Onde tayokoya ohetoheto wa Jehowa nde la Yeso lo nshi ya Eohwelo nyɛ?

1. Lande na kadja Ɛmɛnyi wa Jehowa welo wa laande lo nshi ya Eohwelo?

¹ Jehowa ekɔ lo nkotsha sangwelo diande l’ohetoheto. Etena katɛkɛtadiɔ dia ɛtshɔkɔ ɛmɔtshi wayotela Diolelo diaki Nzambi, Isaya 9:7 mbutaka ɔnɛ: ‘Ohetoheto wa Jehowa kanga lolembelembe ayotsha ngasɔ.’ Woho akɔ mbele, etena kakandakambaka olimu ande lanɛ la nkɛtɛ, Ɔna Nzambi akɛnya ohetoheto w’efula lo dikambo di’ɔtɛmwɛlɔ wa mɛtɛ. (Jni. 2:13-17; 4:34) Ɔnɔnyi tshɛ lo nshi ya Eohwelo, miliyɔ y’apandjudi wa l’andja w’otondo mbidjaka welo wa laande dia mbokoya ohetoheto wa Jehowa nde la Yeso lo mpamia olimu awɔ w’esambishelo. Onde wɛ ayonga l’atei w’anto asɔ?

2. Kakɔna kayototshutshuya ohetoheto dia nsala ntatɛ oma lo Ngɔndɔ ka sato 7?

² Okahanyelo w’akatshi wa leeta wendana la Eohwelo: Ɔnɔnyi ɔnɛ, okahanyelo w’akatshi wa leeta l’oya lo Eohwelo wayotatɛ Lushi la samalo, Ngɔndɔ ka sato 7. Yalɔngɔsɔla oma ko kakianɛ dia wɛ mbisha lonya l’ohetoheto l’esambishelo. Tshumanelo diayonga l’ɔngɛnɔngɛnɔ efula etena kayodiokindjakindja bɛtshi dia diɔ dia nkɛtɛ lo yɛdikɔ yakoka. Sala la wolo dia mbelɛ ambeki ayɛ wa Bible, anto wakɛnya nsaki, asekayɛ wa l’olimu, ewotɔ ayɛ ndo asekayɛ wa la kalasa lo mbasha dikatshi dia leeta kana lo nkamba la jw.org.

3. Ngande wakokaso mpamia olimu aso w’esambishelo lo Ngɔndɔ ka sato ndo ka nɛi?

³ Olimu w’ombatshi mboka wa tshanda: Ohetoheto ayototshutshuya dia sho mpamia olimu aso w’esambishelo. Aha la taamu, anto efula wayonga l’akoka wa nkamba olimu w’ombatshi mboka wa tshanda lo Ngɔndɔ ka sato ndo ka nɛi nɛ dia lo diaaso sɔ, anto amɔtshi wayokoka nkamba oko ambatshi mboka wa tshanda lo nkimɔ wenya 30. L’ɔtɛmwɛlɔ anyu wa lo nkumbo kana lo wekelo w’onto ndamɛ, kana yimba lo dɔmbɛlɔ lo woho wakokayɛ nsala dui sɔ. (Tuk. 15:22) Waasaso ayɛ l’okahanyelo w’akashi wa leeta wendana la Eohwelo ayotshutshuya anto akina dia nsambisha l’ohetoheto. Naka wɛ nsala etshikitanu ɛmɔtshi l’oyango wa wɛ mpamia olimu ayɛ, kete wɛ ayokoya ohetoheto wa Yeso.—Makɔ 6:31-34.

4. Kakɔna kayotokondja naka sho mbokoya ohetoheto waki Jehowa nde la Yeso?

⁴ Naka sho mbokoya ohetoheto waki Jehowa nde la Yeso lo nshi ya Eohwelo nyɛ kete tayokondja etombelo w’amɛna. Tayosambisha anto efula wa l’ɛtshi kaso ka nkɛtɛ. Tayonga l’ɔlɔ w’efula ndo l’ɔngɛnɔngɛnɔ waya lo nkambɛ Jehowa ndo lo mbisha anto akina. (Ets. 20:35) Dui dioleki tshɛ ele, tayɔngɛnyangɛnya Nzambi kaso ka ohetoheto nde l’Ɔnande.