Okahanyelo wa lânde wa traktɛ wayosalema tatɛ Ngɔndɔ ka 10, 20 polo Ngɔndɔ ka 11, 16!
1 Tatɛ Lushi l’ɔtɔi Ngɔndɔ ka dikumi 20 ndo l’edja ka mingu nyɛi, tayosala okahanyelo wa lânde wa traktɛ k’oyoyo kele la ɔtɛ a dui ɔnɛ: Onde wɛ nangaka mbeya akambo wa mɛtɛ? Sho nongamɛka dia okahanyelo ɔsɔ wayosalema l’andja w’otondo wayoleka nomialomia nsaki k’anto efula dia vɔ ndjasha lo kiɔkɔ yâmɛ y’akambo wa mɛtɛ.—Joa. 17:17.
2 Traktɛ kɛsɔ mbishaka ekadimwelo wa shikaa w’oma lo Bible lo ambola asamalo w’ohomba efula anɛ: “Onde Nzambi tokanɛka mɛtɛ?” “Onde ata la asui wayoshila lushi lɔmɔtshi?” “Ngande wayalaso lam’avɔso?” “Onde elongamelo kɛmɔ kekɔ lo dikambo dia wavɔ?” “Ngande wakokami nɔmba dia Nzambi mbokami?” ndo “Ngande wakokami monga la ɔngɛnɔngɛnɔ lo lɔsɛnɔ?” Ɛtɛmwɛlɔ wa lo Lokristokristo hawosha ekadimwelo w’eshika lo ambola asɔ. Kânga anto efula wele bu Akristo ndjaokaka ambola asɔ, ndo ondo vɔ haweye dia ekadimwelo wa shikaa lo ambola asɔ tanemaka lo Bible. Diakɔ diele, sho nongamɛka dia anto efula wayɔngɛnangɛna losango lele lo traktɛ kɛnɛ.
3 Tokindjakindja ɛtshi kaso ka nkɛtɛ: Tosale la wolo dia kindjakindja ɛtshi kaso ka nkɛtɛ lo sambisha lo luudu la luudu. Naka nyekɔ la ɛtshi ka nkɛtɛ ka woke, kete dikumanyi kokaka nyokeketsha dia nyu tshika traktɛ kɛmɔtshi laka anto wahanyatanyi lawakawɔ etena katshɔnyu dia towaenda mbala ka ntondo. Tanyohɛke dia mbisha asukanyi, ewotɔ, asekanyu wa l’olimu kana wa la kalasa ndo anto wasawola la nyu mbala la mbala traktɛ kɛnɛ. Ondo nyu mbeyaka ndjalɔngɔsɔla dia kamba oko ambatshi mboka wa tshanda lo Ngɔndɔ ka dikumi ndo lo Ngɔndɔ ka dikumi l’ɔtɔi. Onde wɛ ekɔ la ɔna kana la ombeki wa Bible watahame lo nyuma wele ondo ekɔ l’akoka wa mbisha lonya l’okahanyelo wa lânde ɔnɛ oko opandjudi wahatabatizama? Naka eelo, kete ewoya dikumanyi.
4 Kɛnɛ kahombaso mbuta: Dia anto efula munandema la losango lele lo traktɛ kɛnɛ, ekɔ ohomba efula dia sho kamba la mbɔtwɛlɔ ka lo tshena pe. Oka ompokami dimbola dimɔtshi l’atei wa ambola asamalo wele lo lohoso ndo ɛnyande okadimwelo washa traktɛ. Dui sɔ diayokimanyiya apandjudi tshɛ dia vɔ mbɔtɔnganyiya mbɔtwɛlɔ yawɔ la ehomba wa l’ɛtshi kawɔ ka nkɛtɛ. Naka mɛnamaka dia anto amɔtshi wekɔ lo mɛnya nsaki, kete ɔsa adrɛsɛ awɔ dia ndjowaenda nto. Lo waa wikɛndɛ, tayoshaka anto periodikɛ yeke katomba kâmɛ la traktɛ. L’ɔkɔngɔ wa okahanyelo wa lânde ɔsɔ komɛ lo Ngɔndɔ ka dikumi l’ɔtɔi 16, tayosha anto dibuku Bible etshatɔ. Tayokambaka la traktɛ tshɛ yayotshikala woho wakambaso la traktɛ nkina.
5 Totate wekelo wa Bible: Traktɛ kɛnɛ kakalɔngɔsɔma dia tokimanyiya dia sho tatɛ wekelo wa Bible. Etena kakalolaso dia tenda anto wakɛnya nsaki, sho kokaka mbambola dia vɔ totɛ akambo wa mɛtɛ wa lo Bible wakâkeketsha. Towaɛnya lɛkɛ la komelo la traktɛ lɛnɛ ɔtɛkɛtshiwɔ woho wakoka onto kondja onto lawetsha Bible ndo towasha dibuku Bible etshatɔ. Naka kokaka, kete tɔsɛdingole odingɔ ɔtɔi kana ehende wa tshapita yele la awui akina efula wendana la ɔtɛ a dui wɔsɔnyinde.
6 Jehowa ekɔ lo nyanga anto wakoka mbɔtɛmɔla “lu nyuma la lu mete.” (Joa. 4:23) Nyɛsɔ sho tshɛ tosha lonya lo okahanyelo wa lânde ɔsɔ ndo tokimanyiya anto akina dia vɔ mbeya akambo wa mɛtɛ!