Toyale la dihonga ndo anto walanga ki
1 Efula k’anto wasambishaso wekɔ la dietawɔ diotshikitanyi la akambo wa mɛtɛ wele lo Bible. Kânga mbahombaso sambisha la dihonga, sho kombolaka nto ‘monga la anto tshɛ ki’ ndo mbewɔ dia nyangiya anto onyangiyanyangiya. (Romo 12:18; Etsha 4:29) Ngande wakokaso monga la dihonga ndo anto walanga ki etena kewoyaso losango la Diolelo?
2 Toyange dikambo dia sho mbɔtɔnɛ: Onto lalanga ki mbewɔka tâmu. Mɔnyɔla tshanana dietawɔ diasukɛ ompokami aso la wolo tshɛ hatowotshutshuya dia nde mbetawɔ losango laso. Naka nde ambɔtɛkɛta dui dimɔtshi dia kɔlɔ, kete la yewo tshɛ sho mbeyaka mbɔtshiya dui dimɔtshi diakokaso mbɔtɔnɛ la nde. Lo tɔtɔmiya dui diɔtɔnɛso sho tshɛ, sho mbeyaka monga la akoka wa munula tokanyi ta kɔlɔ tshɛ tele l’otema ande.
3 Onde naka tambotshika kanyi ya kɔlɔ y’ompokami aso, kete lâsɔ tamboyietawɔ kana tambokitshakitsha wolo wele la akambo wa mɛtɛ? Kema. Oko weso ekambi w’Akristo, ɔkɛndɛ aso kema wa manya kanyi tshɛ ya kɔlɔ y’anto wahomana la so, koko wa sambisha lokumu l’ɔlɔlɔ la Diolelo dia Nzambi. (Mat. 24:14) Lo dihole dia ndjakiyanya amboleka etena katondja onto kanyi ya kɔlɔ, sho koka ndjiɔsa oko diaaso dia mbishola tokanyi tande.—Tuk. 16:23.
4 Toshake ampokami aso kɛnɛmɔ: Ekɔ tena dimɔtshi diahombaso monga la dihonga etena kanyaso onto letsha wetshelo wa kashi. Koko, oko weso anto walanga ki, sho ndjalamaka diaha mɔnyɔla anto akina lo kamba la ɛtɛkɛta wa diɔnyɔ dia mɛnya woho wele wanɛ wetawɔ ndo wetsha wetshelo wa kashi. Dionga dia ndjadiya ndawoyaka anto, koko okitshakitsha ndo lɔsɛngɔ mbishaka wanɛ walanga akambo wa mɛtɛ diaaso dia mbeka. Nɛmiya ampokami aso ndo dietawɔ diawɔ mbakimanyiyaka dia vɔ mbetawɔ losango laso esadi eto.
5 Ɔpɔstɔlɔ Paulo akalɛmiyaka dietawɔ dia anto wakandasambishaka la oyango wa nde sambisha lokumu l’ɔlɔlɔ lo yoho yakakokaka minanda etema wa ampokami ande. (Etsha 17:22-31) La lolango lande, nde akayala “wehu w’antu tshe” dia nde “nshimbela amotshi.” (1 Kor. 9:22) Sho koka sala ngasɔ lo mongaka anto walanga ki etena kasambishaso lokumu l’ɔlɔlɔ la dihonga tshɛ.