“Tosambisha anto dimɛna dimɛna”
1. Naa ɛnyɛlɔ ka dimɛna kakatotshikɛ Pɔɔlɔ lo kɛnɛ kendana l’olimu w’esambishelo?
1 “Kamba olimu ayɛ dimɛna dimɛna.” (2 Tim. 4:5, Byington) Ɔpɔstɔlɔ Pɔɔlɔ akakoke mɛtɛ mbisha Timɔte dako nɛ. Lam’asa ɔnɔnyi 47 la 56 T.D., Pɔɔlɔ akashidiya nkɛndɔ shato ya misiɔnɛrɛ. Dibuku di’Etsha mbutaka tena efula dia Pɔɔlɔ ‘akasambisha anto dimɛna dimɛna.’ (Etsha 23:11; 28:23) Ngande wakokaso nsala dui sɔ ɛlɔ kɛnɛ?
2. Ngande wakokaso nsambisha anto dimɛna dimɛna lo luudu la luudu?
2 Lo luudu la luudu: L’oyango wa nsambisha anto wele watokaka lokumu l’ɔlɔlɔ, mbeyaka monga ohomba membola anto lo wenya wotshikitanyi wa lo lushi. Kanga luudu mbeyaka tanema lo wenya w’akɔlɔ kana lo wikɛndɛ. Sho pombaka nsala la wolo dia nsawola l’onto ɔmɔtshi lo lokombo tshɛ, ndo sho kalolaka mbala ko mbala lo mvudu yahatatanyi anto. Ko kayotosala naka hatotanyi anto kaanga mbadjaso welo? Sho mbeyaka nkondja etombelo w’ɛlɔlɔ lo nsambisha lo mikanda kana lo telefɔnɛ.
3. Waaso akɔna wele la yɛ wa nsambisha lo sɛkɛ ndo lo tshakitudi?
3 Lo sɛkɛ ndo lo tshakitudi: Ekambi waki Jehowa wa nshi nyɛ nembetshiyaka anto tshɛ wahokamɛ ‘lomba la mɛtɛ.’ Tena dimɔtshi, vɔ salaka dui sɔ “lu esese” kana “lu aseke.” (Tuk. 1:20, 21) Etena katshɔso l’elimu aso wa lushi la lushi, onde sho mɛnaka ohomba wa nsambisha? Onde anto kokaka mbuta dia sho “ndjasha[ka] tshɛ lo ɔtɛkɛta” wa Nzambi? (Etsha 18:5) Naka eelo, kete tekɔ lo nkotsha ɔkɛndɛ aso wa ‘nsambisha anto dimɛna dimɛna.’—Etsha 10:42; 17:17; 20:20, 21, 24.
4. Ngande watokimanyiya dɔmbɛlɔ ndo ekanelo ka yimba dia sho nsambisha anto dimɛna dimɛna?
4 Koko tena dimɔtshi, l’ɔtɛ wa wɔdu aso hita kana ɔsɔnyi wakotɔ la so, sho mbeyaka mboka wɔma nsambisha. Lo mɛtɛ, Jehowa mbeyaka elelo wele la so. (Osam. 103:14) Koko, etena kakondjaso waaso, sho kokaka mbɔlɔmba dia nde tosha dihonga dia sho nsambisha. (Etsha 4:29, 31) Ndo nto, naka sho salaka wekelo w’onto ndamɛ ndo kanaka yimba la Ɔtɛkɛta wa Nzambi, kete tayoleka nshihodia nɛmɔ dioleki diele la lokumu l’ɔlɔlɔ. (Flpɛ. 3:8) Dui sɔ diayototshutshuya dia liewoya l’ohetoheto tshɛ!
5. Ngande wakokaso mbisha lonya l’okotshamelo wa prɔfɛsiya ka Jɔɛlɛ?
5 Prɔfɛsiya kaki Jɔɛlɛ kakatatshi dia la ntondo ka lushi la woke ndo la wɔma laki Jehowa ndja, ekambi waki Nzambi ‘wayotetemala ntshɔ’ ndo ndooko ɛngɔ kayowashimba dia nsambisha. (Joe. 2:2, 7-9) Nyɛsɔ toyasha tshɛ l’olimu w’esambishelo wahakambemaki nto pondjo!