Totetemale Sala Akambo la Shamanya!
1 Yeso akeye di’etena kaki lande ka sala olimu waki She lanɛ la nkɛtɛ kaki kaya bu efula. (Joa. 9:4) Ɔnkɔnɛ, nde akakambe olimu ande la shamanya, ndo aketsha ambeki ande dia sala woho akɔ wâmɛ. (Luka 4:42-44; 8:1; 10:2-4) Nde kombetsha lomombo la l’emunyi lo dihole dia ntondo. (Mat. 8:20) Lo sala ngasɔ, nde aki l’akoka wa shidiya olimu wakawosha Jehowa dia sala.—Joa. 17:4.
2 Etena Kaya Bu Efula: Etena ka sambisha lokumu l’ɔlɔlɔ lo “kete tshe” lawɔ kaya bu efula. (Mat. 24:14) Prɔfɛsiya ya lo Bible mɛnyaka dia tambɔnyɔngɔmɛ etale efula lo nshi y’ekomelo. Ndoko edja “wane waheyi [Nzambi], la wahakitanyia lukumu l’ololo la Khumesu Jesu . . . wayusuwa, wayunyema pundju.” (2 Tes. 1:6-9) Elanyelo kɛsɔ kayoya la shashimoya ya mamba. (Luka 21:34, 35; 1 Tes. 5:2, 3) Anto pombaka mbeya wâle wayowakomɛ. Sho mbele l’ɔkɛndɛ wa mbakimanyiya dia vɔ nyanga ekimanyielo kaki Jehowa etena kakakoke dikambo sɔ salema.—Zef. 2:2, 3.
3 Tosale Tshɛ Kakokaso Sala: Oko weyawɔ dia “nshi yaya ka nshila,” ekambi waki Nzambi mbetshaka olimu w’esambishelo lo dihole dia ntondo. (1 Kor. 7:29-31; Mat. 6:33) Amɔtshi wakatshike la lolango lawɔ waaso wa monga ɛngɔnyi kana eyango awɔ vamɛ dia ndeka ndjasha l’esambishelo. (Mako 10:29, 30) Akina wekɔ lo tetemala monga la ‘akambo efula wa sala l’olimu wa Nkumadiɔndjɔ’ kânga mbewɔ l’ekakatanu wahashile. (1 Kor. 15:58) Aya ɛnɔnyi akumi wele efula wekɔ lo sambisha lokumu l’ɔlɔlɔ aha la ndjɛkayɛka. (Heb. 10:23) Jehowa mbɔsaka la nɛmɔ efula yimba ya ndjahombia yakɛnɛmɔlawɔ dia sukɛ wahɔ wa Diolelo.—Heb. 6:10.
4 Kimɔ nsɛnɔ yaso tshɛ l’ɔtɛmwɛlɔ wa Jehowa mbidja ndo olimu w’esambishelo, tokimanyiyaka dia namaka lushi la Jehowa lo timba taso. Dikambo sɔ tokokɛka di’aha andja ɔnɛ waki Satana mbekola timba taso ndo diɔ keketshaka yɛdikɔ yakatɔshi ya mongaka la lɔkɛwɔ l’ekila. (2 Pet. 3:11-14) Eelo, naka sho kamba olimu aso la shamanya, kete dikambo sɔ mbeyaka shimbɛ nsɛnɔ yaso hita ndo ya wanɛ watohokamɛ.—1 Tim. 4:16.