ngande wakokaso mbokoya yimba yande ya ndjahombia?—Fil. 2:5-8.
2. Okakatanu akɔna wahomana l’Akristo efula, ndo kakɔna kakoka mbakimanyiya dia mbotondoya?
2 Etena Kakandalɛmbɛ: Kânga mbaki Yeso onto la kokele, nde akalɛmbaka. Lo diaaso dimɔtshi, nde akasambisha dimɛna womoto ɔmɔtshi l’ose Samariya kânga ‘mbakinde ambɔlɛmba la lɔkɛndɔ.’ (Joa. 4:6) Akristo efula ɛlɔ kɛnɛ pomanaka l’okakatanu wa ngasɔ. L’ɔkɔngɔ w’olimu wakɔmɔla demba wokambiso lo lomingu, kokaka monga tshondo y’okakatanu dia kondja wolo wa tomba l’olimu w’esambishelo. Koko, naka sho sambishaka mbala la mbala, kete tayɛna di’olimu w’Okristo tokeketshaka lo nyuma.—Joa. 4:32-34.
3. Ngande wakokaso monga suke dia mbetsha anto akina l’ɛnyɛlɔ ka Yeso?
3 Lo diaaso dikina, Yeso nde l’ambeki ande wakatshu lo dihole dia diɛta dia tomuya yema. Koko, olui a woke w’anto wakete la ntondo kawɔ dia tohomana la wɔ. L’ɔtɛ wa nde momala, Yeso “akawauki ketshi” ndo “akatatela mbaetsha akambu efula.” (Mako 6:30-34) Tatɛ ndo tetemala nɔmbɔla wekelo wa Bible l’anto nɔmbaka dia monga la dionga dia woho akɔ wâmɛ. Dui sɔ nɔmbaka dia tetemala mbidja welo ndo monga la ngandji k’oshika otsha le anto. Naka wɛ atakondja onto la mbeka lande Bible, kete tohekɔke dia tana onto ɔmɔtshi la mbekaka la nde Bible.
4. Ngande wakoka tokimanyiya olimu w’ombatshi mboka wa tshanda dia mbokoya yimba yaki Kristo?
4 Tetsha Wahɔ wa lo Nyuma la Ntondo: Olimu w’ombatshi mboka wa tshanda koka tokimanyiya dia ndjasha efula l’elimu wa lo nyuma. Kadiyɛso kɛmɔtshi k’osekaseka akafunde ate: “Nyang’aki osekami ɔmɔtshi akatokeketsha dia kamba kâmɛ la nde oko ambatshi mboka wa tshanda ngɔndɔ kɛmɔtshi. Dimi lekɔ l’ɔngɛnɔngɛnɔ efula lo woho wakatakambe la nde olimu ɔsɔ. Lamboyeya anangɛso ndo akadiyɛso dimɛna dimɛna, ndo aha la tshimbatshimba vɔ wakakome oko ase nkumbo le mi. Lakangɛnangɛna nto dia nyomokondja diaaso dia sambisha akina awui wendana la Jehowa ndo mbaetsha akambo wa mɛtɛ wa diambo wa Diolelo. Akambo asɔ tshɛ wakasukanya suke la Jehowa ndo l’ɔlɔngɔswamelo ande.”—Osam. 34:8.
5. Lande na kahombaso tetemala mbokoyaka yimba yaki Yeso?
5 Sho tshɛ ndɔshanaka la eongelo kaso k’anto wele kema kokele ndo la nsaki kele laso ka ngɛnyangɛnya Jehowa. (Romo 7:21-23) Sho pombaka sala la wolo di’aha monga la yimba y’etema ehende yele l’ase andja ɔnɛ. (Mat. 16:22, 23) Jehowa koka tokimanyiya dia tondoya dikambo sɔ oma l’ekimanyiyelo ka nyuma kande k’ekila. (Nga. 5:16, 17) Oko wakongɛso dia tshungɔ ko mbɔtɔ l’andja w’oyoyo wa losembwe waki Nzambi, nyɛsɔ tokoya yimba yaki Yeso lo mbetsha wahɔ wa Diolelo ndo w’anto akina la ntondo ka wakiso hita.—Mat. 6:33; Romo 15:1-3.