Kɛnɛ kakotsha olimu aso
1. Ngande wɔsa Jehowa olimu aso ndo ngande wɔsa anto olimu ɔsɔ?
1 Ɔtɛkɛta wa Nzambi tɛkɛtaka dikambo dia Akristo oko anto watakɛndakɛnda l’ɔngɛnɔngɛnɔ tshɛ lo olimu wa Jehowa oko ambidji w’otshumba. (2 Kor. 2:14-16) Etena keyanyaso ewo ka Nzambi, elowa w’ɛlɔmɔ aso mongaka oko opumu wa dimɛna efula wa malashi le Jehowa. Anto amɔtshi kotɔmaka lo mpɛ ka lokumu l’ɔlɔlɔ, kânga mbele akina litonaka. Koko, woho watona anto efula losango lɔsɔ halembetshiya dia olimu aso honge la etombelo w’ɛlɔlɔ. Tɔsɛdingole kɛnɛ kakotsha olimu aso.
2. Kakɔna katokimanyiya olimu aso dia mɛnya?
2 Kɛnɛ kakotsha olimu aso tombolaka Jehowa: Satana akate dia anto kambɛka Jehowa l’ɔtɛ w’ɛkɔkɔ wa lokaki. (Jobo 1:9-11) Olimu w’Okristo toshaka diaaso dia mɛnya dia ndjakimɔ kaso le Nzambi kekɔ ka mɛtɛ. Apandjudi efula tetemalaka kitanyiya didjango dia sambisha ndo mbetɛ anto ambeki oyadi ekakatanu wele lawɔ kana wendjodi wele l’anto lo tshɛ kawɔ. Ekikelo ka la kɔlamelo tshɛ ka ngasɔ ngɛnyangɛnyaka Jehowa!—Tuk. 27:11.
3. Lande na ekɔ ohomba efula le so dia sho tetemala mbeyanya lokombo laki Nzambi ndo sangwelo diande?
3 Ndo nto olimu aso wekɔ ohomba lo okotshamelo wa sangwelo diaki Nzambi. Lo kɛnɛ kendana la oyelo wa elanyelo ka andja waki Satana, Jehowa mbutaka ɔnɛ: “Wedja wayeya vati: Dimi keli [Jehowa].” (Ezek. 39:7) Dia wedja mbeya dikambo sɔ, ekɔ ohomba efula dia ekambi wa Nzambi tetemala mbewoya lokombo lande ndo sangwelo diande le “wedja tshe ndu wauhu tshe ndu eteketa tshe, ndu antu tshe.”—Eny. 14:6, 7.
4. Ngande wayolomboshama anto lo woho wɔsawɔ esambishelo ka lokumu l’ɔlɔlɔ?
4 Ɔkɔkɔ wa elombwelo: Anto wayolomboyama lo ndjela woho wɔsawɔ esambishelo ka lokumu l’ɔlɔlɔ. Ɔpɔstɔlɔ Paulo akate dia Kristo Yeso ayɔsɔmbɔya “wane waheyi [Nzambi], la wahakitanyia lukumu l’ololo la Khumesu Jesu.” (2 Tes. 1:8, 9) Anto wayolomboshama lo ndjela woho wɔsawɔ lokumu l’ɔlɔlɔ. Ekambi wa Nzambi wekɔ mɛtɛ la ɔkɛndɛ w’ohomba efula! Dia mbewɔ onongo wa dikila, sho hatohombe tona mbeyanya losango la Diolelo lashimbɛ nsɛnɔ.—Etsha 20:26, 27.
5. Ngande wakɛnɛmɔma kɛtshi ka Nzambi lo olimu aso?
5 Welo watetemalaso mbidja dia kimanyiya asukanyi aso dia vɔ mbetawɔma le Nzambi ekɔ tshelo ya kɛtshi ka Jehowa. (1 Tim. 2:3, 4) Lo mbeya ɔnɛ nsɛnɔ y’anto yekɔ lo tatetemala tshikitana, sho tetemalaka ntshɔ lawakawɔ mbala la mbala ndo mbakeketshaka dia vɔ nyanga Jehowa kam’eke etena. Lo sala ngasɔ, sho kɛnɛmɔlaka “ketshi ka mamba ka [Nzambi k]asu,” ‘lahalange ndoko onto ɔtɔi ndanyema koko lalanga dia anto tshɛ kadimola etema.’—Luka 1:78; 2 Pet. 3:9.
6. Ngande wele monga la lotumu efula lo olimu wa Jehowa tokondjiyɛka wahɔ?
6 Tokondjiyɛka wahɔ: Monga la lotumu efula lo olimu wa Jehowa ekɔ ekokelo le so. Dui sɔ tokimanyiyaka dia sho tetemala ‘nama oyelo wa lushi la Jehowa lo yimba’ ndo mbewɔ dia dikongɛ nɛ dia kɔlɔ di’akambo todja mindo. (2 Pet. 3:11-14; Tito 2:11, 12) Ɔnkɔnɛ, nyɛsɔ, ‘totshikale nge, toshikimale ndo tongake nshi tshɛ la lotumu efula lo olimu wa Nkumadiɔndjɔ’ teya ɔnɛ welo wadjaso lo olimu w’Okristo kema anyanya.—1 Kor. 15:58.