‘Lokombo laki Nzambi lakidiame’
1. Naa ɔtɛ a dui wa Losanganya l’otshimbedi la l’ɔnɔnyi w’olimu 2012, ndo oma lo divɛsa diakɔna diɔsamiwɔ?
1 Ande diɛsɛ diele laso dia mɛmba lokombo la Jehowa Nkum’olongo lee! Nzambi ndamɛ mbakatosha lokombo lande dia sho liɛmba. Oko weso Ɛmɛnyi wa Jehowa, takeyama lo lokombo la lânde la Jehowa lɔsɔ oma ko 1931. (Is. 43:10) Yeso Ɔna ɛtɔi laki Nzambi, akasha lokombo la Nzambi nɛmɔ di’efula lo likitsha lo dihole dia ntondo lo dɔmbɛlɔ diande di’ɛnyɛlɔ. (Mat. 6:9) Lo ɛtɛkɛta wa Yeso ɛsɔ mbɔsami ɔtɛ a dui wa Losanganya laso l’otshimbedi la l’ɔnɔnyi w’olimu wa 2012. Ɛtɛkɛta akɔ mbutaka ɔnɛ: ‘Lokombo laki Nzambi lakidiame.’
2. Awui akɔna walongamɛso l’asolo walomɔlomɔ?
2 Akambo wayototetshama: Lushi la samalo sawo diele l’ɔtɛ a dui ɔnɛ: “Teyanya lokombo laki Nzambi oko ekambi wa lo tena tshɛ,” diayolembetshiya lande na kele nkamba olimu wa lo tena tshɛ ekɔ yoho ya lɔsɛnɔ yela ɔngɛnɔngɛnɔ. Tayoyela nto sawo dia tenyi nɛi diele l’ɔtɛ a dui ɔnɛ: “Tewɔ dia mbisha lokombo la Jehowa sɔnyi.” Diɔ diayotokimanyiya dia mbewɔ dia mundama lo tolonga tɔnɛi. Sawo diele l’ɔtɛ a dui ɔnɛ: “Lande na kahomba lokombo laki Nzambi kidiama,” diayosha ekadimwelo lo ambola wayela anɛ: Kakɔna kayotokimanyiya dia sho nsambisha l’ohetoheto etena kɛnama di’anto hawoyasha lo losango laso? Ndo kakɔna kayotokimanyiya dia monga apandjudi wa tomanamana l’esambishelo? Lushi la lomingu tayɔngɛnangɛna dia ndjela sawo dia tenyi nɛi diayotɛnya woho wakokaso nkidia lokombo laki Nzambi oma lo tokanyi, ɛtɛkɛta, tɛdikɔ ndo oma lo lɔkɛwɔ laso. Anto wayoya mbala ka ntondo wayonga la lowando djekoleko lo sawo dia lo sɛkɛ diele l’ɔtɛ a dui ɔnɛ: “Jehowa ayokidia lokombo lande la woke lo Aramagɛdɔna.”
3. Naa diɛsɛ diele laso, ndo ngande wayotokimanyiya Losanganya l’otshimbedi layaye?
3 Kem’edja nto Jehowa ayanga nkidia lokombo lande. (Ezek. 36:23) L’etena kɛnɛ, tekɔ la diɛsɛ dia woke dia mamɛ kɛnɛ tshɛ kalembetshiya lokombo l’ekila la Jehowa. Tekɔ l’eshikikelo dia Losanganya l’otshimbedi lɔnɛ layotokimanyiya onto l’onto dia sho nkotsha ɔkɛndɛ aso w’ohomba oko weso anto welamɛ lo lokombo laki Nzambi.