Losanganya la distrikɛ la Ɛmɛnyi wa Jehowa la l’ɔnɔnyi 2007 lele l’ɔtɛ a dui ɔnɛ: “Toyele Kristo!”
1, 2. a) Ngande wakakeketsha Mɔsɛ ase Isariyɛlɛ dia vɔ kondja wahɔ lo sanganaka kâmɛ? b) Ɛlɔngɔswɛlɔ akɔna wahombaso tatɛ sala nshi nyɛ?
1 Mɔsɛ akadjangɛ ase Isariyɛlɛ tshɛ ndo angɛndangɛnda dia vɔ sanganaka kâmɛ l’ɔkɔngɔ w’ɛnɔnyi esambele tshɛ dia tohokamɛ wadielo w’Ɛlɛmbɛ. L’oyango akɔna? “Dia vo mbuka la mbeka.” (Euh. 31:10-12) Jehowa akɛnyi ohomba wa tshumanya ekambi ande lo elui wa weke. Heta ndoko edja, ekambi waki Jehowa wayosangana nto nshi shato lo Losanganya la distrikɛ lele l’ɔtɛ a dui ɔnɛ: “Toyele Kristo!”
2 Onde wɛ ambotatɛ ndjalɔngɔsɔla? Onde ekɔ ohomba wɛ nɔmba owandji ayɛ w’olimu dikimɔ? Onde wɛ koka kimanyiya ambeki ayɛ wa Bible kana ase nkumbo kayɛ wele bu ambetawudi dia vɔ mbɔtɔ kâmɛ la yɛ lo losanganya la distrikɛ? Onde ekɔ anto akina wa l’etshumanelo wele l’ohomba wa ekimanyelo dia mbɔtɔ lo losanganya la woke lɔsɔ? Onde wɛ ekɔ lo ndjakongɛ dia tɔtɔ losanganya lokina lotshikitanyi la lɔnɛ layɔtɔ etshumanelo kanyu? Onde wɛ ayonga l’ohomba wa pango? Awui wayela anɛ wayokokimanyiya dia wɛ ndjalɔngɔsɔla.
3. a) Ɛtɛkɛta akɔna wa lo Isaya 25:6 wakotshama nshi nyɛ? b) Kakɔna kakɛnama lo kɛnɛ kendana la wɔtwɛlɔ w’anto lo losanganya la woke Lushi la tanu, ndo ahomba onto tshɛ sala?
3 Tonge nshi yakɔ shato: Jehowa mbishaka ekambi ande lokema la mbo ya ndɛ ya lo nyuma. (Is. 25:6) L’atei ayɔ mbele ndo nyɛ yalongolaso lo nsanganya yaso ya weke yasalema ɔnɔnyi tshɛ. Akɛnama dia lo losanganya la woke, anto mongaka yema tshitshɛ lushi la tanu lo mbɛdika la nshi nkina. Yadjɛ oyango wa mbɔtɔ nshi yakɔ shato ya losanganya dia ndeshama waa mma wa lo nyuma wambotɔlɔngɔsɔlɛ okongamelo wa Jehowa! Naka wɛ ayonga l’ohomba wa nɔmba owandji ayɛ w’olimu dikimɔ, kete dja dikambo diakɔ lo dɔmbɛlɔ. Oma lâsɔ, ‘onga la dihonga’ dia sawola la owandji ayɛ w’olimu kam’anyewoyawɔ datɛ diayosalema losanganya lakɔ. (1 Tes. 2:2; Neh. 2:4, 5) Mbeyaka monga dimɛna wɛ mbolembetshiya dia losanganya lanyu la woke lasalema ɔnɔnyi tshɛ lekɔ etenyi kɛmɔ k’ɔtɛmwɛlɔ anyu. Sala dui sɔ yema la ntondo koka kimanyiya owandji ayɛ w’olimu dia nde sala etshikitanu wahombama dia nde kosha dikimɔ.
4. Ngande wakokaso nɔngɔsɔla ambeki aso wa Bible ndo ase nkumbo yaso wele bu ambetawudi dia vɔ mbɔtɔ lo losanganya la woke?
