Vidɛo kalembetshiya dui dimɔtshi di’ohomba di’aseka enganga

Aseka lɛɛta ndo enganga wekɔ lo taleke mbidja yimba lo tokanyi ndo lotshungɔ lele la ɛkɔnyi. Dui sɔ diambokimanyiya dia vɔ tondja ekanga ndo esakelo ekina wakoka Ɛmɛnyi wa Jehowa kondja wahɔ oma lɔkɔ. (Etsha 15:​28, 29) Kɛsɔ mbatɔtɔmiyama lo vidɛo kele l’ɔtɛ a dui ɔnɛ: Soigner sans transfusion : besoins et droits du patient. Enda vidɛo kakɔ ndo oma lâsɔ vusola kɛnɛ kamboyeka oma lɔkɔ.​—⁠Diewoyelo: Lam’ele lo vidɛo kɛnɛ vɔ mɛnyaka lo tshena pe woho wasalema epaso, lâsɔ ambutshi la dia monga la yewo etena kendawɔ vidɛo kɛnɛ la anawɔ wa totshitshɛ.

1) Lande na kele enganga ɛmɔtshi wamboyokana yimba nto lo kɛnɛ kendana la okaloyelo wa dikila? 2) Sha bɛnyɛlɔ sato dia epaso wa wolo wakoka salema aha la kaloya dikila. 3) Ngande wakɛnya adɔkɔtɛlɛ ndo enganga wasala anto epaso wa lo andja w’otondo woho walangawɔ sakɛ ɛkɔnyi aha la kaloya dikila? Lande na ketawɔwɔ sala dui sɔ? 4) Kakɔna kakɛnya wekelo weke ka salema nshi nyɛ lo dikambo diendana la okambelo wa la dikila? 5) Wâle akɔna watomba oma lo okaloyelo wa dikila? 6) Kakɔna kamboyokoma ambewi efula lo mbuta lo kɛnɛ kendana la ɛlɔlɔ waya lo mbisha onto ekanga wafudia dikila? 7) Ele lo kiɔkɔ ya oshilelo wa dikila lo demba? Polo lo yɛdikɔ yakɔna yakoka anto mbetawɔ okitekitelo wa dikila aha la etombelo wa kɔlɔ efula? Kakɔna kakoka salema dia kaloya dikila diakɔ? 8) Ngande wakoka keketshama osalelo wa globules rouges lo demba di’ɔkɔnyi? 9) Toho takɔna takambema latɔ dia kitshakitsha otombelo wa dikila wonya w’epaso? 10) Onde ekanga wakoka onto mbɔsa dia fudia dikila kokaka monga dimɛna le ana w’akɛnda kana le anto waya l’ase eko la nyɔi? 11) Naa tɔndɔ dioleki dia esakelo ka dimɛna k’aseka enganga? 12) Lande na ekɔ ohomba le Akristo dia vɔ tasɔnyi la ntondo esakelo wahalɔmbɛ kaloya dikila wakokawɔ mbetawɔ? Ngande wakokaso sala dui sɔ?

Mbetawɔ esakelo ɛmɔtshi wɛnyishami lo vidɛo kɛnɛ ekɔ yɛdikɔ yahomba onto ndamɛ mbɔsa lo ndjela nkum’otema kande kaketshama oma lo Bible. Onde wɛ amboshila sɔna ekanga wafudia dikila wayoyetawɔ dikambo diayɛ ndo dia anayɛ? Ase nkumbo kayɛ wele kema Ɛmɛnyi wa Jehowa pombaka mbeya dimɛna tɛdikɔ tayɛ ndo ɛkɔkɔ wakotshutshuya dia sala ngasɔ.​—⁠Enda “Wembola w’oma le ambadi” wele lo Tshoto y’Etangelo ya Ngɔndɔ ka samalo 15, 2004 ndo Tshoto y’Etangelo ya Ngɔndɔ ka dikumi l’ɔtɔi 1, 2000 lo Falase.