Okahanyelo wa Lânde wa Biukubuku y’Oyoyo
1 Anto efula wekɔ lo ndjakiyanya ɛlɔ kɛnɛ l’ɔtɛ w’akambo wasalema l’andja ɔnɛ, koko anto yema tshitshɛ tsho mbashihodia lande na kele akambo ngasɔ, kɛnɛ kayotomba lo nshi yayaye ndo kɛnɛ kahombawɔ sala dia ndjoshimbamɛ l’elanyelo kayaye. (Ezek. 9:4) Dia mbakimanyiya dia vɔ mbeya kitshimudi ya tena diaso nɛ, okahanyelo wa lânde wa biukubuku y’oyoyo Nyotetemale Sungukala! wayosalema oma lo Lushi l’Ɔtɔi Ngɔndɔ ka Dikumi 18, polo Lushi la Samalo Ngɔndɔ ka Dikumi l’Ɔtɔi 14.
2 Sho mbeyaka mbisha anto biukubuku shɔ lam’eso l’esambishelo ka lo luudu la luudu, etena kasalaso waendelo w’eyoyo, etena kasambishaso lo tshakitudi, kana lo toshinga. Koko, hatokoke kahanya biukubuku Nyotetemale Sungukala! okahanyakahanya. Diakɔ diele, paka wanɛ wɛnya nsaki lo kɛnɛ kata Bible dikambo dia kitshimudi y’akambo wa l’andja mbayoyilongola. Wanɛ wayɛnya yema ya nsaki tshitshɛ lo losango lɔsɔ mbeyaka nongola traktɛ lo dihole dia biukubuku shɔ.
3 Wɛ kokaka kotola yambalo y’onto lo mbuta ɔnɛ:
◼ “Anto efula wekɔ lo ndjakiyanya dikambo di’ekakatanu ndo di’awui wa kɔlɔ wambokokanɛ ɛlɔ kɛnɛ. [Shila ɛnyɛlɔ kɛmɔtshi keyama l’ɛtshi kanyu ka nkɛtɛ.] Onde wɛ mbeyaka dia Bible ambotatɛkɛtaki di’awui asɔ? [Tshikande akadimole. Oma lâsɔ, ko wɛ mbadia divɛsa diɔtɔnganɛ l’ɛnyɛlɔ koshayɛ, oko Mateu 24:3, 7, 8; Luka 21:7, 10, 11; kana 2 Timote 3:1-5.] Bible kɛnɛmɔlaka kitshimudi ya tena diaso nɛ ndo kɛnɛ kakongɛ anto la ntondo. Onde wɛ nangaka nyomoleka mbeya awui efula? [Tshikande akadimole. Shande biukubuku naka nde ambɛnya nsaki k’oma k’ɛse otema.] Wɛ koka kondja biukubuku nyɛ aha la kimɔ falanga. Koko, naka wɛ nangaka kimɔ woshasha waha kawotake wa la lolango dikambo di’olimu aso wa l’andja w’otondo, tayowolongola l’ɔngɛnɔngɛnɔ.”
4 Kana wɛ mbeyaka mɛna dia mbɔtwɛlɔ kɛnɛ kokaka tondja etombelo w’amɛna:
◼ “Anto efula ɛlɔ kɛnɛ wambɔkɔmɔ otema l’ɔtɛ w’akambo wa kɔlɔ wasalema kana l’ɔtɛ wa mpokoso mɔtshi yakakomɛ. Amɔtshi ndjambolaka lande na kahekɛ Nzambi lonya dia shimba awui wa ngasɔ. Bible toshikikɛka dia kema edja Nzambi ayonyɛ anto asui. Tende ɛtshɔkɔ wayela Nzambi anto. [Adia Osambu 37:10, 11.] Onde wɛ nangaka nyomoleka mbeya awui akina?” Komiya oko wɛnyamidiɔ la diko.
5 Yanga dia mbeya lokombo ndo dihole diodjashi onto tshɛ layolongola biukubuku nyɛ, ndo yalɔngɔsɔla dia kalola tolomialomia nsaki kande. Alako wendana la woho wakokaso nomialomia nsaki kakɛnya onto wayotomba l’Olimu Aso wa Diolelo wa Ngɔndɔ ka Dikumi l’Ɔtɔi 2004. Naka onto ambɛnya nsaki k’efula mbala ka ntondo kosawodiso la nde, kete wɛ kokaka tatɛ wekelo wa Bible la nde aha la tshimbatshimba lo kamba la biukubuku Nyotetemale Sungukala! kana l’okanda okina, oko biukubuku Katɔlɔmba.
6 Kɔpi efula ya biukubuku y’oyoyo shɔ yayonga lo Losanganya l’Olimu layɔkɛtshanyema sawo nɛ. Nɔmbamaka di’apandjudi l’ambatshi mboka mbɔsa paka tobukubuku tayowonga latɔ ohomba lo nshi y’etatelo k’okahanyelo. Jehowa atshɔkɔlɛ olimu ɔsɔ wa lânde dia lotombo lande ndo dia wahɔ w’anto wele l’etema w’ɔlɔlɔ l’ahole tshɛ wewɔ.—Osam. 90:17.