Alako asato dia sho ndowanya wetshelo aso
1. Lande na kahombaso nsala la wolo dia ndowanya yoho yaso ya mbetsha?
1 Akristo tshɛ wekɔ esambisha. Oyadi tekɔ lo nsala wendelo w’eyoyo, kana tambokalola dia tolomialomia nsaki kakɛnya onto kana wekelo wa Bible mbalɔmbɔlaso, oyango aso ele dia mbewoya akambo wa mɛtɛ. Ndo awui wetshaso wekɔ awui wa lânde. Sho ngamulaka osase wa “afundelu w’ekila” wakoka nkimanyiya anto dia nkondja “panda.” (2 Tim. 3:15) Ande diɛsɛ dia woke diele laso lee! Tayanga nsɛdingola alako asato wakoka tokimanyiya dia ndowanya yoho yaso ya mbetsha.
2. Ngande wakokaso mbetsha lo yoho ya wɔdu?
2 Tetshake lo yoho ya wɔdu: Etena keyaso dikambo dimɔtshi dimɛna, sho mbeyaka mbohɛ esadi eto ɔnɛ dikambo diakɔ kokaka monga wolo le onto lahadieye. Ɔnkɔnɛ, etena kalɔmbɔlaso wekelo wa Bible tatolodiake wetshelo l’awui efula wele bu ohomba. Koko, tɔtɔtɔmiya akambo woleki ohomba. Aha ntɛkɛta akambo efula mbalembetshiya mbetsha dimɛna. (Tuk. 10:19) Mbala efula ndeka dimɛna mbadiaka paka avɛsa wele ohomba. L’ɔkɔngɔ wa mbadia divɛsa dimɔ, tɔtɔtɔmiya paka etenyi ka divɛsa kendana la dikambo diasawolanyu. Dako dia lo dikona diele lo Mateu 5 polo 7, diekɔ l’akambo wa mɛtɛ w’ohomba efula, koko Yeso aketsha lo yoho ya wɔdu ndo l’ɛtɛkɛta wa lɔsɔna.
3. Ohomba akɔna wele la bɛnyɛlɔ, ndo mbala efula bɛnyɛlɔ diakɔna di’oleki amɛna?
3 Tokambe la bɛnyɛlɔ: Bɛnyɛlɔ tshutshuyaka onto dia kana yimba, memulaka nsaki ndo kimanyiaka onto diaha mbohɛ kɛnɛ kotami. Tatɔsake dia paka sho mbongi ambewi w’ɛkɔndɔ ko sho ndjosha bɛnyɛlɔ di’amɛna. Mbala efula, Yeso akakambaka la bɛnyɛlɔ dia tomondo ndo dia wɔdu. (Mat. 7:3-5; 18:2-4) Fundaka bɛnyɛlɔ dia wɔdu lo dikatshi kokaka monga nto dimɛna efula. Ɔlɔngɔswɛlɔ wa dimɛna ayotokimanyiya dia sho ntana bɛnyɛlɔ di’eshika.
4. Ngande wakokaso nkamba dimɛna la ambola?
4 Tokambe la ambola: Ambola tshutshuyaka ombeki aso dia nde nkana yimba. Ɔnkɔnɛ, tonge la solo dia lotutsha l’ɔkɔngɔ wa sho mboka dimbola. Naka shoamɛ mbisha okadimwelo esadi eto, kete hatoteya kɛnɛ kamboshihodia ombeki aso. Naka nde ambosha okadimwelo wa kɔlɔ, towoke tombolambola tokina dia nde mbishola okadimwelo l’ɔtɛ wa sho mbongola tsho. (Mat. 17:24-27) Lo mɛtɛ, sho tshɛ ndoko lele ombetsha wa kokele. Ɔnkɔnɛ, Bible tokeketshaka dia sho ntetemala mbidjaka yimba lo woho wetshaso. Naka sho nsala ngasɔ, kete tayokondja ɛtshɔkɔ wa pondjo sho la wanɛ watohokamɛ.—1 Tim. 4:16.