Sala dia nshi ya Eohwelo monga etena k’ɔngɛnɔngɛnɔ le yɛ!
1. Naa yoho mɔtshi yakokaso mfudia ɔngɛnɔngɛnɔ aso lo nshi ya Eohwelo?
1 Onde wɛ kombolaka mfudia ɔngɛnɔngɛnɔ ayɛ lo Ngɔndɔ ka sato, ka nɛi ndo ka tanu? Yoho mɔtshi yakokayɛ nsala dui sɔ ele, lo mpamia olimu ayɛ w’esambishelo ndo naka kokaka, nkamba oko ombatshi mboka wa tshanda. Ngande wayofudia dui sɔ ɔngɛnɔngɛnɔ ayɛ?
2. Ngande wele mpamia olimu aso w’esambishelo fudiaka ɔngɛnɔngɛnɔ?
2 Fudia ɔngɛnɔngɛnɔ ayɛ: Jehowa akatotonge la dikoka dia monga l’ɔngɛnɔngɛnɔ ndo l’ɔlɔ waya oma lo woho wɔɔtɛmɔlaso l’oyango wa nkotsha nsaki kootɔ la so k’akambo wa lo nyuma. (Mat. 5:3) Nde akatotonge nto lo yoho yakokaso monga l’ɔngɛnɔngɛnɔ waya oma lo mbisha anto akina. (Etsha 20:35) Olimu w’esambishelo toshaka diaaso dia ntɛmɔla Nzambi ndo nkimanyiya anto akina. Mbokɛmaka dia naka sho mpamia olimu aso, kete tayoleka monga l’ɔngɛnɔngɛnɔ. Laadiko dia laasɔ, etena katataleke nsambisha, mbatataleke monga la diewo. Naka tambonga la diewo, kete tayokeketsha eshikikelo kele la so ndo hatotonga la wɔma. Tayonga la waaso efula wa nsambisha ndo wa ntatɛ mbeka l’anto Bible. Awui asɔ tshɛ tokonyaka dia ndeka ngɛnangɛna olimu w’esambishelo.
3. Lande na kayonga Ngɔndɔ ka sato ndo ka nɛi ngɔndɔ ya laande ya nkamba oko ombatshi mboka wa tshanda?
3 Ngɔndɔ ka sato ndo ka nɛi ayonga ngɔndɔ ya laande ya nkamba oko ombatshi mboka wa tshanda, nɛ dia tayonga nto la diɛsɛ dia nsambisha l’asa wenya 30 kana 50. Ndo nto, ntatɛ Lushi la samalo, Ngɔndɔ ka sato 22 polo lo Eohwelo Lushi l’ɔtɔi, Ngɔndɔ ka nɛi 14, tayosala esambishelo ka laande dia mbelɛ anto dia ndjosangana kaamɛ la so lo Eohwelo. Tshumanelo diayɔngɛnangɛna naka sho tshɛ nkamba ‘dihɛka lo dihɛka’ dia nkindjakindja ɛtshi kaso ka nkɛtɛ naka kokaka l’etena kambowotosha kɛsɔ.—Zef. 3:9.
4. Ahombaso nsala naka sho nangaka nkamba oko ombatshi mboka wa tshanda?
4 Tatɛ ndjalɔngɔsɔla oma ko kakianɛ: Naka wɛ atayalɔngɔsɔla, kete ɔsa etena ka nyomenda ekongelo kayɛ ndo menda etshikitanu wakokayɛ nsala dia mpamia olimu ayɛ ngɔndɔ ɔtɔi kana ndekana. Dja dui sɔ lo dɔmbɛlɔ. (Jak. 1:5) Tɛ ase nkumbo kayɛ ndo anto akina wa l’etshumanelo dikambo diakɔ. (Tuk. 15:22) Wɛ koka ndjɛna dia kaanga mbeyɛ l’ekakatanu wendana la yoonge kana l’awui efula wa nsala, wɛ lawɔ koka monga l’ɔngɛnɔngɛnɔ waya lo nkamba oko ombatshi mboka wa tshanda.
5. Etombelo akɔna wayonga naka sho mpamia olimu aso lo nshi ya Eohwelo?
5 Jehowa nangaka di’ekambi ande monga l’ɔngɛnɔngɛnɔ. (Osam. 32:11) Naka sho nsala la wolo dia mpamia olimu aso lo nshi ya Eohwelo, kete dui sɔ hotofudiyɛ tsho ɔngɛnɔngɛnɔ, koko diayɔngɛnyangɛnya ndo Shɛso lele l’olongo.—Tuk. 23:24; 27:11.