Onde wɛ ayonga ombatshi mboka wa tshanda?

1. Lande na kele nshi ya Eohwelo ekɔ etena ka dimɛna ka mpamia olimu aso?

¹ Ekɔ dimɛna efula mpamia olimu aso lo nshi ya Eohwelo. Ɔsɔ ekɔ etena kakanaso yimba lo ngandji k’efula kakatoke Jehowa lo nkimɔ Ɔnande oko olambo w’etshungwelo. (Jni. 3:16) Tekɔ la lowando efula lo kɛnɛ kakasale Jehowa dikambo diaso, ndo dui sɔ totshutshuyaka dia mfudia nsaki kaso ka mbewoya anto akina awui wendana la Jehowa ndo kɛnɛ kasalande lo dikambo di’anto. (Is. 12:4, 5; Luka 6:45) Ɔsɔ ekɔ nto etena ka sho mbisha lonya lo esambishelo ka laande dia mbelɛ anto weyana la so ndo anto wa l’ɛtshi kaso ka nkɛtɛ oya lo Eohwelo. Ndo nto, sho salaka la wolo dia nomialomia nsaki ka wanɛ wakɔtɔ ɔnɔnyi wetshi. Onde wɛ ayohamia olimu ayɛ lo nkamba oko ombatshi mboka wa tshanda lo Ngɔndɔ ka sato, ka nɛi, ndo ka tanu?

2. Kakɔna ketɛ Ngɔndɔ ka sato, ngɔndɔ koleki dimɛna ka nkamba oko ombatshi mboka wa tshanda?

² Sala dia Ngɔndɔ ka sato monga ngɔndɔ ka laande: Ngɔndɔ ka sato kayonga ngɔndɔ ka laande ka nkamba oko ombatshi mboka wa tshanda. Wanɛ wayolodja adɛmandɛ kokaka nsɔna lam’asa wenya 30 kana wenya 50. Naka omendji ayembola etshumanelo kanyu lo Ngɔndɔ ka sato, kete ambatshi mboka wa tshanda kokaka mbɔtɔ lo losanganya l’otondo layondosala l’ambatshi mboka wa pondjo ndo wa laande. Otshikitanyi la ɛnɔnyi wakete, esambishelo ka laande ka mbelɛ anto oya lo Eohwelo kayosalema Lushi la hende, Ngɔndɔ ka sato 26, 2013 kayosalema nshi efula ndo kayotatɛ Ngɔndɔ ka sato 1. Ndo nto, Ngɔndɔ ka sato kayonga la wikɛndɛ etanu. Laasɔ, lande na kahayakane yimba dimɛna dia menda kana wɛ kokaka mbetɛ Ngɔndɔ ka sato, ngɔndɔ ka laande ka l’ɔnɔnyi?

3. Ngande wakokaso ndjalɔngɔsɔla dia mpamia olimu aso?

³ Yalɔngɔsɔla oma ko kakianɛ: Etena ka menda ekongelo kaso ndo ka nsala etshikitanu wahombama dia nkamba oko ombatshi mboka tɔ kɛnɛ. Ayonga dimɛna di’ase nkumbo nkamba kaamɛ. Ɔnkɔnɛ, lo Ɔtɛmwɛlɔ anyu wa lo nkumbo wa la dikɔlɔ, nyɔkɛtshanya eyango wamboyadjɛ nkumbo kanyu ndo nyosale ekongelo. (Tuk. 15:22) Naka wɛ keema l’akoka wa nkamba oko ombatshi mboka wa tshanda, kete tɔkɔmɔke. Wɛ kokaka ntshikitanya ekongelo kayɛ diaha wɛ pembolaka esambishelo esadi lo nshi yatombayɛ. Shi ngasɔ? Shi wɛ kokaka tombaka lushi lokina nto l’atei wa lomingu?

4. Ɛlɔlɔ akɔna wayotokondja naka sho mpamia olimu aso lo Ngɔndɔ ka sato, ka nɛi ndo ka tanu?

⁴ Naka sho mpamia olimu aso lo Ngɔndɔ ka sato, ka nɛi ndo ka tanu, kete tayofudia ɔngɛnɔngɛnɔ wakondjaso lo kambɛ Jehowa ndo lo monga la lokaho otsha le anto akina. (Jni. 4:34; Etsha 20:35) Kɛnɛ koleki ohomba ele welo wadjaso wayɔngɛnyangɛnya Jehowa.​—Tuk. 27:11.