“Nyodjasɛ l’anto tshɛ ki”
1. Dako diakɔna dia lo Bible diahombaso nkamba la diɔ etena kahomanaso l’ampokami watomalɛ?
1 Ekambi waki Jehowa nangaka ki ndo olimu aso w’esambishelo wekɔ olimu wa wɔladi. (Is. 52:7) Koko, lo tena dimɔtshi sho pomanaka l’anto watomalɛ l’ɔtɛ watshɔso dia towaembola. Kakɔna kayotokimanyiya dia sho mbidja wɔladi lo tena dia ngasɔ na?—Rɔmɔ 12:18.
2. Lande na kele ekɔ ohomba sho monga la shɛnɔdi?
2 Tonge la shɛnɔdi: Kânga mbele anto amɔtshi mbeyaka tomalɛ l’ɔtɛ wa tonawɔ akambo wa mɛtɛ, akina mbeyaka momala l’ɔtɛ w’ɛkɔkɔ ekina wahendana la losango laso. Mbeyaka monga ko tambotshɔ dia towaembola l’etena kewɔ la wesanu. Ompokami aso mbeyaka monga la nkɛlɛ l’ɔtɛ w’ekakatanu wele lande. Oyadi nde ambomala l’ɔtɛ wambotowosambisha, teye dia nde mbeyaka monga la nkɛlɛ l’ɔtɛ wa kɛnɛ kakawawetsha. (2 Kɔr. 4:4) Monga la shɛnɔdi ayotokimanyiya dia sho ntshikala ki ndo mbeya di’ɔnɛ aha sho mbomalɛnde.—Tuk. 19:11.
3. Ngande wakokaso mɛnya dia sho nɛmiyaka ompokami aso?
3 Tonge la dilɛmiɛlɔ: Anto efula wa l’ɛtshi kaso ka nkɛtɛ wekɔ la waetawɔ wambowotshininalaka lɔkɔ. (2 Kɔr. 10:4) Vɔ wekɔ la shadiya ya nsɔna dia tohokamɛ kana ntona. Hatohombe pondjo mɔnyɔla waetawɔ w’ompokami aso kana mɛnya dia sho mboleka mbeya Bible. Naka wambotɔlɔmba dia sho mimɔ, sho pombaka mimɔ la dilɛmiɛlɔ tshɛ.
4. Kakɔna kalembetshiya ntɛkɛta ɛtɛkɛta w’amɛna?
4 Tɔtɛkɛtake ɛtɛkɛta w’amɛna: Oyadi ompokami aso ambototondjɛ ɛtɛkɛta wa kɔlɔ, sho pombaka mbokadimola la yimba ya wɔlamu ndo l’ɛtɛkɛta w’amɛna. (Kɔl. 4:6; 1 Pet. 2:23) Lo dihole dia sho mana la nde, sho pombaka nsala la wolo dia nyanga dui diasangaso lolemi. Ondo sho kokaka mimbola ompokami aso ɛkɔkɔ wootshutshuya dia nde ntona kɛnɛ koosambishaso. Koko, dia mbewɔ diaha ndeka mbomadia, lo tena dimɔtshi ayoleka dimɛna sho memadia sawo.—Tuk. 9:7; 17:14.
5. Ɛlɔlɔ akɔna wakondjaso lo monga la memakana etena keso l’esambishelo?
5 Naka tekɔ anto wadja wɔladi, kete ompokami aso mbeyaka ndjohɔ dionga diaso ndo ndjohokamɛ opandjudi okina wayooyosambisha. (Rɔmɔ 12:20, 21) Kaanga mbakokande ntshininala lo tokanyi tande, lushi lokina nde mbeyaka ndjokoma Ɔmɛnyi wa Jehowa. (Ngal. 1:13, 14) Oyadi nde hetawe akambo wa mɛtɛ, teye dia tayotombola Jehowa ndo wetshelo aso naka sho ntetemala monga la ndjakimɛ ndo monga anto wadja ki.—2 Kɔr. 6:3.