Woho wa nɔngɔsɔlaka Losanganya l’olimu
1. Naa oyango wele la Losanganya l’olimu, ndo ngande wakokaso ndeka kondja wahɔ oma lɔkɔ?
1 Oyango wa Losanganya l’olimu ele wa tokenga dia sho ndeka sambisha dimɛna. Akambo waleka tɛkɛtama lɔkɔ ele esambishelo ka lokumu l’ɔlɔlɔ la Diolelo, mbetɛ anto ambeki ndo mbewoya anto akina woho wayasukana elombwelo kaki Nzambi. (Mat. 28:20; Mako 13:10; 2 Pet. 3:7) Sho kondjaka wahɔ efula oma lo losanganya l’ohomba lɔsɔ naka sho ndjalɔngɔsɔla dimɛna dia ndjosha kɔmatɛrɛ.
2. Ngande wakokaso ndjalɔngɔsɔla dia tohokamɛ sawo?
2 Sawo: Tena efula vɔ mbewoyaka ɔtɛkɛtshi lɛnɛ ɔsami akambo wayɔmbwama lo sawo diande. Wɛ mbeyaka mvusola awui wayɔmbwama, mbidja ndo avɛsa woshilami ndo kana yimba lo woho wakokayɛ kamba la awui akɔ l’esambishelo.
3. Kakɔna kakokaso ntsha dia ndjalɔngɔsɔla dikambo dia ɔkɛtshanyelo wa ambola la ekadimwelo?
3 Ɔkɛtshanyelo wa ambola la ekadimwelo: Ɔkɛtshanyelo ɔsɔ nɔmbwamaka wate kana oko Wekelo wa Tshoto y’Etangelo la mbɔtwɛlɔ ndo ndjihelo ka lo tshena pe. Ekɛ eshidi lo akambo w’ohomba wa l’odingɔ tshɛ ndo yalɔngɔsɔla dia tosha kɔmatɛrɛ y’amɛna ya lo tshena pe.
4. Ngande wakokaso ndjalɔngɔsɔla dikambo dia ɔkɛtshanyelo l’ampokami?
4 Ɔkɛtshanyelo l’ampokami: Ɔkɛtshanyelo ɔsɔ wayoshama oko sawo, koko ɔtɛkɛtshi ayɔlɔmba ampokami dia vɔ mbisha kɔmatɛrɛ mɔtshi. Naka wɛ têke eshidi l’akambo woleki ohomba ndo wɛ tâdisha avɛsa woshilami, kete wɛ mbeyaka monga la akoka wa mbisha kɔmatɛrɛ etena kokande ambola. Ɔnangɛso lalɔmbɔla etenyi kɛnɛ ayosala la wolo dia nɔmba ampokami dia vɔ tɛkɛta awui woleki ohomba.
5. Kakɔna kayotokimanyiya dia sho ndeka kondja wahɔ oma lo wɛnyɛlɔ wasalema?
5 Wɛnyɛlɔ: Asawo amɔtshi mongaka la wɛnyɛlɔ wa shikaa wɛnya woho wakokaso kamba l’awui wasɛdingɔma l’ɛtshi kaso ka nkɛtɛ. Vɔ nɔmbaka dikumanyi kana apandjudi wambohokɔ akambo kana ambatshi mboka dia sala wɛnyɛlɔ wa ngasɔ. Wɛ mbeyaka tayalɔngɔsɔdi nto lo kɛnɛ kendana la woho wayosalema wɛnyɛlɔ ɔsɔ. Etena kasalawɔ wɛnyɛlɔ, kana yimba lo woho wakokayɛ kamba la tɔ ndo lo woho wakokayɛ kiɔtɔnganyiya l’anto wotshikitanyi. Yashikikɛ dia wɛ akɔshi dibuku kana periodikɛ kayowokamba la tɔ lo wɛnyɛlɔ. Etena kasalanyu Ɔtɛmwɛlɔ wa lo nkumbo wa la dikɔlɔ, nyu mbeyaka mɛna dimɛna mvusola wɛnyɛlɔ ɔmɔtshi.
6. Naa ɛkɔkɔ ɛmɔtshi watotshutshuya dia nɔngɔsɔlaka Losanganya l’olimu?
6 Losanganya l’olimu ndekaka monga dimɛna naka sho tayalɔngɔsɔdi dimɛna dikambo dia wetshelo wayoshama. Dui sɔ diayotokimanyiya dia sho keketshana. (Romo 1:11, 12) Naka sho mbɔsaka etena ka nɔngɔsɔla Losanganya l’olimu, kete tayoleka monga la akoka wa kotsha ɔkɛndɛ aso.—2 Tim. 3:17.