4 Lɔngɔsɔla ambeki ayɛ wa Bible ndo ase nkumbo kayɛ: Ekɔ mɛtɛ dui di’ɔngɛnɔngɛnɔ dia wɛ monga kâmɛ la ambeki ayɛ wa Bible lo losanganya la woke, wɛna ngandji kaso k’onto l’ɔnango ka Akristo lo “lusanganya la wuki”! (Osam. 22:25) Ewoyawɔ la ntondo dia vɔ ndjaombɛ etena ka mbɔtɔ lo losanganya lɔsɔ. Ewoyawɔ ɛkɔkɔ wangɛnangɛnayɛ mbɔtɔ lo nsanganya ya weke. Wɛ koka nɔngɔsɔla ambeki dia vɔ mbeya kɛnɛ kayeta lɛkɔ lo mbaɛnya bandɛ vidɛo yele la tenyi dimɔtshi dia nsanganya ya weke yakete, djekoleko bandɛ vidɛo ka Unis grâce à l’enseignement divin. Ewoya ndo ase nkumbo wele bu ambetawudi ekongelo kayɛ. Ondo vɔ mbeyaka ndjalɔngɔsɔla dia tenda dramɛ kana dia mbɔtɔ kânga lushi ɔtɔi la losanganya la woke lɔsɔ kâmɛ la yɛ.
5. Ngande wakokaso kɛnɛmɔla yimba ya lokaho yatɛkɛtama lo 1 Timote 6:18?
5 Kimanyiya ananyɔ la akadiyɛyɛ: Ɔpɔstɔlɔ Paulo akalake Akristo waki la ɔngɔnyi wa l’emunyi “dia vo ntshela akina ololo, la dia vo ndjala engonyi wa lu elimu w’ololo, la dia vo ndjala la lukahu, ndu wuki akina ketshi.” (1 Tim. 6:17, 18) Sho koka kɛnɛmɔla yimba ya lokaho yakakeketsha Paulo shɔ naka sho mbidja yimba lo ehomba wa esombe w’anto la wanɛ wele la dikɔmɔ, wanɛ wakamba olimu wa lo tena tshɛ, nkumbo yele la ombutshi ɔtɔi, ndo ondo anto akina wa l’etshumanelo wakoka monga l’ohomba w’ekimanyelo dia mbɔtɔ lo losanganya la woke. Ɔkɛndɛ wa kotsha ehomba w’anto asɔ wekɔ ntondo l’ahɛka wa ase nkumbo yawɔ wele ambetawudi, koko dikumanyi la anto akina koka mɛnya shɛnɔdi ndo mbisha ekimanyelo kawɔ naka ekɔ ohomba.—Ngal. 6:10; 1 Tim. 5:4.
6. Lande na kahombaso mbɔtɔ lo losanganya layɔtɔ etshumanelo kaso?
6 Wɔtwɛlɔ wa lo losanganya lokina: Dia ndjashikikɛ ɔnɛ ahole wa mbidjasɛ, abuku, pango ndo awui akina wayonga lo yɛdikɔ yakoka, wɛ keketshamaka dia mbɔtɔ lo losanganya layɔtɔ etshumanelo kanyu. Koko, naka akambo wele layɛ hakosha diaaso dia wɛ mbɔtɔ losanganya layɔtɔ etshumanelo kanyu, kete lam’alangayɛ tengengake dia mbɔtɔ lo losanganya lokina.
7-9. a) Awui akɔna w’ohomba wahombaso nama lo yimba etena kayangaso pango ndo lande na? b) Tɛdikɔ takɔna tahombama mbɔsama naka anangɛso la akadiyɛso wambohanga lo Mbalasa ka Diolelo? c) Naa awui amɔtshi wahomba sɛdingɔma dia mbɔtɔ lo Losanganya la distrikɛ? (Enda kiombo yele lo lɛkɛ 4.)
7 Ohangelo: Mbala efula ahole w’ohangelo wa l’osomba wasalema losanganya mongaka lo mvudu y’anto (mvudu ya anangɛso la akadiyɛso), lo Mbalasa ya Diolelo kana laka ase nkumbo. Listɛ l’ahole tshɛ wayosalema nsanganya ya weke layohanema lo dibaya diahanɛwɔ waewoyelo l’etshumanelo l’ɔkɔngɔ wa sɛdingola dikatshi di’okotsha nɛ lo Losanganya l’olimu. Nɔmbamaka di’onto tshɛ kana yimba lo dɔmbɛlɔ ndo sɛdingola dihole diahombande mbɔtɔ losanganya la distrikɛ la l’ɔnɔnyi 2007.
