Waohwelo wendana la Losanganya la rɛjɔ
Ekongelo ka wenya: Nshi yakɔ shato, losanganya layomɛka lo eshidi 8:20 wa pindju. Koko lo kɛnɛ kendana la nsanganya yayosalema lo esomba wa weke ɛnɛ: Bandundu-Ville, Boma, Brazzaville, Bumba, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbuji Mayi, Mwene Ditu, Pointe Noire ndo la Tshikapa, ekongelo kayotatɛka lushi tshɛ l’eshidi 9:20 wa pindju. Nkuke yayodihɔmaka lo eshidi 7:00 kana l’eshidi 8:00 wa pindju lo ndjela dihole la dihole. Etena katatɛ mishiki wa Diolelo, sho tshɛ pombaka mbidjasɛ lo ahole aso dia ekongelo ntatɛ lo yoho yasha Jehowa lotombo. Ekongelo kayokomɛka l’eshidi 3:55 l’ɔkɔngɔ a midi wa Lushi la tanu la la samalo ndo Lushi la lomingu ekongelo kayokomɛ l’eshidi 2:40 wa l’ɔkɔngɔ wa midi. L’esomba wa weke ɛsɔ, ekongelo kayokomɛka wonya ɔtɔi l’ɔkɔngɔ.
‘Totombole Jehowa la esambo aso’: Ekambi waki Nzambi wa lo nshi y’edjedja wakatombolaka Jehowa l’esambo ndo polo ɛlɔ esambo wekɔ ohomba l’ɔtɛmwɛlɔ wa mɛtɛ. (Osam. 28:7) Etenyi tshɛ ka Losanganya laso la rɛjɔ tatɛka la mishiki wakadjama l’eshinga. Ɔnɛ keema mishiki w’anyanya, koko vɔ wakalɔngɔswama dia sho mbeka awui wendana la Jehowa ndo mbɔtɛmɔla. Ɔnkɔnɛ, etena kewoya ɔnɔmbɔdi ɔnɛ mishiki wayanga ntatɛ, ayonga dimɛna sho mbidjasɛ ndo mpokamɛ la yambalo tshɛ mishiki akɔ, lo dihole dia sawolaka lam’asaso. Lo nsala ngasɔ, tayɛnya dia sho ngɛnangɛnaka welo wakadje olui w’apomi wa nyangɛso asɔ. Anangɛso la akadiyɛso asɔ, mindaka lɔkɛndɔ mbala hiende l’ɔnɔnyi la falanga yawɔ vɔamɛ otsha la Patterson, la New York, l’oyango wa vɔ todja mishiki l’eshinga dikambo di’ɔngɛnɔngɛnɔ aso. L’ɔkɔngɔ wa sho ndjela la yambalo tshɛ mishiki wakadjama l’eshinga, onto tshɛ pombaka memala dia ntombola Jehowa kaamɛ lo memba esambo aso wa Diolelo.
Ahole wa mbidjasɛ: Ohɔ dia paka wanɛ woye la yɛ mbala ɔtɔi kana wele la yɛ lo luudu laamɛ kana ambeki ayɛ wa Bible mbahombayɛ namɛ ahole wa mbidjasɛ.
Ɔlɔtɔ wa dimɛna: Etena kayotonga lo losanganya la woke, sho pombaka ndɔta dimɛna ndo lo yoho yele la wɛdimo, koko aha ndɔta lo yoho yalɔta ase andja ɔnɛ ya kawotake. (1 Tim. 2:9) Oyadi etena keso lo dihole diodjashiso, kambototomba yema la ntondo kana l’ɔkɔngɔ wa losanganya, sho pombaka mbewɔ dia ndɔta lo yoho y’epakapaka kana ya kawotake. Naka sho nsala ngasɔ, kete hatotengenga dia ndɔta tshapa yaso ya losanganya ndo hatotoka nsɔnyi dia nsambisha etena katanaso diaaso. Ɛnamelo ndo dionga diaso dia dimɛna etena kayotonga lo nsanganya yayaye, hokotola tsho yambalo y’anto wele l’etema w’ɛlɔlɔ oya lo losango la lo Bible lashimbɛ nsɛnɔ, koko dui sɔ diayɔngɛnyangɛnya ndo Jehowa.—Zef. 3:17.
Tokambe dimɛna la dihomɔ dia tshulatshula: Sho mɛnyaka loshilambo la so etena kasalema losanganya lo mbidja telefɔnɛ yaso lo adidimu kana nsala diaha dihomɔ dikina dia tshulatshula mfukutanya anto akina. Naka wɛ ekɔ lo nkamba la kamɛra, vidɛo yasangola awui, tablɛtɛ kana dihomɔ dikina, wɛ pombaka nsala diaha mfukutanya anto akina kana mbakombɛ. Tayɛnya loshilambo la so nto lo ntshika fundanɛ mesajɛ tshanana wonya wa losanganya. Lam’alanganyu, tatelɛke anto wa l’andja ɔnɛ wakamba olimu wa mundaka foto oya lo dihole dia losanganya. Naka vɔ wamboya lo dihole dia losanganya ko wonyɔlɔmba dia mbɔtɔ foto le wɔ, tanyetawɔke.—Jni. 2:13-17.
