Ɔtɛkɛta wa Nzambi wekɔ la wolo

1. Naa ɔtɛ a dui wa Losanganya la laande la lushi ɔtɔi la l’ɔnɔnyi w’olimu wa 2014?

¹ Otshikitanyi la diangɔ dikina tshɛ diakatshule ana w’anto, Bible kekɔ la wolo wa totshikitanya, mbɔtɔnganyiya tokanyi taso ndo yoho yaso ya nsala akambo la lolango la Jehowa. Ko wolo wa ngande wele la Ɔtɛkɛta wa Nzambi? Ngande wakokaso nkamba la wolo wele la Ɔtɛkɛta wa Nzambi lo nsɛnɔ yaso? Ngande wakokaso nkamba la tɔ dia nkimanyiya anto akina dimɛna dimɛna? Tekɔ l’eshikikelo di’anto tshɛ wayokeketshama lo nyuma etena kayokadimɔma ambola asɔ lo Losanganya la laande la lushi ɔtɔi la l’ɔnɔnyi w’olimu wa 2014. Losanganya lɔsɔ layonga l’ɔtɛ adui ɔnɛ: “Ɔtɛkɛta wa Nzambi wekɔ la wolo.” Vɔ mbɔsama oma lo Hɛbɛru 4:12.

2. Lo ambola akɔna wayotokondja ekadimwelo?

² Tayokondja ekadimwelo lo ambola wayela anɛ: Etena kayonyoyelaka losanganya lɔsɔ, kanyotafundaka ekadimwelo lo ambola wele l’ɛse anɛ:

• Lande na kahombaso ndjaɛkɛ lo Ɔtɛkɛta wa Jehowa? (Osam. 29:4)

• Ngande wakokaso mɛna wolo wele la Ɔtɛkɛta wa Nzambi lo nsɛnɔ yaso? (Osam. 34:8)

• Ngande wakokaso nshihodia wolo wele la Ɔtɛkɛta wa Nzambi l’olimu aso w’esambishelo? (2 Tim. 3:16, 17)

• Ngande wakokaso mbewɔ dia ntala lo wolo wa lokeso w’andja ɔnɛ waki Satana? (1 Jni. 5:19)

• Ngande wakokayɛ mpama lo nyuma oko weyɛ ɔlɔngɔlɔngɔ? (Jer. 17:7)

• Ngande wakokaso monga la wolo kaanga l’etena keso wɛɔdu? (2 Kɔr. 12:10)

• Kakɔna kakoka tokimanyiya dia sho ntetemala nsala etshikitanu lo nsɛnɔ yaso oyadi takikɔ la mbekelo ndo la ditshelo dia kɔlɔ l’etena k’otale? (Ɛf. 4:23)

3. Laadiko dia ndjela kɛnɛ kayotama lo Losanganya la laande la lushi ɔtɔi, naa wahɔ okina wayotokondja oma lo losanganya lɔsɔ?

³ Ande wahɔ wayotokondja lo ndjela la yambalo tshɛ wetshelo w’ohomba efula ɔsɔ lee! Laadiko dia laasɔ, Losanganya la laande la lushi ɔtɔi, l’otshimbedi ndo la distrikɛ layotosha diaaso dia sho mpamia ngandji kaso ndo ngɛnangɛna kaamɛ l’anangɛso ndo l’akadiyɛso w’oma lo tshumanelo dikina. (Osam. 133:1-3; 2 Kɔr. 6:11-13) Diakɔ diele, ayonga ɔlɔlɔ dia sho ntshungola etena dia nsawola l’angɛnyi aso w’edjedja ndo nsala la wolo dia monga l’angɛnyi w’eyoyo. Naka ɔtɛkɛtshi w’ɔngɛndangɛnda, ɛnyɛlɔ omendji wa distrikɛ kana ɔnangɛso ɔmɔtshi l’oma lo Bɛtɛlɛ ambotomama oya lo losanganya lanyu la laande, onde wɛ hakoke nkamba la diaaso sɔ dia mbolongola nde la wadɛnde? Tekɔ mɛtɛ l’ɛkɔkɔ w’eshika wa kongɛ losanganya lɔsɔ l’asolo walomɔlomɔ.