Tokimanyiya anto dia vɔ mpokamɛ Nzambi
1. Tobukubuku takɔna takatondjama lo Losanganya la distrikɛ laki l’ɔtɛ a dui ɔnɛ: “Diolelo diaki Nzambi diaye,” ndo kakɔna ketɛ tobukubuku tɔsɔ dihomɔ di’ohomba?
1 Lo Losanganya la distrikɛ laki l’ɔtɛ a dui ɔnɛ: “Diolelo diaki Nzambi diaye,” tobukubuku t’eyoyo tohende takatondjama, mɔtshi yekɔ l’ɔtɛ a dui ɔnɛ: Hokamɛ Nzambi dia wɛ nsɛna pondjo pondjo ndo nkina ya wɔdu yele l’ɔtɛ a dui ɔnɛ: Hokamɛ Nzambi. Lam’ele tobukubuku tɔsɔ bu l’awui efula, tɔ takakadimɔma esadi esadi ndo aha l’okakatanu. Diakɔ diele, biukubuku Hokamɛ Nzambi dia wɛ nsɛna pondjo pondjo yaketawɔma dia kadimɔma oma lo Angɛlɛ oya lo ɛtɛkɛta ndekana 431.
2. Waa na wayokondja wahɔ oma lo tobukubuku tɔsɔ?
2 Waa na wayokondja wahɔ lo yoho ya lânde oma lo tobukubuku tɔsɔ? Tɔsɛdingole awui wayela anɛ wasalema mbala efula l’andja w’otondo:
• Opandjudi wakɛtshanya la ompokami ɔmɔtshi oyadi mbala ka ntondo ka mbosambisha kana lo wendelo w’oyoyo amboshihodia dia ompokami heye mbadia.
• Opandjudi ɔmɔtshi ekɔ lo nsambisha anto watɛkɛta ɔtɛkɛta wele ekanda aso wambokadimɔma yema tshitshɛ kana bu. Kana anto efula wa l’ɛtshi kakɔ ka nkɛtɛ bu l’akoka wa mbadia ɔtɛkɛta watɛkɛtawɔ.
• Opandjudi ɔmɔtshi ambokamba l’ɔtɛkɛta w’akanga wa mpoke dia nde nsambisha akanga wa mpoke wele l’ɛtshi kande ka nkɛtɛ.
• Ombutshi ɔmɔtshi ekɔ lo nkombola mbetsha ɔnande akambo wa mɛtɛ, koko ɔnakɔ ateye mbadia.
3. Kakɔna kele lo biukubuku Hokamɛ Nzambi?
3 Woho wokongɛmi awui lo tobukubuku tɔsɔ: Biukubuku Hokamɛ Nzambi bu l’awui efula. Ndo suke la lo lɛkɛ tshɛ, yɔ yekɔ paka l’ɔnɔngɔ ɔtɔi ndo la divɛsa dioshilami l’ɛse ka dikatshi tshɛ dia nembetshiya awui woleki ohomba. Lande na kediɔ ngasɔ? Ohɔsa dia onto ɔmɔtshi ambokosha biukubuku mɔtshi yofundami l’ɔtɛkɛta wahayakoke mbadia, yele ondo l’alɛta wahayeye. Onde yɔ yayonga ohomba le yɛ, kânga yɔ yekɔ l’esato w’amɛna efula? Ondo bu. Woho akɔ wamɛ mbele, anto waheye mbadia kɔmɔka esadi etena kɛnawɔ abuku wele l’efundelo efula. Diakɔ diele dikatshi tshɛ dia lo biukubuku shɔ diekɔ la esato wakalɔngɔswama dimɛna wakimanyiya dia nsala ɔkɛtshanyelo wa osato la osato.
4. Kakɔna kele lo biukubuku Hokamɛ Nzambi dia wɛ nsɛna pondjo pondjo?
4 Biukubuku Hokamɛ Nzambi dia wɛ nsɛna pondjo pondjo yekɔ l’esato akɔ wâmɛ wele lo biukubuku Hokamɛ Nzambi. Yɔ yakafundama dia mbeka l’anto waheye mbadia dimɛna kana weka woho wa mbeya mbadia. Ombetsha kokaka nkamba la biukubuku Hokamɛ Nzambi dia wɛ nsɛna pondjo pondjo etena kekande l’onto ɔmɔtshi lo biukubuku Hokamɛ Nzambi. Ndjɛkɛ hiende tshɛ yekɔ la dimbola diele lo tshuku dia lonya la lɔmɔsɔ la diko diele okadimwelo adiɔ tanemaka lo ndjɛkɛ yakɔ. Lâdiko di’esato, yɔ yekɔ nto la kɔmatɛrɛ ndo l’avɛsa woshilami. Kiombokombo yele l’ɛse ka dikatshi tshɛ yekɔ l’awui amɔtshi w’ohomba ndo l’avɛsa woshilami wakoka nyokimanyiya dia nsala ɔkɛtshanyelo lo ndjela akoka wele la ombeki.
