Ekadimwelo lo ambola anyu

◼ Onde kokaka dia tshumanelo kana ase etshumanelo kamba la logo yakamba la atshunda weyama le lɛɛta wakamba la Ɛmɛnyi wa Jehowa?

Logo kɛdikɛdi lokombo, djembetelo (kana sango) diosalemi dia mbeya tshunda dimɔtshi. Watch Tower ekɔ logo la Watch Tower Bible and Tract Society of Pennsylvania ndo la atshunda akina wakamba l’okongamelo. Etshumanelo k’Ɛmɛnyi wa Jehowa kambaka la Bible kodihwami oko logo latɔ. Atshunda akina weyama le lɛɛta wakamba la Ɛmɛnyi wa Jehowa wekɔ la logo yotshikitanyi.

Tshumanelo kana ase etshumanelo hawohombe kamba la logo kana nkombo nkina y’okongamelo yeyama le lɛɛta lo Mbalasa yawɔ ya Diolelo, l’ɛtɛ wa mikanda awɔ ndo l’awui akina. Okambelo wa ngasɔ wa la logo y’okongamelo mbeyaka mbela ofukutanu le ewandji wa lɛɛta, apandjudi ndo anto akina lo kɛnɛ kendana la diɔtɔnganelo diele lam’asa etshumanelo la nkombo yakamba l’okongamelo yeyama le lɛɛta. Woho akɔ wâmɛ mbele, mikanda watomanɛ anto akina koka ndjɔsama oko mikanda w’oma lo mbalasa ka woke kalɔmbɔla olimu wa l’andja w’otondo kana w’oma le Bɛtɛlɛ.

Anto hawohombe kamba la logo la Watch Tower kana la lokombo lokina lo Mbalasa ya Diolelo yayokama lo nshi yayaye oyadi kânga tshunda dimɔtshi diaki Watch Tower mbakanga mbalasa yakɔ. Tshumanelo diele la logo shɔ lo Mbalasa yawɔ ya Diolelo hadiɔlɔmbama dia ndjidimola esadi esadi nɛ dia dui sɔ mbeyaka nɔmba etshikitanu wa weke, wenya, welo ndo falanga efula. Koko, diɔ pombaka menda dia kana vɔ kokaka sala otshikitanu ɔsɔ naka bu wa woke ndo hawotɔlɔmba olimu efula. Naka aha ngasɔ, kete otshikitanu koka ndjosalema etena kayowoyɔlɔngɔsɔla Mbalasa ka Diolelo.