Tetshake anto lo yoho ya wɔdu
1. Naa dikambo dimɔtshi dialɔmbama dia anto shihodia wetshelo aso?
1 Mbetsha lo yoho ya wɔdu ekɔ ohomba efula dia anto shihodia wetshelo aso. Sɛdingola woho waketshaka Ombetsha a woke, mbuta ate Yeso, kokaka tokimanyiya dia sho ndowanya ‘diewo diaso dia mbetsha.’—2 Tim. 4:2; Joa. 13:13.
2. Kakɔna kalɔmbama dia mbetsha anto lo yoho ya wɔdu, ndo etombelo akɔna wonga la wetshelo wa ngasɔ?
2 Tɔtɛkɛtɛ lo yoho ya wɔdu: Dako dia lo dikona diekɔ la akambo amɔtshi wa mɛtɛ w’ohomba wahatatɛkɛtamaka oma le onto okina, koko vɔ tɛkɛtama lo yoho ya wɔdu. (Mat., tshap. 5-7) Elui w’anto wakahokamɛka Yeso “wakambi dia wetshelu andi.” Asɔlayi wakawatome dia towonda wakatshutshuyama dia mbuta ɔnɛ: “Nduku untu edja ndu kakiane akateketa wuhu oso.” (Mat. 7:28, 29; Joa. 7:46) Bu ohomba sho kamba la ɛtɛkɛta wa wolo, ditelo dia wolo kana bɛnyɛlɔ dia wolo dia sho mbetawoya anto akina akambo wa mɛtɛ dimɛna. Sho kokaka nembetshiya akambo wa mɛtɛ lo kamba la ɛtɛkɛta wa wɔdu.
3. Lande na kayanga anto amɔtshi dia pɔpa ampokami awɔ la awui efula, ndo ngande wakokaso mbewɔ dui sɔ?
3 Toshikikɛ lofulo l’awui wahombaso mbetsha: Yeso akadjaka yimba lo dikambo di’ampokami ande dia nde shikikɛ awui angana wakokande mbatɛ l’etena kâmɛ. (Joa. 16:12) Sho pombaka sɛdingolaka anto ndo mbɔtɔnganyiyaka wetshelo aso l’ehomba awɔ, djekoleko etena kasambishaso ewotɔ aso, eyoyo kana ana w’akɛnda. Sho pombaka monga la yewo diaha mbapɔpa la awui efula kânga etena kɛnama dia vɔ wekɔ lo tohokamɛ la yambalo tshɛ. Wanɛ wele l’etema w’ɛlɔlɔ wayotetemala mbeka dia mbeya Jehowa Nzambi ka mɛtɛ.—Joa. 17:3; 1 Kor. 3:6.
4. Lande na kele ekɔ ohomba dia sho tɔtɔmiyaka awui woleki ohomba lo dihole dia tshɔbɔlaka l’awui wele bu ohomba?
4 Tɔtɔtɔmiya awui woleki ohomba: Yeso kombetɛka wetshelo ande wolo lo mbidja awui wamboleka efula. Etena kakandate ɔnɛ “wane weli lu waumbu tshe . . . wayutumba,” ɔsɔ komonga etena kakandakoke mbuta kiambokambo tshɛ yendana la weho ehende wa eolwelo wayoyala. (Joa. 5:28, 29) Etena kalɔmbɔlaso wekelo wa Bible, sho pombaka tɔtɔmiya awui woleki ohomba ndo mbewɔ dia mbidjaka awui wele kema ohomba ndo wahatɛkɛtami lo etenyi kasɛdingɔma.
5. Ɛlɔlɔ akɔna wakokaso kondja naka tayetshaka anto lo yoho ya wɔdu?
5 Tekɔ mɛtɛ la lowando efula le Jehowa lo woho watetshande awui tshɛ weso l’ohomba wa mbeya lo yoho ya wɔdu! (Mat. 11:25) Nyɛsɔ tosale la wolo dia mbetshaka anto lo yoho ya wɔdu kele katokondja etombelo w’ɛlɔlɔ l’olimu w’esambishelo.