‘Todihwane Etema’
1. Ɔkɛndɛ akɔna wele l’onto tshɛ la l’atei aso?
1 Lo nkumbo k’Akristo k’anto l’ɔnango, onto tshɛ l’atei aso ekɔ l’ɔkɛndɛ wa mbisha lonya dia wangasanu monga l’etshumanelo. (1 Pet. 1:22; 2:17) Wangasanu wa ngasɔ mongaka etena ‘kataloyaso’ ngandji kaso le anto akina. (2 Kor. 6:12, 13) Lande na ekɔ ohomba nyanga dia mbeya anɛngɛso la akadiyɛso dimɛna?
2. Lande na ekɔ ohomba mbɔtɔ lɔngɛnyi l’asekaso ambetawudi?
2 Lɔngɛnyi Pamaka Wolo: Etena keyaso dimɛna ambetawudi w’asekaso, sho komaka lo mandola mbetawɔ kawɔ, etetemalo ndo waonga awɔ akina w’ɔlɔlɔ. Sho tɔsaka dia munga yawɔ yekɔ totshitshɛ efula, ndo dimama dia lɔngɛnyi keketalaka. Mbeyana dimɛna lam’asaso, ayotokimanyiya dia sho monga suke dia keketshana ndo sambana. (1 Tes. 5:11) Sho koka ndjokoma ‘ekimanyielo kakeketsha’ lam’asaso dia sho shika tanga la ntondo ka tɔsɛngiya ta kɔlɔ ta l’andja ɔnɛ waki Satana. (Kol. 4:11) Lo menda ekakatanu ɛsɔ wa lo nshi y’ekomelo, tekɔ mɛtɛ la lowando efula lo woho weso l’angɛnyi w’eshika l’atei w’ekambi waki Jehowa!—Tuk. 18:24.
3. Ngande wakokaso monga ekimanyielo kakeketsha le anto akina?
3 Lɔngɛnyi l’oshika koka monga kiɔkɔ y’ekeketshelo ndo y’esambelo etena kadiɛnɛso l’ehemba wa wolo. (Tuk. 17:17) Okristo ɔmɔtshi wa womoto wakalɔshanaka la tokanyi ta ndjaɔsaka oko onto l’anyanya ekɔ lo mbohɔ ate: “Lakikɔ l’angɛnyi wakakokaka mbutɛmi akambo wakeketsha dia kimanyiyami dia minya tokanyi ta kɔlɔ taki lami.” Angɛnyi wa ngasɔ wekɔ ɔtshɔkɔ w’oma le Jehowa.—Tuk. 27:9.
4. Ngande wakokaso mbeya anto akina wa l’atei w’etshumanelo dimɛna?
4 Toyasha le Anto Akina: Ngande wakokaso taloya ngandji kaso otsha le asekaso ambetawudi akina? Lâdiko dia mbisha anto akina mɔyɔ lo nsanganya y’Akristo, sawolaka la wɔ asawo w’ɔlɔlɔ efula. Aha la ndjatambiya l’awui awɔ, yasha le onto l’onto. (Fil. 2:4; 1 Pet. 4:15) Yoho kina ya ndjasha le anto akina ele lo mbaelɛka lawakaso dia ndjosanga la wɔ lonya lo lokenga. (Luka 14:12-14) Kana wɛ kokaka mbɔsa yɛdikɔ ya sambisha la wɔ kâmɛ. (Luka 10:1) Lam’ɔsaso yɛdikɔ dia mbeya anɛngɛso l’akadiyɛso dimɛna, sho keketshaka kâmɛ kele l’atei w’etshumanelo.—Kol. 3:14.
5. Naa yoho mɔtshi yakokaso taloya lɔngɛnyi laso otsha le anto akina?
5 Onde sho sɔnaka angɛnyi aso w’eshika paka oma l’atei wa wanɛ wele lo lɔlɔnga laso kana wanɛ wayasha l’awui wayashaso? Hatohombe mbetawɔ di’akambo asɔ toshimba di’aha monga l’angɛnyi efula l’atei w’etshumanelo. Davidi nde la Jɔnatana ndo Ruta la Naɔmi wakonge la dimama dia wolo dia lɔngɛnyi kânga mbakiwɔ l’ɛnɔnyi wotshikitanyi ndo nsɛnɔ yotshikitanyi. (Ruta 4:15; 1 Sam. 18:1) Onde wɛ koka taloya lɔngɛnyi layɛ otsha le anto akina? Sala dui sɔ ayokoka tela ɛtshɔkɔ wele hatolongamɛki ndo nongamɛ.
6. Naa ɛtshɔkɔ ɛmɔtshi wakondjaso lo taloya ngandji kaso otsha le anangɛso l’akadiyɛso?
6 Lo taloya ngandji kaso otsha le anto akina, sho keketshanyaka onto la onyande ndo mbidjaka ki l’atei w’etshumanelo. Ndo nto, Jehowa tɔtshɔkɔlaka nde ndamɛ lo ngandji kɛnyaso otsha le anɛngɛso. (Osam. 41:1, 2; Heb. 6:10) Lande na kahatayadjɛ oyango wa mbeya anto efula dimɛna na?