Olelo wa la midi: Sho nɔmbaka anto tshɛ dia ndjaka la yangɔ ya ndɛ y’osadi, koko ya dimɛna, ɛnyɛlɔ: mapa, oyoko, abɔtɛ, alowa, ekate la diangɔ dikina di’esadi. Ashi wa nnɔ, tshayi, kana eloko pombaka mbidjama lo diangɔ diahakoke mbolɛ dia mbewɔ aksida. Hakoke ndja la wanu lo losanganya la woke. Naka onto tshɛ ndja la yangɔ ya ndɛ kana ya nnɔ, kete hatototshɔ dia tosomba diangɔ sɔ le wanɛ wasondja mbo ya ndɛ. Mbewɔ dia nsomba diangɔ dia ndɛ le anto asɔ ayokimanyiya dia pudipudi monga lo dihole dia losanganya. (Diewoyelo: Wanɛ wasondja mbo ya ndɛ hawokoke mbɔtɔ lo dihole diasalema losanganya oyadi wonya akɔna tshɛ.—Jni. 2:13-17).
Weshasha: Sho kokaka mɛnya lowando laso lo ɛlɔngɔswɛlɔ wendana la losanganya la woke lo kimɔka weshasha wa la lolango lo dihole dia losanganya dia nsukɛ olimu wa l’andja w’otondo. Lo shɛkɛ tshɛ, nyɛnya dia “ Association ‘ Les Témoins de Jéhovah ’ ” mbahomba nongola falanga.
Ekanga: Naka wɛ ekɔ lo mbɔsa ekanga, kete tohɛke dia ndja la wɔ nɛ dia ekanga wa mbisha anto bu lo dihole dia losanganya. Tɛdi yakawɔ wanɛ wele la diabɛtɛ pombaka mombama dimɛna ndo aha ndjidja lo diangɔ diakashawɔ mindo diokitshami lo dihole dia losanganya.
Aksida ndo awui wa wanyandja: Naka onto ambondama la hemɔ ka wanyandja lo dihole dia losanganya, nyote ɔnɛ lashana ahole lele suke la nyu, ko nde ayewoya mbala kakɔ ɔtɔi wanɛ wakamba lo Departɛma diendana la esakelo ka wanyandja, ko vɔ wayowosha ekimanyielo kahombama.
Fɔrmilɛrɛ Veuillez suivre l’intérêt (S-43): Lo esambishelo ka lo tshakitudi kayonyosala lo nshi ya Losanganya la rɛjɔ lɔnɛ, kanyokambe la fɔrmilɛrɛ kɛnɛ dia mbeya anto tshɛ wakɛnya nsaki. Oma l’ɔkɔngɔ wa nyu ndjilodja, ko nyu mbisha wanɛ wakamba l’awui w’ekanda kana sekeletɛlɛ ka l’etshumanelo kanyu.
Rɛstora: Nyɔlɛmiya lokombo la Jehowa oma lo lɔkɛwɔ lanyu l’ɔlɔlɔ. Kanyɔlɔtɛ lo yoho yasungana oko Akristo. Kanyotshike yema ya dikuta l’ɔtɛ wonyokimanyishawɔ naka mbekelo kɛsɔ kekɔ l’ɛtshi kanyu ka nkɛtɛ.
Lɛnɛ ohangiso:
Tohangiyake anto efula oleki lofulo laketawɔ kanga luudu.
Naka wɛ aya bu l’ohomba wa luudu, lam’alangayɛ ewoya dikambo sɔ aha la ntshimbatshimba.
La ntondo ka wɛ nkatɛ, tambudi kanga luudu kana ɔnangɛso lendana la ohangelo wa lo Mbalasa ka Diolelo tɛdikɔ tshɛ tɔsami.
Aha wɛ nkamba lo yoho ya kɔlɔ la diangɔ diakawakitsha dikambo dia angɛndangɛnda. Dionga diahombaso monga la diɔ ele wɛdimo ndo kanɛ anto akina.
Kotshikake mpango kayɛ wonya tshɛ kɔmba ndo pudipudi. Dikambo sɔ mendanaka ndo la Mbalasa ka Diolelo kakokawɔ mpangiya anangɛso la akadiyɛso w’oma lo tshumanelo dia ntale.
Kɛnɛmɔla olowa wa nyuma lo yoho yasɛnayɛ la anto akina, oyadi le ɔnɛ lokohangiyisha kana le anangɛso akina wa Akristo wakoka mpanga la yɛ dihole ɔtɔi.—Ngal. 5:22, 23.
Olimu wa wanɛ wayakimɔ la lolango: Onto tshɛ lalanga nsala dikambo sɔ kokaka nkimɔ lokombo lande lo Departɛma di’anto wayakimɔ la lolango. Ana wele l’ɛse k’ɛnɔnyi 16 kokaka vɔ lawɔ mbisha lonya lo nkamba lo ɛlɔmbwɛlɔ k’ombutshi awɔ ɔmɔtshi, olami ɔmɔtshi wa dihole sɔ kana lo ɛlɔmbwɛlɔ k’opalanga okina wambetawɔma oma le ombutshi kana olami ɔsɔ.