Ekongelo ka lo nkumbo ka divɛsa dia lushi la lushi
1 Ambutshi wa ngandji mbidjaka welo efula lushi tshɛ dia mbisha anawɔ mbo ya ndɛ y’ɛlɔlɔ. Koko, mbasha mbo ya ndɛ ya lo nyuma y’oma lo Ɔtɛkɛta wa Nzambi ndeka ohomba efula. (Mat. 4:4) Yoho mɔtshi yakokayɛ kimanyiya anayɛ dia vɔ monga la mposa ka mbo ya ndɛ ya lo nyuma ndo dia vɔ ‘mbola otsha lo panda’ ele lo mbɔsaka yema ya wenya lushi tshɛ dia sɛdingolaka divɛsa dia lushi la lushi ndo kɔmatɛrɛ kadiɔ oko nkumbo. (1 Pet. 2:2) Etena kakɔna kahombayɛ kongɛ dikambo sɔ lo ekongelo kayɛ ka lo nkumbo?
2 Wonya wa olelo: Mimɛ lushi la ɔsɛdingwelo wa divɛsa kokaka kimanyiya ase nkumbo kayɛ dia vɔ takanyiyaka awui wa Jehowa lushi l’otondo. (Osam. 16:8) Mama kɛmɔtshi akɔshi yɛdikɔ ya mbadiaka ndo kɛtshanyaka divɛsa ndo kɔmatɛrɛ kadiɔ la ɔnande etena kakawalɛka yangɔ ya la pindju ndo nde akalɔmbaka kâmɛ la ɔnande la ntondo ka nde ntshɔ la kalasa. Dikambo sɔ akôkimanyiyaka diaha nde monga la ngandji k’ɔtɛkɔya ka wodja, dia nde shika ekolo la ntondo ka awui wa mindo, ndo mbosha dihonga dia nde sambisha oyadi ambeki kana embetsha. Kânga mbâkinde tshɔi yakɔ y’Ɔmɛnyi wa Jehowa la kalasa, nde kondjaoka pondjo oko etshike.
3 Naka heyama woho wa nyu kɛtshanyaka divɛsa la pindju, kete nyu mbeyaka ndjodisɛdingola wonya okina, ondo wonya wa olelo wa la dikɔlɔ. Amɔtshi kɛtshanyaka nto awui wakahomana lawɔ lo esambishelo ndo awui wakângɛnyangɛnya lo wadielo awɔ wa Bible lo etena kɛsɔ. Efula mbohɔka la wangasanu tena dia ngasɔ diakawetshaka wonya wa olelo wa la dikɔlɔ oko tena diakaleke ɔngɛnɔngɛnɔ diakawetsha kâmɛ lo nkumbo.
4 La dikɔlɔ: Le nkumbo mɔtshi, wonya woleki dimɛna wa sɛdingola divɛsa dia lushi la lushi ele la ntondo ka vɔ ndala. Ɔsɔ kokaka monga nto etena k’ɔlɔlɔ ka nɔmba kâmɛ. Etena kakôka anayɛ atɛkɛta lushi tshɛ dia Jehowa ndo awɔlɔmba, nde ndjokomaka onto la mɛtɛ lo washo awɔ.
5 Jehowa atshɔkɔlɛ welo wadjayɛ dia mbetsha anayɛ akambo wa mɛtɛ etena kakambayɛ dimɛna la biukubuku Tɔsɛdingolake Afundelo lushi la lushi.