Sɛdingolaka Ɔtɛkɛta wa Jehowa lushi tshɛ!
1 Lushi tshɛ, mbetawɔ kaso pomanaka l’ehemba w’eyoyo. Mbeyaka monga ko ɔngɛnyi ayɛ ɔmɔtshi wa l’andja ɔnɛ kotshutshuyaka dia paka nyu tshɔ lo dihole dimɔtshi diakandokana dia tohomana la pami kana womoto ɔmɔtshi. Mbeyaka monga ko ombetsha ayɛ nangaka wɛ nyanga olimu wa lokumu, kana patrɔ kayɛ nangaka wɛ kamba wenya efula. Esangɔ ɛmɔtshi ko demba diayɛ bu la wolo efula. Kânga mbakokayɛ pomana l’ehemba wa ngasɔ tena tshɛ, eya dia wɛ kema okalema. Jehowa ekɔ suke dia kosha lomba leyɛ l’ohomba dia wɛ ndɔshana l’ehemba ɛsɔ. Yoho mɔtshi yakokayɛ kondjaka ekimanyielo oma l’Ɔtɛkɛta wa Nzambi ele sɛdingolaka divɛsa dia lushi la kɔmatɛrɛ kadiɔ oma lo Tɔsɛdingolake Afundelo. Onde wɛ kambaka l’ehomɔ kɛsɔ dimɛna?
2 Ekimanyielo kekɔ ohomba: Isaya 30:20 mbutaka ɔnɛ Jehowa ekɔ ‘Ombetsha a Woke’ wahomba ekambi ande mendɛ le nde dia kondja ekimanyielo. Nde toshaka kɛnɛ kele laso ohomba dia ndɔshana l’ehemba wahomana la mbetawɔ kaso. Lo yoho yakɔna na? Divɛsa diahɔnyi mbutaka ɔnɛ: ‘Nyayoka dui l’ɔkɔngɔ anyu diata ate: Mboka tɔ kɛnɛ. Nyɔkɛndɛkɛndɛ lɔkɔ.’ Ɛlɔ kɛnɛ, Jehowa tewoyaka dui diande l’ekimanyielo k’Afundelo ndo k’ekanda w’‘ɔhɔmbɔ wa kɔlamelo ndo wa kɛsɔ.’ (Mat. 24:45) Sho koka kondja lomba efula lo sɛdingola asawo wambêtaka wa lo Tshoto y’Etangelo, asawo watɛkɛta akambo suke la tshɛ wa lo lɔsɛnɔ l’Okristo. Sho koka kondja ewo k’efula kayotokimanyiya dia ndɔshana la weho tshɛ w’ehemba, naka sho vusolaka asawo wele lo biukubuku Tɔsɛdingolake Afundelo.—Is. 48:17.
3 Yatshungwɛ etena dia salaka dikambo sɔ: Kânga mbakinde la wesanu efula la pindju, mama kɛmɔtshi aki la mbekelo ka mbadiaka ndo kɛtshanyaka divɛsa dia lushi la kɔmatɛrɛ kadiɔ nde l’ɔnande wonya wakawalɛka yangɔ ya pindju. Kɔmatɛrɛ ka divɛsa dia lushi la dɔmbɛlɔ mbaki ɛtɛkɛta wa komelo wakôkaka ɔn’ɔsɔ la ntondo ka nde ntshɔ la kalasa. Kɔmatɛrɛ la dɔmbɛlɔ akôkimanyiyaka dia nde shika ekolo la ntondo ka wanɛ wakɔsɛngɔlaka dia mbeyana la nde, di’aha monga la ngandji k’ɔtɛkɔya ka wodja, ndo mbosha dihonga dia nde sambisha oyadi ambeki kana embetsha. Kânga mbele l’etena kɛmɔtshi ndamɛ oto mbaki Ɔmɛnyi wa Jehowa lo kalasa, nde kondjaoka oko etshike.
4 Toyaɛkɛ le Jehowa ndo l’Ɔtɛkɛta ande dia sho kondja alako ndo ɛlɔmbwɛlɔ. Naka sho ntsha ngasɔ, kete tayowɔsa oko onto la mɛtɛ mɛtɛ, ndo oko ɔngɛnyi aso w’oshika. Toyaɛkɛke le nde lushi tshɛ! Kâmɛ la miliyɔ nkina y’anto ya l’andja w’otondo wanɛ wasɛdingola Ɔtɛkɛta wa Nzambi lushi la lushi, wɛ mbeyaka ndjɛna dia washo ayɛ ‘wayoyokoma washo wɛna Ombetsha ayɛ wa Woke.’