Wekelo wa Bible w’onto ndamɛ ndo wa lo nkumbo wekɔ ohomba!
1. Okiyanu akɔna wa lânde wele l’Olui-walɔmbɔla lo dikambo diaso l’etena kɛnɛ, ndo lande na?
1 Oko wakidiɔ lo ntambe ka ntondo, Olui-walɔmbɔla wekɔ lo ndjakiyanya efula lo wahɔ w’ekambi waki Jehowa. (Etsha 15:6, 28) Oko wamboleka sukana fɔnu ka woke, ekɔ ohomba efula di’opandjudi tshɛ wa Diolelo monga la diɔtɔnganelo di’ɔlɔlɔ la Jehowa. Ngande wayoyokamba la wenya ayɛ wakayetshaka lo Wekelo wa dibuku wa l’etshumanelo? Anto tshɛ keketshamaka dia kamba la wenya ɛsɔ lo ɔtɛmwɛlɔ wa lo nkumbo. Kamba dimɛna la wenya ɛsɔ ayotokimanyiya dia sho tshimola l’Ɔtɛkɛta waki Nzambi wakasambiyama ndo kondja wetshelo washa lɔsɛnɔ w’oma lɔkɔ.—Osam. 1:1-3; Romo 11:33, 34.
2. Ngande wakokaso nɔngɔsɔla ɔtɛmwɛlɔ wa lo nkumbo wa la dikɔlɔ?
2 Ɔtɛmwɛlɔ wa lo nkumbo wa la dikɔlɔ: Ɛtɛ wa nkumbo wekɔ l’ɔkɛndɛ la ntondo ka Jehowa dia ndjashikikɛ dia wekɔ lo ndjela ekongelo ka wekelo wa Bible wa lo nkumbo dimɛna ndo wekɔ lo salema mbala la mbala. (Euh. 6:6, 7) Anangɛso l’akadiyɛso w’enyemba ndo wele kema l’ɛkɛndɛ wa lo nkumbo wayokambaka la wenya ɛsɔ dia salaka wekelo wa Bible w’onto ndamɛ ndo eyangelo. Ekɔ ohomba efula dia sho tshɛ ‘ndjatshungwɛ etena’ dia salaka wekelo ndo kanaka yimba dia monga nge lo nyuma lo ‘nshi ya kɔlɔ’ nyɛ.—Ef. 5:15, 16.
3, 4. Alako akɔna wambowotosha lo kɛnɛ kendana la awui wahombaso mbeka, ndo kakɔna kahombaso mbohɔka?
3 Awui wa mbeka: Index des publications Watch Tower kana Watchtower Library ka lo CD-ROM kokaka nyokimanyiya dia nyu mbishola awui wakoka ngɛnyangɛnya ase nkumbo kanyu wonya wa wekelo. Nyu mbeyaka sɛdingola asawo w’oma lo Tshoto y’Etangelo, ɛnyɛlɔ asawo wele l’ɔtɛ a dui ɔnɛ: “Awui wakimanyiya dia nkumbo monga l’ɔngɛnɔngɛnɔ,” “Nyetsha ananyu” ndo “Dikambo dia ɛlɔngɔlɔngɔ la esekaseka aso.” Ndo nto, Réveillez-vous ! mongaka la asawo wele l’ɔtɛ a dui ɔnɛ: “ Les Jeunes s’interrogent ” ndo asawo w’amɛna efula watɛkɛta dikambo dia etongelo.
4 Mbadiaka Bible kâmɛ dimɛna dimɛna ayokimanyiya ase nkumbo tshɛ dia vɔ mbohɔka atɔndɔ waki Nzambi ndo kamba la wɔ lo nsɛnɔ yawɔ. (Heb. 4:12) Lo waaso akina, nyu mbeyaka menda ndo kɛtshanya bandɛ vidɛo kɛmɔtshi kakatondja okongamelo. Wɛ kokaka sɔna awui akina wa mbeka ndo woho wa nyu mbeka. Lande na kahayambola ase nkumbo kayɛ kɛnɛ kayowolanga mbeka?
5. Lande na kele wekelo wa Bible w’onto ndamɛ ndo wa lo nkumbo wekɔ ohomba efula ɛlɔ kɛnɛ?
5 Lande na kele dui sɔ ohomba nshi nyɛ: Keketsha lonyuma laso ayotokimanyiya dia sho ‘memala ki ndo menda panda ka Jehowa.’ (Etum. 14:13) Ambutshi wekɔ l’ohomba w’ɛlɔmbwɛlɔ kaki Nzambi dia vɔ mbodia anawɔ “l’atei a lolonga la kolo ndu lahasimbwi.” (Fil. 2:15) Ana wekɔ l’ohomba w’ekimanyielo dia vɔ mbeya nsɛna l’anto wele la lɔkɛwɔ lambolana la kalasa ɛlɔ kɛnɛ. (Tuk. 22:3, 6) Atshukanyi pombaka keketsha diɔtɔnganelo dia lam’asawɔ dia “ushinga weli la ekodi esatu” la Jehowa. (Und. 4:12) Omalɔkɔ, nyɛsɔ tokambe dimɛna la etena kambotshikala dia sho keketsha “mbetawo ka[so] kuleki ekila”!—Jude 20.