Ekadimwelo Lo Wembola Anyu

◼ Ngande wakokaso ndjashikikɛ dia nsanganya ya l’etshumanelo mbɔsaka yɛdikɔ ya wonya yahombama?

Wonya mbetaka esadi esadi etena kasawolaso l’angɛnyi aso dikambo dimɔtshi dia dimɛna. Diakɔ diakokande monga wolo dia sho mbisha asawo aso lo losanganya aha la ndɛ wenya. Kakɔna kakoka tokimanyiya na?

Totate la wonya. Etena kasangana etshumanelo k’otondo, ekɔ dimɛna nɔmba ampokami dia vɔ mbidjasɛ minitɛ ɔtɔi kana hiende la ntondo ka losanganya tatɛ woho wa lɔ tatɛ la wonya ndo aha l’ofukutanu. (Und. 3:⁠1) Lo nsanganya ya totshitshɛ, oko losanganya l’otsha l’olimu w’esambishelo, ndoko ohomba tshimbatshimba dia kongɛ anto wakoka ndjokoma l’ɔkɔngɔ.

Toyalɔngɔsɔlɛ dimɛna. Yoho mɔtshi yaha ndɛ wenya, ele ndjalɔngɔsɔla dimɛna la ntondo. Toshihodia dimɛna oyango wele la sawo diaso. Teye awui woleki ohomba wa lɔkɔ ndo dja dikako vɔlɛ l’awui akɔ. Tewɔ dia mbetsha wenya l’awui wele bu ohomba. Todjake awui w’okandjakandja. Naka sawo diaso diekɔ la wɛnyɛlɔ ndo ɛkɔnya, kete totawavusodi la ntondo. Naka kokaka, totɛdiki wenya wa sawo diaso etena kadivusolaso la dui dia wolo.

Tokahanya awui wayotɔtɛkɛta lo tenyi. Oyadi sawo kana ɔkɛtshanyelo mbasalaso l’ampokami, mbeyaka monga ɔlɔlɔ sho kahanya awui wayotɔtɛkɛta lo tenyi. Toshikikɛ wenya engana wayotosala l’etenyi la etenyi ndo tofunde dui sɔ l’omamu wa dikatshi diaso dia nɔtɛ. Oma lâsɔ ko sho tendaka wonya etena katatasha sawo. Lo sawo diendana l’ɔkɛtshanyelo l’ampokami, tewɔ tshelo ya tshɔbɔla l’awui wa mbɔtwɛlɔ, ko ndjeta lowango lowango l’awui w’ohomba otsha l’ekomelo. Ɛnɔmbɔdi wa Wekelo wa Tshoto y’Etangelo pombaka tshikaka etena ka kambe dia ndjɔsɛdingola kiombo y’ovuswelo yele l’ekomelo ka wekelo. Vɔ pombaka nto sala la wolo di’aha ndɛ minitɛ y’osambo la ya dɔmbɛlɔ dia ndjihelo.

Tokumiya la wonya. Naka losanganya lekɔ la tenyi efula, ɛnyɛlɔ Losanganya l’Olimu, kete ɔtɛkɛtshi tshɛ la dia mbeya wonya wahombande tatɛ ndo komiya sawo diande. Kakɔna kakoka salema naka losanganya layanga ndɛ wenya na? Ɔnangɛso kana anangɛso akina weke l’asawo mbeyaka susa asawo awɔ lo tɛkɛta paka awui woleki ohomba ko tshika wele bu ohomba. Onto lasala ngasɔ mɛnyaka dia ekɔ ombetsha wa manamana.

Kânga sho ampokami koka kimanyiya ɔnangɛso lalɔmbɔla ɔkɛtshanyelo lo mbishaka kɔmatɛrɛ ya tomondo ndo yasembɔ tɔɔ lo dikambo. Ɔnkɔnɛ, sho tshɛ koka mbisha lonya dia nsanganya mbeta ‘dimɛna ndo aha l’ofutanu.’​—⁠1 Kor. 14:40.