Ekadimwelo lo ambola anyu

◼ Onde ekɔ dimɛna di’Ɔmɛnyi wa Jehowa sakemɛ lo lopitadi l’ase ɔtɛmwɛlɔ ɔmɔtshi?

Ɛtɛmwɛlɔ efula wekɔ la mpitadi. Mbala efula, mpitadi shɔ kosalema la oyango wa sukɛ Babilɔna ka Woke. (Eny. 18:2, 4) Ondo mpitadi shɔ yakasalema la oyango wa mbɔtshiyaka falanga. Ɛlɔ kɛnɛ, mpitadi mɔtshi yambotshikala la nkombo tsho y’ɛtɛmwɛlɔ nɛ dia ase ɔtɛmwɛlɔ mbakayike ndo nkina yekɔ lo nɔmbwama oma le ewandji w’ɛtɛmwɛlɔ.

Naka Ɔmɛnyi wa Jehowa nangaka ntshɔ lo lopitadi, kete ndamɛ mbahomba mbɔsa yɛdikɔ ya kana nde koka ntshɔ tosakemɛ lo lopitadi l’ase ɔtɛmwɛlɔ ɔmɔtshi kana bu. Nkum’otema k’onto ɔmɔtshi mbeyaka mbetawɔ dia nde ntshɔ tosakemɛ lɛkɔ, koko nkum’otema k’onto okina mbeyaka tona. (1 Tim. 1:5) Ekɔ awui amɔtshi wakoka konya onto dia nde mbɔsa yɛdikɔ, ndo ekɔ ohomba sɛdingola awui akɔ.

Ɛnyɛlɔ, mbeyaka monga ko lopitadi l’ase ɔtɛmwɛlɔ mbele tshɔi yakɔ ya lopitadi lele suke. Kana naka kânga lopitadi lokina lekɔ suke, paka lo lopitadi l’ase ɔtɛmwɛlɔ loto mbasakawɔ dimɛna. Mbeyaka monga ko lopitadi l’ase ɔtɛmwɛlɔ loto mbele la dihomɔ diahombama dia saka hemɔ kɛmɔtshi ka lânde, kana lɛkɔ mbakamba munganga walangaso dia nde tosakɛ. Ndo mbala mɔtshi mbeyaka monga ko paka lopitadi l’ase ɔtɛmwɛlɔ loto mbalɛnya yɛdikɔ yayɛ y’Okristo yaha kaloya dikila, etena kele mpitadi nkina hawetawɔ. Ɔsɔ ekɔ akambo amɔtshi wahombayɛ sɛdingola etena kɔsayɛ yɛdikɔ ya ntshɔ lo lopitadi lɔmɔtshi.

Naka wɛ ambɔsa yɛdikɔ ya ntshɔ lo lopitadi l’ase ɛtɛmwɛlɔ, kete wɛ mbeyaka mbɔsa dui sɔ oko onto lafuta onto ɔmɔtshi l’ɔtɛ w’olimu wokosalende. Wɛ mbeyaka mbɔsa di’oko ase ɔtɛmwɛlɔ akɔ okanda mbandawɔ, ɔnkɔnɛ akuta wayoyofuta lo lopitadi lɔsɔ bu la oyango wa sukɛ ɔtɛmwɛlɔ wa kashi. Koko wɛ ekɔ lo futa falanga l’ɔtɛ w’olimu wokokambewɔ.

Lo mɛtɛ, oko weyɛ Okristo, lo tena dia ngasɔ wɛ pombaka ndjashikikɛ dia wɛ hasukɛ ɔtɛmwɛlɔ wa kashi. Ndo nto, wɛ hohomba mbelɛ wanɛ wakamba kana waya lo lopitadi la nkombo ya lɔtɛtɛmɔla yele oko “Mɔpɛrɛ” kana “Masɛrɛ”. (Mat. 23:9) Wɛ mbeyaka mbɔsa lopitadi lɔsɔ oko okanda mbasalawɔ mbamboyotshɔ lɛkɔ dia tosakemɛ ko pe.

Lam’ayoyotshɔ lo lopitadi la ngasɔ, ekɔ ohomba wɛ mbatɛ dia wɛ ekɔ Ɔmɛnyi wa Jehowa ndo wɛ ayokombola dia dikumanyi dia l’etshumanelo kanyu ndjokendaka. Dui sɔ diayokoshikikɛ dia wɛ ayolongola ekimanyielo ka lo nyuma ka dimɛna lo nshi yayotshikala lo lopitadi.​—1 Tes. 5:14.

Ase nkumbo wele ambetawudi, dikumanyi ndo anto akina wa l’etshumanelo pombaka kotsha ehomba wa lo nyuma w’ɔnangɛso kana kadiyɛso kele lo lopitadi lɔmɔtshi l’ase ɔtɛmwɛlɔ. Welo wayodjama lo dikambo sɔ ayokeketsha ɔkɔnyi lo yɛdikɔ y’efula ndo ayowokokɛ diaha nde ndjadja lo awui wa lo ɔtɛmwɛlɔ aha la nde mbeya, ɛnyɛlɔ oko sala sɛlɛmɔnyi mɔtshi ndo awui akina wasalema lo lopitadi lakɔ.

La akambo asɔ tshɛ lo yimba, onto tshɛ ayokana yimba dimɛna ko oma lâsɔ onto l’onto mbɔsa yɛdikɔ yande ndamɛ lo kɛnɛ kendana la lopitadi lahombande tosakemɛ.​—Ngal. 6:5.