Onde wɛ koka mbɔtɔ lo ‘soko dia woke diambodihwama dia ntsha olimu’?
1. Naa ‘soko dia woke dia ntsha olimu’ diambodihwama dikambo diaso?
1 Etena ‘kakawodihwɛ soko dia woke dia ntsha olimu,’ ɔpɔstɔlɔ Paulo akakambe la diaaso sɔ dia tetemala sambisha kânga mbakinde la atunyi efula. (1 Kor. 16:9) Ɛlɔ kɛnɛ, apandjudi wa Diolelo 642 000 wa lo andja w’otondo wekɔ lo mbɔtɔ lo soko dia woke diambowadihwɛ dia ntsha olimu lo koma ambatshi mboka wa pondjo.
2. Lande na kele ekɔ ohomba sho sɛdingolaka awui wele laso mbala la mbala?
2 Awui wele l’anto ndjotshikitanaka: Kânga mbele awui wele laso nshi nyɛ mbeyaka kitshakitsha olimu aso, teye dia awui ndjotshikitanaka. Omalɔkɔ, ekɔ dimɛna dia onto l’onto sɛdingolaka awui wele lande mbala la mbala ndo aha kongɛ paka etena kayonga awui tshɛ dimɛna. (Und. 11:4) Onde wɛ ekɔ ɔlɔngɔlɔngɔ kana osekaseka wayanga shidiya kalasa ya lâdiko? Onde wɛ ekɔ ombutshi wele ana wayanga tatɛ mbɔtɔ kalasa? Onde wɛ aya suke la nongola pasiɔ? Etshikitanu ɛsɔ mbeyaka kosha etena k’efula ndo kokimanyiya dia wɛ kamba olimu w’ombatshi mboka wa pondjo. Kadiyɛso kɛmɔtshi kakatataka efula akɔshi yɛdikɔ ya kamba oko ombatshi mboka etena kakinde l’ɛnɔnyi 89. Lande na? Lam’akandɛnyi dia nde ambosala ndekana ɔnɔnyi w’otondo aha la nde mbɔtɔ lo lopitadi, nde akayaoke dia nde kokaka kamba olimu w’ombatshi mboka.
3. Ngande wakasale anto amɔtshi etshikitanu dia vɔ koma ambatshi mboka wa pondjo?
3 Le Paulo, ntondotondo nde akalongamɛka dia tembola anango wa la Kɔrɛtɔ. Koko, nde akatshikitanya ekongelo kande dia wahɔ wa lokumu l’ɔlɔlɔ. Anto efula wele ambatshi mboka wa pondjo ɛlɔ kɛnɛ wakasale etshikitanu efula dia monga ambatshi mboka. Amɔtshi waketɛ nsɛnɔ yawɔ ɔsɛlɛngɛ lo kambaka olimu wa l’emunyi etenyi ka lushi dia ndjakotshɛka ehomba awɔ. Vɔ wekɔ lo ngɛnangɛna la diɛsɛ diawɔ di’olimu. (1 Tim. 6:6-8) Atshukanyi amɔtshi wakasale etshikitanu dia omi oto kambaka olimu, ko wadi kambaka olimu w’ombatshi mboka.
4. Kakɔna kakokaso sala naka sho kema l’eshikikelo dia tayokotsha yɛdikɔ ya wenya walɔmbama?
4 Totonake esadi eto kanyi ya kamba oko ombatshi mboka wa pondjo la wɔma w’ɔnɛ wɛ hokotsha yɛdikɔ ya wenya walɔmbama. Wenya ehende eto la yema mbalɔmbama lo lushi. Naka wɛ bu la eshikikelo dia wɛ koka kamba olimu ɔsɔ, kete hemba kamba oko ombatshi mboka wa tshanda ngɔndɔ ɔtɔi kana hiende koko la oyango wa kotsha wenya 70. Dui sɔ diayokokimanyiya dia wɛ ndɛta ɔngɛnɔngɛnɔ waya oma l’olimu w’ombatshi mboka. (Osam. 34:8) Sawola la wanɛ wele ambatshi mboka nshi nyɛ. Ondo vɔ lawɔ wakatondoya ekakatanu wafɔna la wɛnɛ wele layɛ. (Tuk. 15:22) Lɔmba Jehowa dia nde tshɔkɔla welo wadjayɛ dia pamia olimu ayɛ w’esambishelo.—1 Joa. 5:14.
5. Lande na kele olimu w’ombatshi mboka wa pondjo ekɔ oyango wa dimɛna wakokaso ndjadjɛ?
5 Oyango wa dimɛna: Kamba oko ombatshi mboka wa pondjo mbelaka ɛtshɔkɔ efula. Vɔ tokimanyiyaka dia monga la ɔngɛnɔngɛnɔ w’efula waya lo monga la lokaho l’efula le anto akina. (Etsha 20:35) Olimu w’ombatshi mboka wayolowanya akoka aso wa nembetshiya Ɔtɛkɛta wa Nzambi w’akambo wa mɛtɛ dimɛna. (2 Tim. 2:15) Vɔ wayoleka tosha waaso efula wa mɛna woho watosukɛ Jehowa. (Etsha 11:21; Fil. 4:11-13) Olimu w’ombatshi mboka wayotokimanyiya nto dia sho monga la waonga wa lo nyuma wele oko ekikelo ndo ayotokimanyiya dia sho ndeka ndjasukanya la Jehowa. (Jak. 4:8) Onde wɛ kokaka mbɔtɔ lo soko dia woke diambodihwama la ntondo kayɛ sɔ dia ntsha olimu ndo koma ombatshi mboka wa pondjo?