Tonge la mbekelo y’ɛlɔlɔ ya lo nyuma, ko tayolongola ɛtshɔkɔ efula
1. Lande na kele ekɔ ohomba efula sɛdingola mbekelo yayɛ ya lo nyuma?
1 Etena kakayakome Okristo, ondo wɛ akadje welo efula dia monga la mbekelo y’ɛlɔlɔ ya lo nyuma ɛnyɛlɔ oko wekelo wa Bible, wɔtwɛlɔ wa lo nsanganya y’Akristo, esambishelo ndo dɔmbɛlɔ. Wɛ akahame lo nyuma lo woho wakatshɔkɔla Jehowa welo ayɛ. Ondo kakianɛ ɛnɔnyi ɛmɔtshi wambeta tatɛ etena kakayalongola batismu. Onde wɛ eke la mbekelo y’ɛlɔlɔ ya lo nyuma yaki layɛ etena kakayakome Okristo?
2. Wahɔ akɔna wakondjaso oma lo wadielo wa Bible wa lushi la lushi?
2 Tɔsɛdingole mbekelo yaso ya lo nyuma: Onde wɛ ekɔ la mbekelo ka mbadiaka etenyi kɛmɔtshi ka Ɔtɛkɛta wa Nzambi lushi tshɛ? Sho mɛtɛ kondjaka ɛtshɔkɔ efula lo sala dui sɔ! (Jas. 1:8; Osam. 1:2, 3) L’Isariyɛlɛ w’edjedja, nkumekanga tshɛ akahombaka mbadia buku dia Ɛlɛmbɛ “nshi tshe ya lumu landi.” Naa ɛlɔlɔ wakandakondjaka? Nde akongaka la otema w’okitshakitsha ndo akekaka woho wa mboka Jehowa wɔma ndo diaha nde mboka wadjango Ande ɔkɔngɔ. (Euh. 17:18-20) Woho akɔ wâmɛ mbele ɛlɔ kɛnɛ, wadielo wa Bible wa lushi la lushi tokimanyiyaka dia sho tetemala monga anto waha l’onongo lo andja ɔnɛ wa kɔlɔ. Vɔ tokimanyiyaka nto dia sho ndjalɔngɔsɔla dimɛna dikambo di’olimu w’esambishelo.—Fil. 2:15; 2 Tim. 3:17.
3. Ɛlɔlɔ akɔna wakondjaso lo mbɔtɔka mbala la mbala lo nsanganya?
3 Yeso aki la mbekelo ka ntshɔka lo shinangɔnga lɛnɛ akawakɛtshanyaka Afundelo. (Luka 4:16) Aha la tâmu, dui sɔ diakokeketsha dia nde ndjɔlɔshana la ehemba wakahombe ndjohomana la nde l’ɔkɔngɔ diko. Sho lawɔ keketshamaka la wetshelo wa lo nyuma walongolaso lo nsanganya ya lo etshumanelo ndo lo ‘ekeketshelo kakeketshanaso lɔkɔ.’ (Romo 1:12) Woho wasanganaso l’anangɛso l’akadiyɛso tokimanyiyaka dia sho mbikikɛ ekakatanu wa lo nshi nyɛ y’ekomelo. (Heb. 10:24, 25) Onde wɛ ekɔ la mbekelo ka mbɔtɔka lo nsanganya yakɔ tshɛ mbala la mbala?
4. Wahɔ akɔna wakondjaso lo sambishaka lomingu tshɛ?
4 Ɛkɔndɔ wa lo Bible totɛka dia apɔstɔlɔ wakasambishaka lokumu l’ɔlɔlɔ ‘lushi la lushi lo tɛmpɛlɔ ndo lo luudu la luudu.’ (Etsha 5:42) Oyadi sho bu l’akoka wa sambishaka lushi tshɛ, onde sho kokaka monga la mbekelo ka sambishaka lomingu tshɛ lo toho tɔmɔtshi? Lo sala ngasɔ, tayomanyamanya Ɔtɛkɛta wa Nzambi, ndo ondo tayohomana l’awui wakeketsha lo sambisha anto akina akambo wa mɛtɛ wele lo Bible.
5. Lande na kele ekɔ ohomba nɔmbaka Jehowa mbala la mbala?
5 Ɔprɔfɛta Danyɛlɛ akatshɔkwama efula lo woho wakandakambɛ Jehowa ‘l’etete’ lo lɔsɛnɔ lande l’otondo. Nde aki ndo la mbekelo ka nɔmbaka mbala la mbala. (Dan. 6:10, 16, 20) Woho akɔ wâmɛ mbele Jehowa ayotosha nyuma kande k’ekila naka sho mbɔlɔmbaka mbala la mbala oma k’ɛse otema. (Luka 11:9-13) Ndo nto, Jehowa ayoyasukanya la so ndo ayetawɔ dia sho monga la diɔtɔnganelo di’ɔlɔlɔ lam’asaso la nde. (Osam. 25:14; Jak. 4:8) Ɔsɔ ekɔ mɛtɛ difuto dia woke! Ɔnkɔnɛ, nyɛsɔ tosale la wolo dia monga la mbekelo y’ɛlɔlɔ ya lo nyuma ko Jehowa ayotɔtshɔkɔla efula.