Ɛkɔkɔ dikumi l’ehende watotshutshuya dia nsambisha

Lande na kasambishaso lokumu l’ɔlɔlɔ ndo ketshaso anto? Onde dui dioleki ohomba diatotshutshuya dia nsambisha ekɔ dia nkimanyiya anto wele l’etema w’ɛlɔlɔ dia vɔ ntana mboka ka lɔsɛnɔ? (Mat. 7:14) Ɔsɔ ekɔ ɔkɔkɔ wa ntondo woshidiso lanɛ l’ɛse, koko aha vɔ mboleki ohomba. Ko l’atei w’ɛkɔkɔ 12 watotshutshuya dia nsambisha, wakɔna wafɔnyayɛ woleki ohomba?

1. Olimu w’esambishelo kimanyiyaka dia nshimbɛ nsɛnɔ y’anto.—Joa. 17:3.

2. Vɔ kimanyiyaka dia mbewola anto wa kɔlɔ.—Ezek. 3:18, 19.

3. Vɔ mbishaka lonya l’okotshamelo wa prɔfɛsiya ya lo Bible.—Mat. 24:14.

4. Vɔ mɛnyaka losembwe laki Nzambi. Ndoko onto lakoka ndjota dia Jehowa ambolanya anto wa kɔlɔ aha la mbasha diaaso dia vɔ ndjatshumoya.—Etsha 17:30, 31; 1 Tim. 2:3, 4.

5. Vɔ tokimanyiyaka dia nkotsha ɔkɛndɛ aso wa mbisha anto ekimanyielo ka lo nyuma dia vɔ shimbamɛ oma lo dikila dia Yeso.—Romo 1:14, 15.

6. Vɔ tokimanyiyaka dia sho mbewɔ onongo wa dikila.—Etsha 20:26, 27.

7. Vɔ tokimanyiyaka dia ndo shamɛ ndjokondja panda.—Ezek. 3:19; Romo 10:9, 10.

8. Vɔ mɛnyaka ngandji kokaso wonyaso onto.—Mat. 22:39.

9. Vɔ mɛnyaka okitanyiya wele la so otsha le Jehowa ndo otsha le Ɔnande.—Mat. 28:19, 20.

10. Olimu w’esambishelo wekɔ etenyi k’ɔtɛmwɛlɔ aso.—Heb. 13:15.

11. Vɔ mɛnyaka dia sho mbokaka Nzambi ngandji.—1 Joa. 5:3.

12. Vɔ kimanyiyaka dia lokombo laki Nzambi kidiama.—Is. 43:10-12; Mat. 6:9.

Lo mɛtɛ, aha l’ɔtɛ w’ɛkɔkɔ ɛnɛ eto mbasambishaso. Ɛnyɛlɔ, etena kasambishaso sho keketshaka mbetawɔ kaso ndo sho mongaka la diɛsɛ dia lânde dia monga ekambi kâmɛ la Nzambi. (1 Kor. 3:9) Koko, ɔkɔkɔ woleki ohomba watotshutshuya dia sho nsambisha ekɔ ɔkɔkɔ 12. Oyadi onto tohokamɛ kana kema, teye dia esambishelo kimanyiyaka dia lokombo laki Nzambi kidiama ndo dui sɔ mbishaka Jehowa diaaso dia nkadimola ɔnɛ latosolaka. (Tuk. 27:11) Eelo, tekɔ mɛtɛ l’ɛkɔkɔ w’eshika watotshutshuya dia ‘ntetemala mbetsha ndo mbewoya lokumu l’ɔlɔlɔ aha la mpekɔ.’—Etsha 5:42.