Ekongelo k’oyoyo ka nsanganya ya l’etshumanelo
1, 2. Etshikitanu akɔna wendana la nsanganya wayosalema tatɛ Ngɔndɔ ka ntondo 2009?
1 Diewoyelo dia dimɛna efula diakewoyama lo nkumbo kaso k’onto l’ɔnango ka l’andja w’otondo lo lomingu la Ngɔndɔ ka nɛi 21-27, 2008. “Tatɛ lo Ngɔndɔ ka ntondo 1, 2009, Wekelo wa dibuku wa l’etshumanelo wayosalemaka kâmɛ la Kalasa k’olimu wa teokrasi ndo Losanganya l’olimu. Wekelo wa dibuku wa l’etshumanelo wayanga mbelamɛka Wekelo wa Bible wa l’etshumanelo.”
2 Ekongelo ka nsanganya shɔ ya lomingu la lomingu: Yɛdikɔ ya wonya tshɛ tshɛ ya nsanganya shɔ, mbidja ndo esambo la alɔmbɛlɔ ayongaka wonya 1 la minitɛ 45. Losanganya layotatɛka la osambo ndo dɔmbɛlɔ (min. 5) ko sala Wekelo wa Bible wa l’etshumanelo (min. 25). Oma lâsɔ ko mbeta mbala kakɔ ɔtɔi lo Kalasa k’olimu wa teokrasi (min. 30). Oma lâsɔ ko osambo (min. 5) wɔtshiya Losanganya l’olimu (min. 35). Losanganya layokomɛka la osambo ndo dɔmbɛlɔ (min. 5). Dia nyokimanyiya dia nɔngɔsɔlaka nsanganya shɔ, ekongelo ka Wekelo wa Bible wa l’etshumanelo, ekongelo ka Kalasa k’olimu wa teokrasi ndo ka Losanganya l’olimu kayotondjamaka ngɔndɔ la ngɔndɔ lo Olimu aso wa Diolelo.
3. Ngande wayɔlɔmbɔmaka Wekelo wa Bible wa l’etshumanelo?
3 Wekelo wa Bible wa l’etshumanelo: Losanganya lɔsɔ layɔlɔmbɔmaka oko Wekelo wa Tshoto y’Etangelo. Hatonga ohomba tatɛ la mbohola awui wakateke lomingu l’etshi. Losanganya lɔsɔ layotatɛka la mbɔtwɛlɔ ka mondo. Kɛsɔ ayosha anto tshɛ wele lo losanganya diaaso dia mbisha kɔmatɛrɛ ya lo tshena pe. Omendji-walɔmbɔla ayokahanyaka dikumanyi tshɛ ɔkɛndɛ wa nɔmbɔlaka losanganya lɔsɔ lomingu la lomingu.
4. Lo yoho yakɔna yayotshikitana Losanganya l’olimu?
4 Losanganya l’olimu: Losanganya l’olimu layotshikala woho akɔ wâmɛ, koko layongaka la asawo wa tomondo. Waewoyelo wayoshamaka minitɛ tshanu. Minitɛ shɔ yayokokaka dia mbisha waewoyelo amɔtshi w’ohomba ndo mbadia mikanda ɛmɔtshi w’oma lo Bɛtɛlɛ. Waewoyelo wele oko tɛdikɔ tendana l’olimu w’esambishelo, wɔmbɛlɔ wa Mbalasa ka Diolelo, alapɔlɔ wa kɔntɛ ndo mikanda ɛmɔtshi wokoyaka oma lo Bɛtɛlɛ hatonga ohomba mbadiemaka oma lo lɔyɛnga, koko vɔ wayohanemaka lo dibaya diahanɛwɔ waewoyelo di’anangɛso la akadiyɛso mbadia. Wanɛ wele l’ɛkɛndɛ pombaka ndjalɔngɔsɔlaka dimɛna, ndjela alako wakawawasha dimɛna ndo nɛmiya yɛdikɔ ya wonya yakawawasha.
5. Ngande wayosalemaka nsanganya lo lomingu la wembwelo w’omendji w’otshimbedi?
5 Wembwelo w’omendji w’otshimbedi: Ekongelo ka lomingu la wembwelo w’omendji w’otshimbedi hatotshikitana. Lushi la hende, l’ɔkɔngɔ wa memba osambo, Kalasa k’olimu wa teokrasi ndo Losanganya l’olimu layosalemaka. Oma lâsɔ, omendji w’otshimbedi ayoshaka sawo dia minitɛ 30. Oko wasalemadiɔ nshi nyɛ, lo lomingu la lânde, nyayɔsɔnaka dikɔlɔ dimɔtshi dia sala Wekelo wa Bible wa l’etshumanelo, l’ɔkɔngɔ wa wekelo nyayemba osambo ko oma lâsɔ omendji w’otshimbedi mbisha sawo di’olimu. Losanganya layokomɛka la osambo ndo dɔmbɛlɔ.
6. Naa ɔkɛndɛ w’omendji w’olui?
6 Nsanganya y’otsha l’olimu w’esambishelo: Olui wa dikumanyi wayɔsɔna emendji w’olui dia mendaka olimu w’esambishelo wasalema l’elui ndo namaka anto wakenga elui akɔ. Etena kasɔnama okambi w’olimu dia mɛmba ɔkɛndɛ ɔsɔ, nde ayelamɛka “okambi w’olui.”
7. Kakɔna kakokaso nongamɛ lo kɛnɛ kendana la ekongelo k’oyoyo ka nsanganya ya l’etshumanelo?
7 Oko wadiɛnya ekongelo, tayongaka la diaaso dia ngɛnangɛna la mbo ya ndɛ ya lo nyuma yakeketsha la dikɔlɔ sɔ. Dui sɔ diayotokimanyiya dia sho monga esambisha ndo embetsha wa tomanamana, wetshama dimɛna dia monga l’etombelo w’ɛlɔlɔ l’esambishelo.—Ef. 4:13, 14; 2 Tim. 3:17.
8. Ngande wayonga ndjalɔngɔsɔla la ntondo la wahɔ le so ndo le anto akina?
8 Nɔngɔsɔla nsanganya shɔ la ntondo ayotokimanyiya dia ndeka mbidja yimba lo awui woleki ohomba wayɔtɛkɛtama lo etenyi tshɛ ka losanganya. Tayonga la diaaso dia mbisha kɔmatɛrɛ ndo keketshanaka lam’asaso. (Romo 1:11, 12; Heb. 10:24) Oyango aso pombaka monga wa ‘ohamelo aso mɛnama lo sɛkɛ’ lo ‘nembetshiya ɔtɛkɛta w’akambo wa mɛtɛ dimɛna.’—1 Tim. 4:15; 2 Tim. 2:15.
9. Tamboyashikikɛ dia sala dui diakɔna, ndo lande na?
9 Sho ngɛnangɛnaka otshikitanu ɔsɔ w’ohomba efula wendana la nsanganya yaso ya l’etshumanelo. Nyɛsɔ sho tshɛ tokambake dimɛna la ɛlɔmbwɛlɔ katosha ‘ɔhɔmbɔ wa kɔlamelo ndo wa kɛsɔ’ ndo tongake suke la Olami aso wa Woke etena katɔlɔngɔsɔlande dikambo dia “fono” ka woke kaya suke.—Mat. 24:21, 45; Heb. 13:20, 21; Eny. 7:14.