Toyange waaso wa sambisha
1 Etshumanelo k’Akristo kengama l’anto wele l’akambo wotshikitanyi. Koko, sho tshɛ tekɔ kâmɛ lo oyango wele laso wa tombola Jehowa. (Osam. 79:13) Woho akɔna wakokaso tana waaso wa sambisha etena kele wola, hemɔ, kana okakatanu okina haleke tosha diaaso dia sala dikambo sɔ?
2 Lo elimu wasalaso lushi la lushi: Yeso akakambaka mbala tshɛ l’akambo wakandasalaka lushi la lushi nde la anto dia sambisha. Nde akasambisha Mateo lam’akandatetaka lo dihole diafutshawɔ elambo, Zakɛyɔ lam’akinde lo lɔkɛndɔ, ndo womoto l’ose Samariya lam’akandomuyaka. (Mat. 9:9; Luka 19:1-5; Joa. 4:6-10) Sho lawɔ koka kamba la waaso wahomanaso l’anto lo elimu aso wa lushi la lushi dia sambisha onto tshɛ latɛkɛta laso. Mongaka wonya tshɛ la Bible, traktɛ kana tobukubuku ayotokimanyiya dia sho mongaka suke dia mbewoya anto akina elongamelo kaso.—1 Pet. 3:15.
3 Onde pâ kɛmɔtshi kele layɛ lo demba mbakoshimba diaha wɛ sambisha lo luudu la luudu? Naka ngasɔ kete ɔsa yɛdikɔ ya sambishaka enganga waya ndjokosakɛ ndo anto tshɛ waya dia ndjokenda. (Etsha 28: 30, 31) Naka tena dimɔtshi wɛ hakondja diaaso dia tomba tosambisha, onde wɛ ambohembaka sambisha lo telefɔnɛ kana lo mikanda? Kadiyɛso kɛmɔtshi akafundɛka ase nkumbo kande waki komonga Ɛmɛnyi wa Jehowa mikanda. Nde akâfundɛka tokanyi takeketsha t’oma lo Bible ndo awui wakahomanaka lande l’esambishelo.
4 L’olimu kana la kalasa: Nsaki kaso ka tombola Jehowa ayototshutshuya nto dia sho nyanga waaso wa monɛ ntɔngɔ y’akambo wa mɛtɛ l’olimu kana la kalasa. Opandjudi ɔmɔtshi w’ɛnɔnyi enanɛi akakɔndɔlɛ ase kalasa kawɔ kɛnɛ kakandadia lo Réveillez-vous! lo dikambo dia ngɔndɔ. L’ɔkɔngɔ wa nde mbeya lende akɔshi opandjudi ɔsɔ awui wakandatɛ asekande, ombetsha ande aketawɔ dia nongolaka Tshoto y’Etangelo ndo Réveillez-vous! mbala tshɛ kakawelaka Ɛmɛnyi periodikɛ shɔ. Lo dihole diaso di’olimu naka sho kitshaka dibuku Bible etshatɔ lo dihole diakoka anto mɛna, kete kɛsɔ ayokonya esadi eto dia anto tôka ambola, ko tayokondja diaaso dia mbâsambisha. Onde wɛ hakoke nyanga toho takokayɛ kondja waaso wa sambisha etena kakambayɛ elimu ayɛ wa lushi la lushi? Lo kamba dimɛna l’awui watokomɛ, nyɛsɔ toyaketembolake lushi tshɛ dia ‘nambolaka Nzambi olambo wa lotombo.’—Heb. 13:15.