Waaso w’efula wa ndeka ntombola Jehowa

1. Yɛdikɔ yakɔna y’oyoyo yakɔsama yayotokimanyiya dia ‘ndeka ntombola Jehowa’?

¹ Lo Ngɔndɔ ka sato ketshi, yɛdikɔ y’oyoyo yakɔsama dia mbisha apandjudi diaaso dia nkamba olimu w’ombatshi mboka wa tshanda lo nkimɔ wenya 30 lo Ngɔndɔ ka sato la ka nɛi tshɛ ndo lo ngɔndɔ kasalema lomingu la laande. Naka lomingu la laande layosalema lam’asa ngɔndɔ hiende, kete apandjudi koka ndodia dɛmandɛ dia nkamba oko ambatshi mboka wa tshanda lo nkimɔ wenya 30 lo nsɔna ngɔndɔ kɛmɔtshi l’atei ayɔ. Ambatshi mboka wa tshanda asɔ tshɛ wayɔtɔka losanganya l’otondo layosalaka omendji w’otshimbedi nde l’ambatshi mboka wa pondjo la wa laande. Kɛsɔ nembetshiyaka dia naka sho bu l’akoka wa nkotsha wenya 50, kete sho koka ‘ndeka ntombola Jehowa’ lo nkamba oko ambatshi mboka wa tshanda lo nkimɔ wenya 30 mbala nyɛi l’ɔnɔnyi!—Osam. 109:30; 119:171.

2. Wahɔ akɔna wayokondja apandjudi wayokamba oko ambatshi mboka wa tshanda lo ngɔndɔ kasalema lomingu la laande?

² Ngɔndɔ kasalema lomingu la laande: Oma l’etena kɛnɛ, anto efula waya la diaaso dia nkamba olimu w’ombatshi mboka wa tshanda lo ngɔndɔ kasalema lomingu la laande ndo wayokeketshana la omendji lo nsambisha kaamɛ la nde. (Rɔmɔ 1:11, 12) Ambatshi mboka wa tshanda efula koka mbɔsa kɔnje l’atei wa lomingu dia nsambisha kaamɛ l’omendji w’otshimbedi. Wanɛ wakamba elimu wa l’emunyi lomingu l’otondo, koka mbɔlɔmba dia nde nsambisha la wɔ Lushi la samalo kana la lomingu. Laadiko dia laasɔ, ambatshi mboka wa tshanda wayokeketshama efula lo mbɔtɔ lo losanganya l’otondo layosala omendji kaamɛ l’ambatshi mboka wa pondjo ndo wa laande!

3. Lande na kele nshi ya Eohwelo yekɔ diaaso dia laande dia nkamba olimu w’ombatshi mboka wa tshanda?

³ Ngɔndɔ ka sato ndo ka nɛi: Apandjudi wakakondjaka wahɔ oma lo yɛdikɔ yakɔsama dia nkamba oko ambatshi mboka wa tshanda lo nkimɔ wenya 30 ngɔndɔ ɔtɔi lo nshi ya Eohwelo koka kakianɛ ndodia l’ahende “olambo awɔ wa lotombo”! (Hɛb. 13:15) Ngɔndɔ ka sato la ka nɛi ekɔ ngɔndɔ y’ohomba efula ya sho mfudia olimu aso lo monga ambatshi mboka wa tshanda. Ɔnɔnyi tshɛ, lo tena sɔ sho mbishaka lonya lo esambishelo ka laande ka mbelɛ anto oya lo Eohwelo. Laadiko dia laasɔ, lam’ele anto efula fudiaka olimu awɔ w’esambishelo lo nshi ya Eohwelo, tayonga la diɛsɛ dia nsambisha kaamɛ l’apandjudi efula wotshikitanyi. L’ɔkɔngɔ wa Eohwelo, sho ndjotshɔka dia tembola anto wakɛnya nsaki lo woho wakawaye ndjɔtɔ lo Eohwelo dia tokeketsha nsaki kawɔ dia vɔ ndjohokamɛ sawo dia laande. Onde otema ayɛ wayokotshutshuya dia wɛ nkondja wahɔ oma lo waaso akina wambowotosha wa monga ombatshi mboka wa tshanda?—Luka 6:45.