Onde dimi sambishaka efula?
1. Ekiyanu akɔna wakoka monga l’Okristo wele la kɔlamelo?
1 Onde wɛ atayaokaka dimbola sɔ lushi lɔmɔtshi? Mbeyaka monga ko wɛ hayosambisha efula nɛ dia lotshundu, hemɔ kana lokema l’ɛkɛndɛ wa lo nkumbo lele la yɛ kɔkɔmɔlaka. Kadiyɛso kɛmɔtshi kodia ana asato akate dia nde ndjaɛdjaka onongo mbala mɔtshi nɛ dia woho wakambande la wenya ndo la wolo ande dia nkotsha ehomba w’ase nkumbo kande kitshakitshaka woho wayashande l’esambishelo. Kakɔna kayotokimanyiya dia sho mɛna akambo la wɛdimo?
2. Kakɔna kalongamɛ Jehowa oma le so?
2 Kɛnɛ kalongamɛ Jehowa oma le so: Aha la tâmu, sho tshɛ kombolaka dia nsambisha efula. Koko, otshikitanu wa woke wekɔ lam’asa kɛnɛ kakombolaso dia nsala la kɛnɛ kakokaso mɛtɛ nsala. Woho wakombolaso dia nsambisha efula mɛnyaka dia sho hatolewalewa. Sho pombaka mbohɔka dia Jehowa mbeyaka dimɛna elelo wele la so ndo nde hatɔlɔmbɛ kɛnɛ kahatakoke nsala. (Osam. 103:13, 14) Kakɔna kalongamɛnde oma le so? Nde nongamɛka dia sho mbokambɛ la anima aso tshɛ, mbuta ate mbosha kɛnɛ koleki dimɛna le so.—Kol. 3:23.
3. Ngande wakokaso nsɛdingola welo wadjaso l’esambishelo?
3 Kakɔna kayotokimanyiya dia sho mbeya polo lo yɛdikɔ yakɔna yahombaso sambishaka? Sho kokaka nɔmba Jehowa dia nde tokimanyiya woho wa sho nsɛdingola akambo wele la so l’otema ɔtɔi. (Osam. 26:2) Ndo nto, sho kokaka nyanga ekimanyielo lo mumbola ɔngɛnyi aso w’Okristo wayaɛkɛso le nde ndo wambotshunda lo nyuma wateya dimɛna ndo wahoke sɔnyi totɛ ahole wahombaso ndjalowanya. (Tuk. 27:9) Tatohɛke nto dia lam’ele akambo wele la so tshikitanaka, ayonga ohomba sho mbasɛdingolaka mbala la mbala.—Ef. 5:10.
4. Ngande wahombaso mbɔsaka waohwelo w’oma lo Bible wendana l’esambishelo?
4 Woho wahombaso mbɔsaka waohwelo wendana l’olimu aso: Wonya watalawɔ anto lowango, wanɛ wakombola dia vɔ nkondja difuto mbadɛka ekoko w’ekeketshelo. Vɔ salaka ngasɔ dia nkimanyiya andawi dia vɔ nkotsha oyango awɔ, koko aha dia mbakɔmɔla. Woho akɔ wâmɛ mbele, ekeketshelo ndo waohwelo w’oma lo Bible watoshawɔ lo nsanganya ndo l’ekanda aso dia sho ‘nsambisha ɔtɛkɛta l’etete’ ekɔ dia wahɔ asɔ ndo vɔ hawotoshawɔ dia mɛnya dia welo wadjaso bu kambe. (2 Tim. 4:2) Sho kokaka monga l’eshikikelo dia edja tshɛ katetemalaso mbidja welo wa nsambisha, Jehowa ayohɔka ‘ngandji ndo etsha aso’ l’ɔngɛnɔngɛnɔ.—Heb. 6:10.