Awui wahomba ndjela wanɛ washa

asawo lo Losanganya l’olimu

Ntatɛ oma lo Olimu aso wa Diolelo ɔnɛ, etshikitanu ɛmɔtshi wendana la ekongelo ka Losanganya l’olimu wambosalema. Awui ndo waohwelo wayela anɛ wayɛnya etshikitanu wambosalema ndo wayolembetshiya hwe kɛnɛ kakatama lo sawo diele l’ɔtɛ a dui ɔnɛ: “Woho wa nɔngɔsɔla Losanganya l’olimu,” diakatombe l’Olimu aso wa Diolelo wa Ngɔndɔ ka tanu 2009.

◼ Sawo: Ɔnɛ ekɔ sawo diɔsami lɛnɛ akawatumi ɔtɛkɛtshi ndo diɔ mbishamaka aha l’ampokami ntɛkɛta. Ɔtɛkɛtshi pombaka ndeka ntɛkɛta akambo woleki ohomba le etshumanelo.

◼ Ambola la ekadimwelo: Etenyi kɛnɛ nɔmbwamaka mbala efula oko Wekelo wa Tshoto y’Etangelo. Tɔ kekɔ la mbɔtwɛlɔ, la ndjihelo ka mondo ndo ambola mimbwamaka l’oseka odingɔ tshɛ. Ɔnɔmbɔdi pombaka mbewɔ dia ndeka ntɛkɛta efula. Avɛsa woleki ohomba kokaka mbadiema naka etena kekekɔ. Edingɔ hawotadiema, onyake naka wakalɔmbɛ ɔtɛkɛtshi dia nsala dui sɔ.

◼ Ɔkɛtshanyelo: Ɔnɛ ekɔ sawo dialɔmbawɔ ampokami amɔtshi dia vɔ ntɛkɛta. Diɔ kema sawo diahomba ɔtɛkɛtshi ndamɛ ntɛkɛta ndo diɔ kema sawo dia ambola la ekadimwelo.

◼ Wɛnyɛlɔ la ɛkɔnya: Nsala wɛnyɛlɔ nembetshiyaka dia ɔnangɛso lakawasha etenyi kɛnɛ mbele la ɔkɛndɛ wa mbidja wɛnyɛlɔ ɔmɔtshi lo sawo diande; nde ndamɛ hahombe nsala wɛnyɛlɔ. Wanɛ wayondɔsɔna dia mbôkimanyiya pombaka monga l’akoka ndo anto washa ɛnyɛlɔ k’ɔlɔlɔ, ndo nde pombaka tayalɔngɔsɔdi la wɔ la ntondo naka kokaka. Bu dimɛna efula nkamba la opandjudi w’oyoyo kana wele atahokɔ akambo dia nde nsala wɛnyɛlɔ paka l’oyango wa mbosha diaaso dia nde mbeta lo lɔyɛnga, kânga mbakokanyu nkamba la amɔtshi oko ampokami lo wɛnyɛlɔ. Apandjudi wasala wɛnyɛlɔ pombaka nsala la wolo diaha mbisha ampokami ɔkɔngɔ. Wanɛ wayokamba la nyu lo ɔkɔnya pombaka mbeta lo lɔyɛnga lo dihole dia nde nkadimola oma lɛnɛ odjashinde. Pombaka tavusodi wɛnyɛlɔ la ɛkɔnya la ntondo. Naka tekɔ lo talawɛ wonya dia losanganya nshila la wonya, ɔnangɛso pombaka nsusa sawo diande, koko nde pombaka mbewɔ dia minya wɛnyɛlɔ kana ɛkɔnya. Ekambi wakimanyiya pombaka tɛnanyi l’ɔnɔmbɔdi w’olui wa dikumanyi kana la ekumanyi kekina la ntondo ka nde nsɔna anto wayokamba la nde lo sawo.

Naka lo etenyi kɛmɔtshi onto lakisha pombaka ndjela awui amɔtshi wa lânde, kete nde pombaka ndjela awui asɔ la yambalo tshɛ. Naka nyu nɔmbɔla tenyi dia lo Losanganya l’olimu oko wɛnyamidiɔ la diko, kete anangɛso wayokimanyiya dia Losanganya l’olimu ‘mbeta dimɛna ndo aha l’ofukutanu.’—1 Kor. 14:40.