8 Naka nyayolanga tohanga laka ɔnangɛso ɔmɔtshi kana lo Mbalasa ka Diolelo, kete tambɔlɔmba dia sekeletɛlɛ sala listɛ l’apandjudi tshɛ walɔmba pango nshi efula la ntondo ndo litomɛ Departɛma diendana l’ohangelo l’osomba wasalema losanganya. Lo listɛ lɔsɔ, nde pombaka funda lokombo l’onto, mɛnya dia nde ekɔ pami kana womoto, ɛnɔnyi ande ndo woho wotɔnde la onto akɔ naka laka owotɔ ande mbayondotohanga. Kɛsɔ ayokimanyiya anangɛso wakamba lo Departɛma di’ohangelo dia vɔ kondja etena ka nyangɛ anto tshɛ pango. Kɔmite k’olimu ka l’etshumanelo pombaka sɛdingola dionga di’opandjudi la ntondo ka toma listɛ lo Departɛma di’ohangelo. Naka wambotɛnya pango, kete hatonga dimɛna dia sho shoamɛ ndjayangɛ dihole dikina dia todjasɛ laka ɔnangɛso okina kana laka ɔngɛnyi aso. Kɛsɔ ayetɛ ɔkɛndɛ wa anangɛso wakamba lo Departɛma di’ohangelo wotsho. Koko, naka onto ayotodjasɛ nshi ya losanganya laka ose nkumbo kande lele bu ɔnangɛso la lo nyuma, kete atokimɔke lokombo lande le sekeletɛlɛ dia nde mbodja lo listɛ l’anto walɔmba pango.
9 Tambolanga nyosha alako amɔtshi wendana la ohangelo wa lo Mbalasa ka Diolelo. Kɔmite ka losanganya la distrikɛ ayɔsɔna ekumanyi kɛmɔtshi dia mendaka dikambo sɔ. Nde ayonga la okimanyedi, ndeka dimɛna ekumanyi kekina kana okambi wakimanyiya wele la lonyuma la dimɛna ndo wakoka. Mbalasa la dia kahanyema lo tenyi pende: Etenyi kɛmɔtshi dikambo di’akadiyɛso l’anawɔ ndo ana wa wamato ndo etenyi kekina dikambo di’anangɛso la ana w’apami. Mbalasa ka Diolelo ayonga paka dikambo dia ndalaka tsho. Lo nshi yayotshɔka anto tshɛ lo losanganya ko ndoko onto layonga lawɔ, pombaka nɔngɔsɔla olimu wa djamu ko anto mengɔnyaka diaha wovi ndjova diangɔ di’anto. Anangɛso wele la lonyuma la dimɛna mbahomba sala olimu wa djamu ɔsɔ. Ndoko onto lahomba katɛ l’etei ka Mbalasa ka Diolelo. Kokaka mbika tshombotombo yakoka ndjohandjɔma lo sɛkɛ dia Mbalasa ka Diolelo dia anto katɛka paka lo nshi yasalema losanganya. L’ekomelo ka losanganya, tshombotombo shɔ pombaka pandjɔma. Ekɔ ohomba dia mbalasa ndo sɛkɛ diatɔ mongaka wonya tshɛ pudipudi ndo kɔmba. Pombaka menda ɔlɔlɔ diaha ndanya ndoko ɛngɔ ɔtɔi ka lɔkɔ. Wanɛ wayohanga lo mbalasa wayosala la wolo tshɛ dia monga la lɔkɛwɔ l’ɔlɔlɔ lakoka le Akristo wa mɛtɛ lam’asawɔ ndo otsha le asukanyi.—1 Kor. 10:31
10, 11. a) Ɛlɔngɔswɛlɔ akɔna wakasalema dikambo diaso la ntondo ka sho koma lo dihole diayosalema losanganya? b) Ngande wakokaso mɛnya dia sho ngɛnangɛnaka ndo tekɔ la lowando l’elimu tshɛ wakakambema dia wahɔ aso? (Adia Heberu 13:17.)
10 Tokambe kâmɛ la tɛdikɔ takɔsama: Etena kakomaso lo dihole diayosalema losanganya, sho mɛnaka dia wakakambe olimu efula dia nɔngɔsɔla oyelo aso. Anangɛsɔ wa ngandji walongola anto tolongolaka, toshaka ekongelo ndo tokimanyiyaka dia tɛnya ahole wahombaso mbidjasɛ. Anangɛso l’akadiyɛso waketɛ sɛkɛ pudipudi ndo wakalɔngɔsɔla lɔyɛnga la dimɛna. Olimu wa wolo wakasalema nto l’ɔkɔngɔ wa lɔyɛnga dia nɔngɔsɔla asawo, ohangelo ndo awui akina.