5. Etena kakɔna ndo ngande wakokaso mbisha onto tobukubuku tɔnɛ?
5 Woho wa nkamba la tɔ: Wɛ kokaka mbisha onto biukubuku mɔtshi etena katayasambisha lo luudu la luudu mbala tshɛ kɛnayɛ dia ekɔ dimɛna nsala dui sɔ, oyadi aha tɔ mbashaso anto ngɔndɔ kengo. (Enda kiombo yele l’ɔtɛ a dui ɔnɛ: “Woho wakokaso mbisha anto tobukubuku tɔnɛ.”) Lo wendelo w’oyoyo, wɛ kokaka nkotola yambalo y’onto oya lo biukubuku yakɔ lo mbutɛ onto lakɛnya nsaki dia wɛ ekɔ la yangɔ mɔtshi yalangɛ mbɛnya ko wɛ mbosha biukubuku mɔtshi.
6. Ngande wayoteka l’anto Bible lo nkamba la tobukubuku tɔnɛ?
6 Lam’ele biukubuku Hokamɛ Nzambi bu la ambola, ɔkɛtshanyelo hawotonga wa ambola la ekadimwelo oko watotosalaka la ombeki leka la so lo dibuku Bible etshatɔ. Lo ahole efula, anto ngɛnangɛnaka dia mpokamɛ ɛkɔndɔ. Ɔnkɔnɛ, kamba la esato wele lo biukubuku yakɔ dia kɔndɔlɛ anto ɛkɔndɔ wakasambiyama wele lo Bible. Lembetshiya kɛnɛ kele l’esato ndo onga la waasaso. Mbola ombeki dia nde kotɛ kɛnɛ kɛnande ndo kakanyiyande. Adia avɛsa wele l’ɛse ka dikatshi ndo nkana la nde yimba lo kɛnɛ kata avɛsa akɔ. Okande ambola wayowokimanyiya dia nde ntɛkɛta ndo dia wɛ ndjashikikɛ dia nde amboshihodia kɛnɛ kekinyu. Naka nde ekɔ la biukubuku Hokamɛ Nzambi dia wɛ nsɛna pondjo pondjo, nyadia edingɔ ndo avɛsa wɔtɔnɛ l’osato tshɛ etena kasalanyu ɔkɛtshanyelo.
7. Ngande wakokaso nkimanyiya ombeki aso wa Bible dia nde mpama?
7 Tokimanyiya ambeki wa Bible dia vɔ mpama: Aha la tâmu, ɔkɛtshanyelo anyu wayemula nsaki kele la ombeki ayɛ ka mbeya mbadia dia nde nkondja ewo kaki Jehowa lo ndamɛ. (Mat. 5:3; Joa. 17:3) Ɔnkɔnɛ, etena kakɛtshanyanyu l’ombeki lo biukubuku Hokamɛ Nzambi, ko wɛ ambɛna dia nde mbeyaka mbadia, wɛ kokaka mbeka la nde lo biukubuku Hokamɛ Nzambi dia wɛ nsɛna pondjo pondjo. Ombeki hakoke nongola batismu l’ɔkɔngɔ wa nyu nshidiya wekelo wa biukubuku nyɛ tsho. Wɛ pombaka ntatɛ mbeka la nde lo dibuku Bible etshatɔ kana dibuku dikina diayowokimanyiya dia nde mfudia ewo kande ka Bible.
8. Lande na keso la lowando lo woho wambotokondja dihomɔ di’eyoyo diayotokimanyiya l’esambishelo?
8 Anto pombaka mpokamɛ Nkum’Olongo naka vɔ nangaka nsɛna pondjo pondjo. (Is. 55:3) Nɛ dia Jehowa nangaka dia ‘weho w’anto tshɛ,’ mbidja ndo wanɛ waheye mbadia mbeka woho wa mbohokamɛ. (1 Tim. 2:3, 4) Tekɔ mɛtɛ la lowando l’efula lo woho wambotokondja dihomɔ dihende di’eyoyo nɛ diakokaso nkamba la diɔ dia mbetsha anto woho wa vɔ mpokamɛ Nzambi!
[Kiombo ya lo lɛkɛ 3]
Woho wakokaso mbisha anto tobukubuku tɔnɛ
Ɛnya ompokami ayɛ lɛkɛ 2-3, ndo nta ɔnɛ: “Onde wɛ kombolaka ndjɔsɛna l’andja wele oko wɔnɛ? [Tshikande akadimole.] Afundelo ndakaka [kana ɔnɛ dibuku di’ekila ndakaka] dia kem’edja Nzambi ayanga mbela andja wa dimɛna efula wele la wɔladi ndo wele ndoko onto layonga wola kana layotata hemɔ. Tende kɛnɛ kahombaso nsala dia sho ndjɔsɛna l’andja ɔsɔ. [Adia Isaya 55:3, divɛsa diele lo lɛkɛ 3 la diko.] Diɔ totɛka dia sho ‘ndja’ le Nzambi ndo ‘mbohokamɛ.’ Ko ngande wahokamɛso Nzambi?” Nyofole lo lɛkɛ 4-5 ndo nyɔkɛtshanya okadimwelo wele lawɔ. Naka nde bu l’etena ko wɛ mbotshikɛ biukubuku ndo nyokane lushi lahombayɛ nkalola dia nyu ndjɔkɛtshanya okadimwelo akɔ.