Nyokimanyiya ananyu dia vɔ mpama lo esambishelo
1 Ambutshi w’Akristo wekɔ la ɔkɛndɛ w’ohomba efula wa mbetsha anawɔ awui wendana la esambishelo oma ko tɔkɛndakɛnda tawɔ. Dikambo sɔ mbeyaka salema lo toho efula. Ana amɔtshi wekɔ la akoka wa kimɛ divɛsa dimɔtshi l’ɔtɛ kânga la ntondo ka vɔ monga l’akoka wa mbadia. Dui sɔ koka monga la shɛngiya ya wolo le ampokami. Etena katole ana, vɔ koka sala awui efula lo esambishelo. Ngande wakokanyu, nyu ambutshi kimanyiya ananyu dia vɔ sambisha? Ondo alako wayela anɛ wayonyokimanyiya nto.
2 L’ɔkɔngɔ wa mbisha onto mɔyɔ, wɛ mbeyaka mbuta ɔnɛ:
◼“Ɔnami ɔnɛ, [ta lokombo lande], ekɔ la divɛsa dimɔtshi di’ohomba efula dialangande kotola yambalo yayɛ.” Ɔnayɛ mbeyaka mbuta ɔnɛ: “Divɛsa nɛ dia lo Osambu diakambetsha lokombo la Nzambi. [Ɔna ambadia kana ambota tsho awui wa lo Osambu 83:18.] Periodikɛ nyɛ tɛkɛtaka dia kɛnɛ kayotosalɛ Jehowa Nzambi. Onde dimi mbeyaka kotshikɛyɔ?” Wɛ kokaka kumiya sawo lo nembetshiya woho wasukamɛ olimu aso wakambema lo andja w’otondo.
3 Kana wɛ mbeyaka pemba mbɔtwɛlɔ kɛnɛ:
◼“Akemwe. Lekɔ lo mbetsha ɔnami la womoto ɔnɛ [ta lokombo lande], woho wa nde ndjakiyanya dikambo dia anto wa lo ngelo kaso. Nde nangaka kahana la yɛ losango lɔmɔtshi la tshena pe la lo Bible.” Nde koka mbuta ɔnɛ: “Yoho mɔtshi yalangami kimanyiya anto ele lo kahana la wɔ elongamelo kasha Bible dikambo dia nshi yayaye. [Ɔna ambadia kana ambota tsho awui wa lo Enyelo 21:4.] Periodikɛ nyɛ nembetshiyaka kɛnɛ kayotosalɛ Diolelo diaki Nzambi. Dimi fɔnyaka dia wɛ ayɔngɛnangɛna ndjiadia.”
4 Kambaka mbala la mbala la mbɔtwɛlɔ kɛmɔtshi ka wɔdu kimanyiyaka ana diaha vɔ mboka wɔma mbewoya losango la Diolelo. Vusola asawo wɛnya ohomba wa tɛkɛta lo yoho yokɛma hwe ndo la dui dia dimɛna ayowakimanyiya dia vɔ tɛkɛta etena katanemawɔ la ntondo ka awui wotshikitanyi. Ndjalɔngɔsɔlaka dimɛna la ntondo ndo mandolaka ana la otema ɔtɔi ayowakimanyiya dia vɔ mbewoya anto akina mbetawɔ kawɔ.
5 Ekeketshelo ka ngasɔ ambokimanyiya ana efula dia vɔ koma apandjudi wahatabatizama. Ekɔ mɛtɛ ɔngɛnɔngɛnɔ efula dia mɛna anaso watahame lo olimu w’Okristo!—Osam. 148:12, 13.