Toyangake Anto Wakoka
1 Alako wakasha Yeso wendana la kotsha olimu w’esambishelo telaka ekakatanu. Nde akate ate: “Lam’ayunyukuma l’usumba kana lu ngelu tshe, kanyuyangi untu lukuki nyulungula.” (Mat. 10:11) Ɛlɔ kɛnɛ lam’ele anto hawoyoleka mbidjasɛ lawakawɔ, ngande wakokaso kotsha oyango aso wa nyanga anto wakoka lo yoho ya dimɛna na?
2 Nyɔsɛdingole Ɛtshi Kanyu ka Nkɛtɛ: Ntondotondo, nyɔsɛdingole ɛtshi kanyu ka nkɛtɛ. Wonya akɔna waleka anto monga lawakawɔ? Lende akokaso mbatana lo lushi? Onde ekɔ lushi lɔmɔtshi l’atei wa lomingu kana wonya ɔmɔtshi lo lushi wakokawɔ nongola dimɛna onto loye ndjowaenda? Mbɔtɔnganyiya olimu anyu l’ekongelo k’elimu wakamba anto lushi la lushi ndo l’akambo wele l’anto wele l’ɛtshi kanyu ka nkɛtɛ ayonyokimanyiya dia kondja etombelo w’ɔlɔlɔ efula.—1 Kor. 9:23, 26.
3 Apandjudi efula wakakondja etombelo w’amɛna mbut’ate wakatane anto efula lawakawɔ l’etatelo ka dikɔlɔ. Anto amɔtshi tanemaka la ngelo wenya ɛsɔ ndo ndekaka ngɛnangɛna sawola l’anto wenya akɔ. Esambishelo ka lo telefɔnɛ wenya w’akɔlɔ mbeyaka monga l’etombelo w’ɛlɔlɔ. Sambisha lo bɛtshi dia nkɛtɛ di’amundji w’ekanda ndo l’ahole watanema anto efula ekɔ nto toho tokina takokaso sambisha anto lokumu l’ɔlɔlɔ.
4 Lo ngɔndɔ kɛmɔtshi kakiwɔ l’olimu wa lânde, etshumanelo kɛmɔtshi akasale ekongelo ka sambishaka wenya w’akɔlɔ Lushi la Samalo ndo la Lomingu ndo la dikɔlɔ dia yɔɔ nshi hiende lo lomingu. Wakalɔngɔsɔla nto esambishelo ka lo telefɔnɛ ndo wakasambisha lo bɛtshi dia nkɛtɛ diadjasɛ amundji w’ekanda. Yɛdikɔ shɔ akatshutshuya apandjudi efula dia monga la wangasanu efula l’olimu ko etshumanelo akayɔsaka yɛdikɔ dia tetemala l’ekongelo kakɔ.
5 Nyosale la Wolo dia Sala Waendelo w’Eyoyo: Naka ekɔ wolo l’ɛtshi kanyu ka nkɛtɛ dia tana anto lawakawɔ etena kakalolanyu dia towaenda, kete l’ekomelo ka sawo tshɛ, pombaka wɛ mbokana l’onto dimɛna wonya wa wɛ ndjowenda nto, sala dikambo sɔ kânga mbala ka ntondo kosawodiyɛ l’onto. Oma lâsɔ, sala la wolo dia kalola towenda wonya wakanyokana. (Mat. 5:37) Naka kokaka, wɛ mbeyaka mimbola onto losawudi layɛ numelɔ kande ka telefɔnɛ. Kɛsɔ mbeyaka kokimanyiya nto dia wɛ ndjɛnana l’onto akɔ mbala kekina.
6 Sho mbetawɔka mɛtɛ dia Jehowa ayɔtshɔkɔla welo wadjaso dia nyanga anto wakoka ndo woho wawesaso nsaki tshɛ kɛnyawɔ.—Tuk. 21:5.