Ekongelo ka lo nkumbo ka nsanganya ya l’etshumanelo

¹ Naka wɛ ekɔ ombutshi wa Okristo, kete wɛ nangaka dia anayɛ mbola dia vɔ mboka Jehowa ngandji ndo mbokambɛ olimu ndo lo ekomelo ndjokondja lɔsɛnɔ la pondjo lo andja w’oyoyo waki Nzambi wakalakema. Ngande wakokayɛ mbakimanyiya dia vɔ mbidja ɔtɛmwɛlɔ wa Jehowa lo dihole dia ntondo lo nsɛnɔ yawɔ? Yoho mɔtshi ele oma lo ɛnyɛlɔ kayɛ. (Tuk. 20:⁠7) Kadiyɛso kɛmɔtshi kohɔ ɛnyɛlɔ ka nyango laki ombetawudi akate ate: “Ndoko lushi lakatayambola dia kana tayotshɔ kana hatototshɔ lo losanganya.” Dikambo sɔ diaki la shɛngiya lo lɔsɛnɔ lande l’otondo.

² Onde nkumbo kayɛ shihodiaka oyango wa nsanganya ya l’etshumanelo? Wetshelo wakondjaso lo nsanganya shɔ tokeketshaka dia tetemala sala lolango la Nzambi, ndo lɔngɛnyi lele lama wasaso la anangɛso ekɔ kiɔkɔ ya ekeketshelo k’oshika. (Is. 54:13; Romo 1:​11, 12) Koko, oyango wa ntondo wa nsanganya shɔ ele wa tombola Jehowa ‘l’atei wa nyemba y’anto yotshumanyi.’ (Osam. 26:12) Nsanganya ya Akristo toshaka waaso wa mɛnya ngandji kokaso Jehowa ndo mbɔtɛmɔla.

³ ‘Nyendake ɔlɔlɔ’: Monga la lowando lo oyango w’ekila wa nsanganya yaso ayototshutshuya dia ‘mendaka ɔlɔlɔ’ diaha sho ndjonga la mbekelo ka mbetshaka nsanganya l’ɔtɛ wa awui amɔtshi wele kema ohomba efula. (Ef. 5:​15, 16; Heb. 10:​24, 25) Etena kakongɛyɛ ekongelo kayɛ ka lo nkumbo, wɛ mbeyaka tatɛ funda wenya wa nsanganya ya l’etshumanelo. Lâsɔ yashikikɛ diaha elimu ekina ndjonyoshimba diaha nyu mbɔtɔ lo nsanganya yakɔ. Yashikikɛ dia wɔtwɛlɔ wa nsanganya ekɔ dikambo dia ohomba efula lo nkumbo kayɛ.

⁴ Onde hatokeketshama etena kadiaso ɛkɔndɔ wa anangɛso wakatondoya ekakatanu dia mbɔtɔ lo nsanganya ya l’etshumanelo kana ya weke? Mbeyaka monga ko wɛ bu l’awui wa wolo efula lo lɔsɛnɔ, koko ondo wɛ lawɔ pomanaka la ekakatanu. Satana ekɔ lo mbidja wekamu efula diaha ekambi wa Nzambi tɛmɔla Jehowa. Koko, yashikikɛ dia anayɛ wayolembetɛ welo wadja nkumbo kayɛ dia mbɔtɔka lo nsanganya ya l’etshumanelo. Lo mɛtɛ, lo salaka ngasɔ, wɛ ayowasha woshasha wa lo nyuma wahawohɛki pondjo.