Ekongelo ka losanganya layaye la lânde la lushi ɔtɔi
Losanganya la lânde la lushi ɔtɔi layotatɛ lo Ngɔndɔ ka Divwa 2000, lekɔ l’ɔtɛ a dui ɔnɛ: ‘Toyale Epalanga lo Akoka wa Eokelo k’Akambo.’ (1 Kor. 14:20) Lande na kele ayonga ohomba sho mbɔtɔ lo losanganya lɔsɔ na? Nɛ dia tekɔ lo sɛna l’andja wambolola l’awui wa kɔlɔ. Dia sho mbeya shika ekolo la ntondo k’awui asɔ, sho pombaka pamia akoka aso wa lo nyuma wa eokelo woho wa mbeya mbidja kɛnɛ kele kɔlɔ otshumba oma l’etsha aso w’ɔlɔlɔ. Losanganya la lânde la lushi ɔtɔi layotokimanyiya dia mbeya sala dikambo sɔ.
L’etenyi ka la pindju, omendji w’otshimbedi ayosha sawo diele l’ɔtɛ a dui ɔnɛ: “Dihomɔ Diakoka Tokimanyiya dia Koma Epalanga lo Eokelo ka Bible.” Nde ayotɛnya nganɛ wakokaso monga nge lo mbetawɔ kaso k’Okristo. Lam’ayondosha sawo diande diele l’ɔtɛ ate: “Kokɛ Lonyuma Layɛ lo Mbekiya Akoka Ayɛ w’Ekanelo ka Yimba,” ɔtɛkɛtshi w’ɔngɛndangɛnda ayoka epole ɔsɛkɛ dia mɛnya ɔnɛ kitanyiya awui wa lo Bible ekɔ ohomba efula nshi nyɛ dia pamia akoka aso wa ekanelo ka yimba.
Ɛlɔngɔlɔngɔ vɔ lawɔ pombaka pamia akoka awɔ wa eokelo. Dikambo sɔ diayɔtɛkɛtama l’asawo anɛ wele l’ɛtɛ ɔnɛ: “Tonge oko Ana w’Ashashi lo Kɛnɛ Kendana la Kɔlɔ” ndo “Ɛlɔngɔlɔngɔ Wakondja Eokelo Nshi Nyɛ.” Kanyohokame kɛnɛ kayota ɛlɔngɔlɔngɔ l’esekaseka lo kɛnɛ kendana la woho wayakeketshawɔ lo nyuma vamɛ dia mbeya sɛna wolo di’aha ndjokotɔma l’akambo wa kɔlɔ wa l’andja ɔnɛ ndo woho w’ewɔwɔ etombelo wa kɔlɔ waya oma l’akambo asɔ.
Woho akɔna wokokiso tana ɔngɛnɔngɛnɔ woleki lo lɔsɛnɔ na? Ɔtɛkɛtshi w’ɔngɛndangɛnda ayolembetshiya dikambo sɔ lo sawo di’ekomelo diele l’ɔtɛ a dui ɔnɛ: “Wahɔ Waya oma lo Kamba l’Awui wa lo Bible la Eokelo k’Ɔlɔlɔ.” Nde ayosha bɛnyɛlɔ diɛnya ɔnɛ kamba l’Ɔtɛkɛta waki Nzambi tokimanyiyaka dia ndɔshana l’ekakatanu, dia mbɔsa tɛdikɔ ndo kondja mɛtɛ wahɔ oma lo kɛnɛ katolakanya Jehowa.
Wanɛ tshɛ walanga ndjâkimɔ le Nzambi ndo batizama lo losanganya lɔnɛ pombaka mbewoya omendji walɔmbɔla kɔlɔ̂mɔ. Kam’ayowewoya datɛ dia losanganya la lânde la lushi ɔtɔi, ko wɛ mbidja djembetelo lo calendrier woho waha wɛ mbohɛ datɛ sɔ ndo yalɔngɔsɔla dia wɛ ndjokondja wahɔ oma lo ekongelo kɛsɔ ka dimɛna efula. Tohandjake kânga tshenyi ɔtɔi ya losanganya lɔsɔ la lânde la lushi ɔtɔi! Lɔ layokokimanyiya dia mbeya mbikikɛ kɛnɛ katomba l’andja wa kɔlɔ ɔnɛ ndo dia tshikala la kɔlamelo le Jehowa.