11 Lo losanganya la distrikɛ tshɛ, anto efula kambaka olimu lo edja ka ngɔndɔ mɔtshi dia sala ɛlɔngɔswɛlɔ wahombama, ndo nkumbo yawɔ mbishaka lonya lo mbasha diaaso dia vɔ kamba elimu w’ohomba ɛsɔ. Shi sho ngɛnangɛnaka kɛnɛ tshɛ kakasalema dia wahɔ aso? Sho koka mɛnya lowando laso lo ndjelaka alako wele lo sawo nɛ ndo alako tshɛ wayotokoka nongola la ntondo ka losanganya laso la woke. (Heb. 13:17) Naka sho tshɛ kamba kâmɛ, kete dikambo sɔ diayokimanyiya dia akambo tshɛ ‘salema dimɛna ndo aha la ofukutanu.’—1 Kor. 14:40.
12. a) Lande na kele nsanganya y’ekambi waki Jehowa yekɔ ohomba efula lo nshi yaso nyɛ? b) Kakɔna kakoka onto tshɛ la l’atei aso sala oma ko kakianɛ?
12 Oko ‘weyaso dia lushi lakɔ laya suke’ nsanganya y’ekambi waki Nzambi yekɔ dui dioleki tshɛ ohomba. (Heb. 10:25) Lo nsanganya yaso ya weke y’Akristo, olui w’ɔhɔmbɔ wa kɔlamelo ndo wa kɛsɔ tewoyaka akambo efula dia tokimanyiya “dia nama ololo dia ntsha aui tshe” walanga Jehowa dia sho ndjela. (Euh. 31:12) Totate ndjalɔngɔsɔla oma ko kakianɛ dia mbɔtɔ nshi yakɔ shato ya Losanganya la distrikɛ lele l’ɔtɛ a dui ɔnɛ: “Toyele Kristo!” dia sho kondja wahɔ oma lo wetshelo tshɛ wa lo nyuma ndo lo lɔngɛnyi l’ɔngɛnɔngɛnɔ la la asekaso!
[Kiombo ya lo lɛkɛ 3]
Ekongelo ka wenya
Lushi la tanu ndo la samalo
9:20 la pindju - 5:05 l’ɔkɔngɔ a midi
Lushi la lomingu
9:20 la pindju - 4:10 l’ɔkɔngɔ a midi
[Kiombo ya lo lɛkɛ 4]
Awui amɔtshi wa sɛdingola dia mbɔtɔ lo Losanganya la distrikɛ
1. Naka wɛ pombaka minda lɔkɛndɔ l’otale dia tɔɔtɔ lo losanganya la distrikɛ, kete tatɛ momba falanga ya lɔkɛndɔ ndo y’olelo ayɛ wɛ la nkumbo kayɛ lɛkɔ.
2. Kanyokanyiya nto dia sukɛ ɔlɔngɔswɛlɔ wa losanganya la weshasha anyu wa la lolango. ‘Tanyɛnamake la ntondo ka Jehowa anya hwe,’ koko ‘nyɔlɛmia Jehowa la diangɔ dianyu dia nɛmɔ.’—Euh. 16:16; Tuk. 3:9.
3. Lo wonya wa losanganya, sho tombolaka lokombo la Jehowa oma lo lɔkɛwɔ l’ɔlɔlɔ ndo oma l’ɔlɔtɔ aso wa pudipudi ndo wa kɔmba.—1 Kor. 10:31.
4. Ntsha tshɛ dia ndjela kɛnɛ kata anangɛso walongola anto ndo wele la ɔkɛndɛ wa mbisha anto ahole. Tâmbɛke ahole wamambɛ onyake paka dikambo di’ase nkumbo kayɛ kana dia wanɛ woye la yɛ.
5. Dia wɛ kondja wahɔ efula oma lo etenyi ka l’ɔkɔngɔ a midi, tɔlɛke diangɔ dia wotsho lo wonya wa diomuyelo. Nɛ dia mbo ya ndɛ ya wotsho koka kosha djɔ.—Luka 8:18.
6. Pudipudi tombolaka Jehowa. L’ekomelo k’etenyi tshɛ ka losanganya, onto l’onto koka mbisha lonya dia tshika dihole dia losanganya pudipudi lo tɔngɔnaka akatshi la diangɔ dikina dia ngasɔ ko dikadja l’ahole wakalɔngɔswama dia mbikadjaka mindo.—1 Pet. 1:15, 16.